༢༠༡༢ ཟླ་ ༤ ཚེས་ ༡༨ རེས་གཟའ་ལྷག་པ།
༄༅། །ཕྱི་ལོ་ ༢༠༡༢ ཟླ་ ༤ ཚེས་ ༡༨ ཉིན་བཞུགས་སྒར་རྡ་སའི་ཉེ་འགྲམ་དཔལ་ལྡན་རྒྱུད་སྟོད་གྲྭ་ཚང་གི་དཔེ་མཛོད་ཁང་ལེགས་གྲུབ་དབུ་འབྱེད་དང་དགེ་བཤེས་སྔགས་རམས་པའི་བསླབ་པ་མཐར་སོན་རྣམས་ལ་ཕྱག་འཁྱེར་གནང་བའི་མཛད་སྒོ་ཚོགས་ཡོད།
དེ་ཉི་སྔ་དྲོ་ཆུ་ཚོད་ ༡༠ ཐོག་སྐུ་མགྲོན་གཙོ་བོ་སྒྲུབ་བརྒྱུད་བསྟན་པའི་གསལ་བྱེད་རྒྱལ་བ་ཀརྨ་པ་རིན་པོ་ཆེ་མཆོག་དང་། བཀའ་ཟུར་ཟམ་གདོང་རིན་པོ་ཆེ་མཆོག ཆོས་རིག་བཀའ་བློན་པདྨ་ཆོས་འབྱོར་མཆོག སེར་བྱེས་ལོ་དཀོན་སྤྲུལ་སྐུ་བྱམས་པ་ཆོས་བཟང་ལགས་ཀྱིས་དབུས་གྲྭ་ཚང་གི་མཁན་བླ་འདུས་དམངས་དང་། བོད་མི་མང་སྤྱི་འཐུས་དང་སྤྱི་ཟུར་ཁག་གཅིག རིག་གཞུང་དང་འབྲེལ་བའི་དགོན་བཙུན་སློབ་གྲྭ་ཁག་གི་དཔེ་མཛོད་འགན་འཛིན་རྣམ་པ། ཕྱི་རྒྱལ་སྐུ་མགྲོན་དང་སྦྱིན་བདག་བཅས་ལྷན་འཛོམས་ཐོག་སྐུ་མགྲོན་གཙོ་བོ་རྣམ་གཉིས་ཀྱིས་དཔེ་མཛོད་ཁང་གི་སྒོ་ཆེན་གྱི་དར་ཚོན་སྣ་ལྔ་ཞལ་དབྱེ་དང་བསྟུན་མཁན་བླ་ཆོག་གྲྭ་རྣམས་ནས་བཀྲ་ཤིས་པའི་ཚིགས་ཀྱི་ཤིས་བརྗོད་བཏོན་རྗེས་སྣང་གསལ་ཞལ་ཕྱེ་དང་རྟེན་གཙོ་ལ་མཇལ་དར་ཕུལ་ཟིན་མཚམས་གསོལ་ཇ་འབྲས་སིལ་ཕུལ་ནས་རྒྱུན་ཆགས་གསུམ་དང་རིས་མེད་བསྟན་རྒྱས་སྨོན་ལམ་གསུང་འདོན་གནང་། དེ་ནས་དཔེ་ཁྲིད་དགེ་རྒན་དགེ་བཤེས་སྔགས་རམས་པ་མཁས་གྲུབ་ནོར་བཟང་ལགས་ཀྱིས་རྒྱུད་ཆེན་སྦྱིན་པ་དཔལ་བའི་མཛད་རྣམ་ངོ་སྤྲོད་གནང་རྗེས་སྐུ་མགྲོན་གཙོ་བོ་རྣམ་གཉིས་ཀྱི་རྒྱུད་སྟོད་དཔེ་མཛོད་ཁང་ནས་དཔར་སྐྲུན་ཞུས་པའི་གསང་སྔགས་ཟམ་མོའི་མཛོད་འཛིན་རྒྱུད་ཆེན་སྦྱིན་པ་དཔལ་བའི་རྒྱུད་ཊཱིཀ་ཆེན་མོ་དང་གསང་ཆེན་སྟོད་རྒྱུད་པོད་ཕྲེང་དང་པོ་ཞལ་ཕྱེ་གྲུབ་བསྟུན་ལོ་དཀོན་སྤྲུལ་སྐུ་བྱམས་པ་ཆོས་བཟང་ལགས་ཀྱིས་དུས་སྟོན་དང་འབྲེལ་བའི་བསླབ་པ་སློབ་གཉེར་རྒྱུན་འཁྱོངས་དགོས་པའི་གསུང་བཤད་དང་གྲྭ་ཚང་གི་ཕྱག་མཛོད་བློ་བཟང་རྡོ་རྗེ་ལགས་ཀྱིས་དགེ་བཤེས་སྔགས་རམས་རྣམ་པའི་སློབ་གཉེར་གྱི་གཞུང་ཚན་ཁག་ངོ་སྤྲོད་གནང་མཚམས་སྐུ་མགྲོན་གཙོ་བོ་རྣམ་གཉིས་ཀྱིས་སྔགས་རམས་པའི་སློབ་པ་མཐར་སོན་པ་རྣམ་པར་ཕྱག་འཁྱེར་གནང་རྗེས་བཀའ་བློན་པདྨ་ཆོས་འབྱོར་མཆོག་གིས་གསུང་བཤད་གནང་དོན། དེ་རིང་འདིར་ཕེབས་པའི་སྐུ་མགྲོན་ཡོངས་ལ་ཆོས་རིག་ལས་ཁུངས་ཀྱི་ཚབ་ཞུས་ཏེ་འཚམས་འདྲི་ཞུ་གི་ཡོད། འཛམ་གླིང་སྟེང་རྒྱལ་པོ་དང་རྒྱལ་ཁབ་ཀྱི་བང་མཛོད་ཅེས་མཛོད་མང་པོ་ཞིག་ཡོད་ཀྱང་དཔེ་མཛོད་ཟེར་བ་དེ་ནི་མིའི་ཀླད་པའི་མཛོད་ཅིག་ཡིན་པར་བརྟེན་གཞན་དང་མི་འདྲ་བའི་རྩ་ཆེན་པོ་ཡིན་པས་དཔེ་མཛོད་སྤུས་དག་པོ་ཞིག་སྐྲུན་ཐུབ་པར་ཧ་ཅང་བསྔགས་བརྗོད་ཞུ་གི་ཡོད་། ཅེས་དང་དུས་རབས་
བདུན་པ་ནང་ཐོན་མི་སམ་བྷོ་ཊས་གཙོས་དུས་རབས་བརྒྱད་པའི་ནང་མཁན་སློབ་ཆོས་གསུམ་སྐབས་དར་རྒྱས་བྱུང་བའི་བོད་ཀྱི་ཆོས་རིག་གཞུང་སྤུས་དག་དེ་སྔ་ཕྱི་ལོ་ ༡༩༥༩ གོང་བོད་ཅེས་པ་གོ་མྱོང་མེད་པའི་འཛམ་གླིང་ཡུལ་དུ་ཁག་ཏུ་དར་རྒྱས་བྱུང་སྟེ་ཆོས་ཚོགས་ ༧༠༠ བརྒལ་བ་ཡོད་པ་མ་ཟད་། རྒྱ་ནག་ནང་པ་ས་ཡ་མང་པོ་ཡོད་པར་སོང་བསྟན་པ་འཛིན་སྐྱོང་སྤེལ་གསུམ་སྤུས་དག་དགོས་པའི་གསུང་བཤད་གནང་རྗེས་བཀའ་ཟུར་ཟམ་གདོང་རིན་པོ་ཆེ་མཆོག་གིས་གསུང་བཤད་གནང་དོན། འདི་ག་གྲྭ་ཚང་ནས་དགེ་བཤེས་སྔགས་རམས་པའི་ཕྱག་འཁྱེར་བཞེས་མཁན་རྣམས་ལ་རྗེས་སུ་ཡི་རང་ཞུས་པ་དང་། ཆབས་ཅིག་འདིར་བསླབ་པ་མཐར་སོན་པའི་མཛད་སྒོ་ཞེས་བརྗོད་འདུག་ཡང་། ད་ཆ་ཐོས་བསམ་སློབ་གཉེར་བྱེད་རྒྱུ་དེ་མཐར་སོན་པ་རེད། ད་དུང་ཐོས་པའི་རྗེས་སུ་སྒྲུབ་པ་ཉམས་ལེན་གྱི་ཐོས་བསམ་སྒོམ་གསུམ་ཡ་མ་བྲལ་བ་ཞིག་དང་བཤད་སྒྲུབ་གཉིས་ཀྱི་བསྟན་པ་འཛིན་སྐྱོང་སྤེལ་གསུམ་བྱེད་དགོས་སོགས་དང་། དཔེ་མཛོད་ཅེས་པ་བོད་པ་རང་གི་ཐ་སྙད་ཅིག་དང། དེའི་ནང་དཔེ་དེབ་འཇོག་པ་ཙམ་མིན་པར་དེ་འཛིན་སྐྱོང་བྱེད་པའི་རིག་གཞུང་ཞིག་ཡོད་པ་མཁྱེན་དགོས་སོགས་ཀྱི་གསུང་བཤད་གནང་རྗེས་སྒྲུབ་བརྒྱུད་བསྟན་པའི་གསལ་བྱེད་ཀརྨ་པ་རིན་པོ་ཆེ་མཆོག་གི་གསུང་བཤད་གནང་དོན། དགོན་པ་གྲྭ་ཚང་ཁག་ལ་དཔེ་མཛོད་ཆ་རྐྱེན་དེ་གལ་ཆེན་ཡིན་པ་དང་ང་ཚོར་དཔེ་དེབ་ལྟ་བའི་གོམས་གཤིས་སྐྱོ་པོ་ཡོད་ཀྱང་། བོད་ཀྱི་སངས་རྒྱས་ཆོས་ཀྱི་ཁུངས་གཏུགས་ས་དེ་བཀའ་འགྱུར་བསྟན་འགྱུར་སོགས་ཡིན་དུས་དཔེ་མཛོད་བེད་སྤྱོད་ཡག་པོ་གནང་དགོས་སྐོར་སོགས་ཀྱི་གསུང་བཤད་གནང་རྗེས་གྲྭ་ཚང་གི་ཤེས་ཡོན་འགན་འཛིན་འཇམ་དཔལ་རྒྱ་མཚོ་ལགས་ཀྱི་ཐུགས་རྗེ་ཆེ་ཞུས་ཏེ་མཛད་སྒོ་གྲོལ་བ་བཅས། དགེ་བཤེས་སྔགས་རམས་པ་ནི་གདན་ས་ནས་དགེ་བཤེས་བཏང་ཟིན་མཚམས་ལོ་ངོ་བཅུ་དགུའི་རིང་ཕྱག་སྲོལ་ཅི་རིགས་ཀྱི་སློབ་གཉེར་གནང་དགོས་ཀྱི་ཡོད་འདུག་པ་བཅས་
