༢༠༡༢ ཟླ་ ༤ ཚེས་ ༦ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༤ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཚེ་དཔག་མེད་དྭངས་མ་བཅུད་འདྲེན་གྱི་ཆོ་གའི་སྒོ་ནས་རྙིང་དགོན་འཆི་མེད་དགའ་ཚལ་གླིང་སྒ་རྗེ་ཁམས་སྤྲུལ་རིན་པོ་ཆེ་མཆོག་གིས་དབུས་འདུས་མང་ཡོངས་ནས་བརྟན་བཞུགས་བསྟར་འབུལ་ཞུས་ཡོད།
དེ་ཡང་ཐོག་མར་གོང་ཚེས་ཉིན་གྱི་སྔ་དྲོ་ཆུ་ཚོད་ ༦།༣༠ ཐོག་ཆོག་གྲྭ་ཚོགས་ཡོངས་ནས་འཆི་མེད་དྭངས་མ་བཅུད་འདྲེན་གྱི་སྒྲུབ་ཞག་སྔོན་དུ་བཏང་བའི་ཐོག་ཆུ་ཚོད་ ༧ པར་༸གོང་ས་༸སྐྱབས་མགོན་ཆེན་པོ་མཆོག་སྤྲུལ་སྐུ་ཨོ་རྒྱན་རིག་འཛིན་མཆོག་དང་སྤྲུལ་སྐུ་ཨ་བན་རིན་པོ་ཆེ་མཆོག་རྣམ་གཉིས་ཀྱིས་སྤྱན་རྒྱ་སྤོས་སྣེས་སྔོན་བསུས་ཏེ་བཞུགས་ཁྲི་རིན་པོ་ཆེར་༸ཞབས་སོར་འཁོད་དེ་རྡོ་རྗེ་སློབ་དཔོན་ཁམས་སྤྲུལ་རིན་པོ་ཆེས་མཇལ་དར་རྐྱང་འབུལ་རྗེས་ཚོགས་ཡོངས་ནས་རྒྱུན་ཕྱག་གསུམ་པ་དང་ཚིགས་བདུན་གསོལ་འདེབས་སོགས་གསུང་མུར་གསོལ་ཇ་དང་འབྲས་སིལ་འདེགས་འབུལ་ཞུས། དེ་ནས་སྟོང་ཉིད་སྙིང་རྗེ་མ་དང་དྭངས་མ་བཅུད་འདྲེན་གྱི་མཆོད་གཏོར་སྤྱི་དང་མཁའ་འགྲོའི་མཆོད་གཏོར་བྱིན་རླབས་རྗེས་མཁའ་འགྲོ་རྣམས་ཕེབས་ནས་བཞུགས་ཁྲིའི་གཡས་གཡོན་དུ་དར་སྣེ་ལྔ་འཛིན་བཞིན་ཞལ་འདོན་ཚིགས་མཚམས་དང་བསྟུན་རྡོ་རྗེ་སློབ་དཔོན་གྱི་དར་ལམ་རེ་རེ་བཞིན་བཅད་པའི་རྣམ་འགྱུར་དང་བཅས་མཁའ་འགྲོ་སོ་སོའི་མགུལ་དུ་བཅིངས་ཏེ་སྐུ་གླུད་དང་མདོས་ཀྱི་ཕྱོགས་སུ་ཕེབས། མཁའ་འགྲོ་སོ་སོར་ཚོགས་ཕུད་དང་དཀར་སྤྲོ་སྡེར་མ་རེ་དང་སྐུ་ཡོན་མཇལ་དར་སོགས་ཕུལ་རྗེས་སྐུ་གླུད་བསྔོ་བ་དང་མདོས་ཞལ་བསྒྱུར་ནས་དགུང་སྐེག་འདྲེ་ལྔ་བདུད་གཅོད་ཕྱོགས་སུ་སྐྱེལ་ཏེ་ཆོག་གྲྭས་གྲིབ་སེལ་སྐུ་ཁྲུས་ཟབ་རྒྱས་ཕུལ། དེ་ནས་བླ་མ་ལྷར་བསྐྱེད་དང་རིག་འཛིན་བརྒྱུད་བསྐུལ་གསུངས་ཏེ་ཚེ་མདའ་ཕྱག་ཏུ་ཕུལ་ནས་ཚེ་གཟུངས་གསུངས་སྐབས་སློབ་དཔོན་གྱིས་སྐུ་ཕྱག་དང་བཅས་ཚེ་བུམ། ཚེ་ཆང། ཚེ་རིལ། ཚེ་མདའ། ལས་བཞིའི་འབྲང་རྒྱས་སོ་སོར་འབུལ་ལམ་ཞུས་ཏེ་བྱང་འདྲེན་སྐུ་འཁོར་གྱིས་སྐུ་ཕྱག་བཅས་མཎྜལ་མགོ་བསྐུལ་དང་མཎྜལ་རྒྱས་པ་ཕུལ་ཟིན་སྐབས་སློབ་དཔོན་གྱི་སྐུ་ཚབ་སྤྲུལ་སྐུ་ཨོ་རྒྱན་རིག་འཛིན་ལགས་ཀྱིས་མནྜལ་ལྗགས་བཤད་ཞུས། དེ་རྗེས་སྐུ། གསུང། ཐུགས། ཡོན་ཏན། འཕྲིན་ལས་རྟེན་བཅས་འབུལ་ལམ་ཞུས། འོད་གསལ་རྡོ་རྗེ་རིན་པོ་ཆེ་མཆོག་གིས་སྐུའི་དབུ་པཎ་ནས་ཞབས་ཆག་བར་ན་བཟའ་ཆ་ཚང་དང་། བཀྲིས་རྟགས་བརྒྱད། སྣ་བདུན། རྗས་བརྒྱད་བཅས་རིམ་བཞིན་འདེགས་འབུལ་གྱི་ཞལ་ཟས་ཚོགས་འཁོར་ཕུལ་སྐབས་གསོལ་ཇ་གཉིས་པ་ཕེབས། སྐབས་དེར་བསམ་པ་ལྷུན་གྲུབ་དང་བར༌ཆད་ལམ་སེལ་གསུང་བཞིན་འབུལ་དངོས་རྣམས་སྤྱན་བསྟར་ཞུས་མཚམས་གཏང་རག་མཎྜལ་མགོ་བསྐུལ་རྗེས་སྤྲུལ་སྐུ་ཨ་བན་རིན་པོ་ཆེ་ནས་མཎྜལ་རྟེན་གསུམ་བཏེགས་ཏེ་ཞབས་བརྟན་གསུང་མུར་ཁམས་སྤྲུལ་རིན་པོ་ཆེའི་ནང་མི་དང་གྲྭ་འཁོར་ཆེ་ཆུང་ཚང་མར་མཇལ་ཁ་སྩལ་གྲུབ་རྗེས་བཀྲ་ཤིས་སྨོན་ལམ་དང་བསྟན་རྒྱས་སྨོན་ལམ་བཅས་གསུང་ཏེ་ཀ་ཁྲི་སྒྲོགས་ཡོད།
༸གོང་ས་༸སྐྱབས་མགོན་ཆེན་པོ་མཆོག་གིས་རྙིང་དགོན་འཆི་མེད་དགའ་ཚལ་གླིང་སྒ་རྗེ་ཁམས་སྤྲུལ་རིན་པོ་ཆེའི་གདན་སར་༸རྒྱལ་མཆོག་ལྔ་པ་ཆེན་པོའི་དག་སྣང་གསང་བ་རྒྱ་ཅན་གྱི་བདེ་གཤེགས་སྒྲུབ་པ་བཀའ་བརྒྱད་ཞི་ཁྲོའི་བཀའ་དབང་དང་། ཚེ་དབང་། དེ་བཞིན་མགོན་པོ་གང་ཉིད་མཆོག་སྐུ་ཚེ་བསྐལ་བརྒྱར་བརྟན་ཆེད་ཚེ་དཔག་མེད་དྭངས་མ་བཅུད་འདྲེན་གྱི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་པ་བཅས་ཉིན་གསུམ་གྱི་ཆོས་འབྲེལ་ཁག་ལེགས་པར་གྲུབ་སྟེ་བཞུགས་སྒར་ཕོ་བྲང་དུ་ཆིབས་ཞལ་བསྒྱུར་བ་བཅས།།