༢༠༡༢ ཟླ་ ༤ ཚེས་ ༡༡ རེས་གཟའ་ལྷག་པ།
༄༅།  །གསར་འགྱུར་བརྒྱུད་ལམ་ཁག་ནས་གནས་ཚུལ་ཐོན་གསལ་ལྟར་ན། འདི་ལོ་སྔ་ཕྱིར་ཁམས་ནགས་ཤོད་འབྲི་རུ་རྫོང་གི་བོད་མི་ཤེས་ཡོན་པ་ཁག་གཅིག་རྒྱ་ནག་གཞུང་གིས་ཉེས་མིང་འདྲ་མིན་འོག་འཛིན་བཟུང་བྱས་པ་དང་། ད་ལྟའི་ཆར་གནས་སྟངས་གང་འདྲ་ཆགས་ཡོད་མེད་དང་། གང་དུ་བཀག་ཉར་བྱས་ཡོད་མེད།  འཛིན་བཟུང་བྱེད་དགོས་པའི་རྒྱུ་མཚན་ཇི་ཡིན་ཁ་གསལ་ཤེས་རྟོགས་མེད་པར་གྱུར་ཡོད།
དེ་ཡང་ཁམས་འབྲི་རུ་རྫོང་ཁོངས་ནས་སྨན་པ་ཨོ་རྒྱན་བསྟན་འཛིན་ལགས་དང། དགེ་རྒན་བསྟན་འཛིན་ཐབས་མཁས་ལགས། མགོན་པོ་ཀླུ་དབང་ལགས། མར་རིལ་པ་སངས་ལགས། ཚོང་པ་ཉི་མ་ཚེ་རིང་བཅས་རྒྱ་གཞུང་གིས་སྔ་ཕྱི་འཛིན་བཟུང་བཀག་ཉར་བྱས་རྗེས། ད་ལྟའི་གནས་སྟངས་གསལ་པོ་མི་འདུག་ཅེས་འབྲེལ་ཡོད་ཀྱིས་འགྲེལ་བརྗོད་གནང་འདུག འབྲེལ་ཡོད་ཀྱིས་གནས་ཚུལ་མཁོ་སྤྲོད་པས་བརྗོད་དོན། ལོ་འདིའི་ཕྱི་ཟླ་ ༢ ཚེས་ ༡༨ ཉིན་ཁམས་འབྲི་རུ་རྫོང་ཁུལ་དུ་གྲགས་ཆེ་བའི་གསོ་རིག་མཁས་པ་ཨོ་རྒྱན་བསྟན་འཛིན་ལགས་སུ་ས་གནས་ཉེན་རྟོག་པའི་འདྲི་རྩད་བྱས་པ་དང་།  དེ་རྗེས་ལྷ་སར་བོད་སྨན་ཉོ་བར་འགྲོ་དགོས་པ་སོགས་ལ་ཁ་གཡར་ནས་ལྷ་སར་ཁྲིད་དེ་ལྷ་སའི་སྤྱི་བདེ་ལས་ཁུངས་སུ་མུ་མཐུད་འདྲི་རྩད་དང་བཀག་ཉར་བྱས་ཡོད་འདུག དོན་དམ་དུ་སྨན་པ་ཨོ་རྒྱན་ལགས་ལ་ནག་ཉེས་གང་ཡང་མ་རྙེད་པར་གང་བྱུང་དུ་འཛིན་བཟུང་བྱས་པ་ཁོ་ན་ཡིན་འདུག   བོད་སྨན་མཁས་པ་ཨོ་རྒྱན་བསྟན་འཛིན་ལགས་ནི་ཁམས་འབྲི་རུ་རྫོང་བོམ་ཕན་ཤང་གི་མི་ཡིན་པ་དང་།  ད་ལྟ་རང་ལོ་༥༥  ཙམ་ལ་སླེབས་ཡོད་ཅིང་།  ཁོང་ནི་བོད་ཀྱི་རིག་གཞུང་སྤྱི་དང་།  ལྷག་པར་བོད་ཀྱི་གསོ་བ་རིག་པའི་གཞུང་ལ་ཧ་ཅང་མཁས་པ་ཡིན་འདུག
ཡང་སྒོས་ལོ་ངོ་ ༣༠   ཙམ་གྱི་རིང་ས་གནས་ཀྱི་ནད་པ་འབོར་ཆེན་ཞིག་ལ་སྨན་བཅོས་བྱས་དང་བྱེད་མུས་ཡིན་འདུག དེ་ཡང་ནད་པ་ཉམ་ཐག་སུ་ཡིན་ལ་རིན་མེད་སྨན་བཅོས་བྱེད་ཀྱི་ཡོད་ལ། གྲྭ་བཙུན་ཚོ་དང་སློབ་གྲྭ་བ་སོགས་ཤེས་ཡོན་པའི་སྡེ་ཚན་ལ་དཔལ་འབྱོར་གྱི་མཐུན་རྐྱེན་སྦྱར་བ་སོགས་སྤྱི་ཚོགས་ལ་ཕན་པའི་བྱ་གཞག་རླབས་ཆེན་སྒྲུབ་མཁན་ཞིག་ཡིན་པ་རེད། ཡང་ལོ་འདིའི་ཕྱི་ཟླ་ ༢  པའི་ཚེས་ ༢༥  ཙམ་ལ།    ཕ་ཡུལ་ཁམས་འབྲི་རུ་རྫོང་བརླན་ཆུ་ཤང་ནས་ཡིན་པའི་བསྟན་འཛིན་ཐབས་མཁས་ལགས་ལྷ་ས་ནས་གློ་བུར་དུ་ཉེན་རྟོག་པས་འཛིན་བཟུང་བྱས་ཡོད་འདུག  ཁོང་ལ་ནག་ཉེས་ཅི་གང་མེད་ཀྱང་། སྤྱི་ཚོགས་བརྟན་ལྷིང་དཀྲུག་མཁན་གྱི་དོགས་གཞིའི་འོག་འཛིན་བཟུང་བྱས་པ་རེད་ཅེས་བརྗོད་ཀྱི་འདུག
ཁོང་དེ་སྔོན་བོད་ལྗོངས་གསོ་རིག་སློབ་གྲྭ་ཆེན་མོ་ནས་སློབ་མཐར་ཕྱིན་ཏེ་རྗེས་སུ་བོད་ཀྱི་ས་ཁུལ་ཁ་ཤས་ལ་བོད་ཡིག་གི་དགེ་རྒན་གནང་མྱོང་ཞིང་།    དེང་སྐབས་ལྷ་སར་ཡོད་པའི་སྒེར་གཉེར་བོད་ཡིག་སློབ་གྲྭ་ཞིག་གི་དགེ་རྒན་ཡིན་པ་རེད། ཡང་ཕྱི་ཟླ་བ་ ༢ པའི་ཚེས་ ༢༦  ཙམ་ལ་འབྲི་རུ་རྫོང་འབྲི་ལུང་ཤང་ནས་ཡིན་པའི་རྒན་མགོན་པོ་ཀླུ་དབང་དང་འབྲི་རུ་རྫོང་བོམ་ཕན་ཤང་ནས་ཡིན་པའི་རྒན་མར་རིལ་པ་སངས་གཉིས་ཀྱང་ཉེས་མིང་ཅི་ཡང་མེད་པའི་ཐོག་མཉམ་དུ་ས་གནས་འབྲི་རུ་རྫོང་ནས་འཛིན་བཟུང་བྱས་ཡོད་པ་རེད།   ཁོང་གཉིས་ནི་ཁམས་འབྲི་རུ་རྫོང་ཐོག་ཏུ་སྒེར་གཉེར་བོད་ཡིག་སློབ་གྲྭའི་དགེ་རྒན་ཡིན་པ་དང་།   སློབ་གྲྭ་དེ་ནི་ཡིག་རྨོངས་མང་ཚོགས་ཚོའི་སླད་དུ་བཙུགས་པ་ཞིག་ཡིན་འདུག་པ་མ་ཟད།  སློབ་གྲྭ་དེ་གཉེར་ནས་ཕལ་ཆེར་མི་ལོ་༡༠  ཙམ་ཟིན་གྱི་ཡོད། ཕྱི་ཟླ་༣  པའི་ཚེས་༢༣  ཙམ་ལ།  ཕ་ཡུལ་ཁམས་ནགས་ཤོད་འབྲི་རུ་རྫོང་བོམ་ཕན་ཤང་ནས་ཡིན་པའི་ཚོང་པ་ཉི་མ་ཚེ་རིང་ལགས་ནག་ཉེས་ཅི་ཡང་མེད་པར་གློ་བུར་དུ་འཛིན་བཟུང་བྱས་འདུག    ཚོང་པ་ཉི་མ་ཚེ་རིག་ལགས་ནི་ཐོག་མར་ཁོང་གིས་དབྱར་རྩྭ་དགུན་འབུ་དང་ས་ཁང་ཚོང་གཉེར་བྱས་པ་དང་།   རིམ་པས་འབྲི་རུ་རྫོང་ཐོག་ཏུའང་ཐོག་བརྩེགས་ཅན་གྱི་སྤུས་ལེགས་ཟ་ཁང་དང་རྩེད་ཁང་སོགས་ཀྱང་གཉེར་ཡོད།  དེང་སྐབས་ཁོང་གིས་རྒྱ་ནག་སོགས་ལའང་དབྱར་རྩྭ་དགུན་འབུ་ཚོང་འབྲེལ་བྱས་ཏེ། ཁམས་ཁུལ་གྱི་དཔལ་འབྱོར་རྩེ་གྲས་སུ་སླེབས་པའི་ཚོང་པ་ཞིག་ཡིན་འདུག་པ་བཅས།།