༢༠༡༢ ཟླ་ ༤ ཚེས་ ༢༠ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༤ ཚེས་ ༡༩ ཉིན་གྱི་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་གིས་དཀའ་ངལ་གྱི་དུས་སྐབས་སུ་བཟང་སྤྱོད་དང་བྱམས་བརྩེ་ཉམས་ལེན་བྱེད་ཚུལ། ཞེས་པའི་བརྗོད་གཞིའི་ཐོག་(San Diego State University)སན་ཌི་ཡ་གོའི་མངའ་སྡེའི་གཙུག་ལག་སློབ་གྲྭའི་དགེ་ལས་སློབ་ཕྲུག་དང་མི་མང་བཅས་ཁྱོན་མི་གྲངས་ ༡༣༠༠༠ བརྒལ་བར་བཀའ་སློབ་སྩལ་འདུག
དེ་ཡང་ཐོག་མར་གཙུག་ལག་སློབ་གྲྭ་དེའི་འགན་འཛིན་མཁས་དབང་ཨི་ལི་ཊོ་ཤེ་མན་ (Elliot Hirshman) མཆོག་གིས་འཚམས་འདྲིའི་གསུང་བཤད་གནང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གཙུག་ལག་སློབ་ཁང་འདིར་གདན་ཞུའི་གསོལ་འདེབས་ཞུས་དོན་ལྟར་བཀའ་བཞེས་ཟབ་པོ་ཐོབ་སྟེ་ཆིབས་སྒྱུར་བསྐྱངས་ནས་མཛད་འཕྲིན་སྐྱོང་བཞིན་པར་ང་ཚོ་ཧ་ཅང་དགའ་སྤོབས་ཆེན་པོ་བྱུང་། ཞེས་ཞུས་ཡོད། དེ་རྗེས་སན་ཌི་ཡ་གོའི་གྲོང་སྡེའི་སྤྱི་ཁྱབ་པ་ཇི་རི་སན་ཌར་སེ་(Jerry Sanders)མཆོག་གིས་མགོན་པོ་གང་ཉིད་མཆོག་ལ་ཆེ་བསྟོད་ཞུ་ཆེད་གྲོང་སྡེའི་ལྡེ་མིག་ཅིག་འབུལ་ལམ་ཞུས་ཏེ་གསུང་བཤད་གནང་དོན།
བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་གྲོང་ཁྱེར་གྱི་ལྡི་མིག་འདི་འབུལ་ལམ་ཞུས་པ་བརྒྱུད་ང་ཚོའི་ངོས་ནས་ཁོང་གི་བཀའ་སློབ་ཡིད་ལ་བཅངས་ཐོག་བྱམས་བརྩེ་དང་ཞི་བདེ་གོང་ཕེལ་བཏང་སྟེ་མ་འོངས་པའི་དུས་སྐབས་བཟང་པོ་ཞིག་བསྐྲུན་རྒྱུའི་འབད་བརྩོན་ཞུ་རྒྱུ་མ་ཟད། ངས་སན་ཌིཡ་གོའི་གྲོང་སྡེའི་མི་མང་ཡོངས་ཀྱི་ཚབ་ཞུས་ཏེ་གྲོང་ཁྱེར་གྱི་ལྡེ་མིག་འདི་༸གོང་ས་ཏཱ་ལའི་བླ་མ་མཆོག་ལ་གུས་བརྩི་དང་དགའ་སྤོབས་ལྡན་པའི་ཐོག་ནས་འབུལ་ལམ་ཞུ་རྒྱུ་ཡིན། ཞེས་སྙན་སྒྲོན་ཞུས་ཡོད།
དེ་ནས་༸གོང་ས་༸སྐྱབས་མགོན་ཆེན་པོ་མཆོག་གིས་དམིགས་བསལ་གཞོན་སྐྱེས་ཚོར་བཀའ་སློབ་སྩལ་དོན། ང་ཚོས་དཀའ་ངལ་གྱི་དུས་སྐབས་སུ་སེམས་ཤུགས་མ་ཆག་པ་བྱེད་དགོས་པ་མ་ཟད། བཟང་པོའི་སེམས་པ་དང་རྣམ་དཔྱོད་ཟུང་དུ་འབྲེལ་བའི་ཐོག་ནས་རང་ཉིད་ཀྱི་མི་ཚེ་འདི་དོན་དང་ལྡན་པའི་ཐོག་བསྐྱལ་ཐབས་བྱེད་དགོས། རང་ཉིད་ཀྱི་མི་ཚེའི་ནང་བདེ་སྐྱིད་དང་། བདེ་སྐྱིད་ལྡན་པའི་ཁྱིམ་ཚང་།
གདོད་མའི་ཞབས་བྲོ།
དེ་བཞིན་འཛམ་གླིང་སྤྱི་ལ་ཞི་བདེ་ཡོང་ཐབས་སུ་འབད་བརྩོན་བྱ་རྒྱུ་གལ་ཆེན་པོ་རེད། འཛམ་གླིང་འདི་བཟང་ཕྱོགས་སུ་བསྐྱོད་རྒྱུར་ཞབས་འདེགས་ཆེན་པོ་ཞིག་བསྒྲུབ་ཐུབ་རྒྱུའི་ཆེད་རང་ཉིད་ཀྱི་བཟང་པོའི་སེམས་པར་ལེགས་ཉེས་འབྱེད་པའི་ཤེས་རབ་གསོ་སྐྱོང་ཐད་དོ་སྣང་བྱས་ཏེ་མི་ཚེ་དྲང་བདེན་ཐོག་བསྐྱལ་ཐུབ་པ་བྱེད་དགོས། དེ་ནི་ལུས་རྟེན་གྱི་ས་བོན་དང་གཞི་རྟེན་ཡང་དེ་ཉིད་ཡིན་ཞེས་སོགས་ཀྱི་བཀའ་སློབ་སྩལ་ཡོད།
སྤྱིར་བཏང་སན་ཌིཡ་གོའི་མངའ་སྡེའི་གཙུག་ལག་སློབ་གྲྭ་དེ་ནི་ཁུལ་དེའི་སློབ་གྲྭ་ཆེ་ཤོས་ཡིན་ཞིང་། གཙུག་ལག་སློབ་གྲྭ་དེར་སློབ་ཕྲུག་ཁྱོན་བསྡོམས་གྲངས་ ༣༡༠༠༠ ཙམ་ཡོད་པ་དང་། ད་ཐེངས་བཀའ་ཆོས་སྩལ་ཡུལ་གྱི་ཚོགས་ཁང་ནང་ཁྱོན་མི་མང་གྲངས་ ༡༢༠༠༠ ཤོང་གི་ཡོད་འདུག དེ་བཞིན་ཕྱི་ཚེས་ ༢༢ ཉིན་མགོན་པོ་གང་ཉིད་མཆོག་གི་བཀའ་སློབ་ཞུ་བར་ཡོང་མཁན་ཚོས་དུས་ཡུན་སྐར་མ་ ༣༠ ནང་ཚུན་ལ་བཀའ་ཆོས་ཀྱི་ཕྱག་འཁྱེར་ ༡༢༠༠༠ ཡོད་པ་ཡོངས་རྫོགས་ཉོས་གྲུབ་ཟིན་འདུག དེར་བརྟེན་༸གོང་ས་༸སྐྱབས་མགོན་ཆེན་པོ་མཆོག་གིས་སྤྱིར་འཛམ་གླིང་མི་མང་དང་ཡང་སྒོས་གྲོང་ཁྱེར་དེའི་མི་མང་རྣམས་ལ་ཉེ་རིང་མེད་པའི་མཛད་འཕྲིན་རྒྱ་ཆེ་བསྐྱངས་དང་སྐྱོང་མུས་ཡིན་པར་འཛམ་གླིང་མི་མང་གིས་དགའ་མོས་དང་གུས་བརྩི་ཞུ་བཞིན་ཡོད་པ་གསལ་པོ་མཚོན་ཐུབ་པ་བཅས། །
