༢༠༡༢ ཟླ་ ༤ ཚེས་ ༡༨ རེས་གཟའ་ཕུར་བུ།

༄༅། །ཕྱི་ལོ་ ༢༠༡༢ ཟླ་ ༤ ཚེས་ ༡༨ སྔ་དྲོ་༸གོང་ས་༸སྐྱབས་མགོན་ཆེན་པོ་ཆོག་གིས་ཨ་རི་ཁལ་ལི་ཕོར་ནི་ཡའི་གྲོང་ཁྱེར་སན་ཌི་ཡ་གོའི་ཞུགས་གནས་མགྲོན་ཁང་ནས་ཁལ་ལི་ཕོར་ནི་ཡའི་གཙུག་ལག་སློབ་གྲྭར་ཆིབས་སྒྱུར་བསྐྱངས་ཏེ་༸ཞབས་སོར་འཁོད་སྐབས། གཙུག་ལག་སློབ་གྲྭའི་རིགས་བདག་སྐུ་ཞབས་མར་ཡེ་ཨན་ནེ་(Marye Anne Fox)མཆོག་གིས་ཕེབས་བསུ་ཞུས་ཏེ་ཐོག་མར་གསར་འགོད་པ་ཚོར་བཀའ་སློབ་སྩལ་ཡོད། སྐབས་དེར་མགོན་པོ་གང་ཉིད་མཆོག་གིས་འགྲོ་བ་མིའི་བཟང་སྤྱོད་དང་འབྲེལ་བའི་རིན་ཐང་གོང་མཐོར་གཏོང་རྒྱུ་དང་ཆོས་ལུགས་མཐུན་སྒྲིལ་གོང་མཐོར་གཏོང་ཐབས་ཀྱི་མཛད་ཁུར་གཙོ་བོ་གཉིས་ཀྱི་ཐོག་བཀའ་སློབ་སྩལ། དེ་རྗེས་བོད་དོན་དང་འབྲེལ་བའི་ཐོག་བཀའ་སློབ་སྩལ་དོན། ངོས་རང་ཆུང་དུས་ནས་དེ་སྔའི་བོད་གཞུང་གི་འགྲོ་སྟངས་དེར་ཞན་ཆ་མང་པོ་ཡོད་པ་ཚོར་མྱོང། ཕྱིས་སུ་ཕྱི་ལོ་ ༡༩༥༠ ལོར་བོད་མིའི་ཆབ་སྲིད་ཀྱི་འགན་བླངས་ཏེ་ཕྱི་ལོ་ ༡༩༥༢ ལོར་ལེགས་བཅོས་ལས་ཁུངས་གསར་འཛུགས་བྱས་ཏེ་བཅོས་བསྒྱུར་གཏོང་རྒྱུའི་འགོ་བཙུགས་ཡོད་ཀྱང་རྒྱ་ནག་གུང་ཁྲན་ཏང་ནས་འགོག་རྐྱེན་བཟོས་པར་བརྟེན་ལམ་ལྷོང་བྱུང་མེད། འོན་ཀྱང་ཕྱི་ལོ་ ༡༩༥༩ ལོར་རྒྱ་གར་ལ་བཙན་བྱོལ་དུ་འབྱོར་རྗེས་རིམ་པས་མང་གཙོའི་ངོ་བོར་བཅོས་བསྒྱུར་ཐུབ་པ་བྱུང་ནས་ཕྱི་ལོ་ ༢༠༡༡ ལོར་ངོས་ཀྱིས་བོད་མིའི་ཆབ་སྲིད་ཀྱི་འགན་དབང་ཡོངས་རྫོགས་མི་མང་གིས་འོས་འདེམས་བྱས་པའི་བཀའ་བློན་ཁྲི་པར་རྩིས་སྤྲོད་བྱས་པ་ཡིན། ཞེས་སོགས་ཀྱི་བཀའ་སློབ་སྩལ་ཡོད་པ་བཅས།།