༢༠༡༢ ཟླ་ ༤ ཚེས་ ༣ རེས་གཟའ་མིག་དམར།
༄༅།  །འདི་གའི་ཕྱི་དྲིལ་བོད་ཡིག་ཚན་པའི་སྤྱི་ཁྱབ་རྩོམ་སྒྲིག་པ་སྐལ་བཟང་མཁས་གྲུབ་ལགས་ཀྱིས་གུ་རུའི་གནས་མཆོག་མཚོ་པདྨ་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༤ ཚེས་ ༢ ཉིན་གྱི་ཕྱེད་ཡོལ་ཆུ་ཚོད་ ༡།༣༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གུ་རུའི་གནས་མཆོག་མཚོ་པདྨར་གསར་དུ་བཞེངས་པའི་ཟངས་མདོག་དཔལ་རིའི་ཕོ་བྲང་གི་དགོན་དེའི་དབུ་བླ་རི་མགོ་རིན་པོ་ཆེ་མཆོག་དང་དགེ་བསྐོས་ཀྱིས་སྤོས་སྣེ་དང་དགེ་འདུན་པ་རྣམས་ཀྱིས་མཆོད་རྫས་སྣ་ཚོགས་ཐོགས་ཏེ་གཟིམ་ཆུང་ནས་ཟངས་མདོག་དཔལ་རིའི་ཕོ་བྲང་རྟེན་དང་བརྟེན་པ་བཅས་པ་གསར་བཞེངས་ལེགས་པར་གྲུབ་པའི་དབུ་འབྱེད་མཛད་སྒོར་གདན་ཞུས་ཀྱིས་ཐོག་མར་ལྷ་སྒོའི་དར་མཚོན་གཅོད་འབྲེག་བཀྲིན་ཆེ་བ་བསྐྱངས།
དེ་ནས་གཙུག་ལག་ཁང་དུ་གདན་ཞུས་ཀྱིས་སྣང་གསལ་ཞལ་འབྱེད་དང་ཕོ་བྲང་དང་ལྷ་ཁང་ཁག་ལ་གནས་གཟིགས་བཀའ་དྲིན་བསྐྱངས། དེ་རྗེས་༸གོང་ས་མཆོག་ལྷ་ཁང་དེའི་བཞུགས་ཁྲིར་༸ཞབས་སོར་འཁོད་བསྟུན་དབུ་མཛད་ཀྱིས་ཞལ་འདོན་གསུང་བསྐུལ་དང་། དགོན་དེའི་དབུ་བླ་རི་མགོ་རིན་པོ་ཆེ་མཆོག་གིས་མགོན་པོ་གང་ཉིད་མཆོག་ལ་མཎྜལ་རྟེན་གསུམ་འདེགས་འབུལ་ཞུས།  དེ་ནས་གསོལ་ཇ་དང་འབྲས་སིལ་འདེགས་འབུལ་ཞུས་རྗེས་རི་མགོ་རིན་པོ་མཆོག་གིས་ཟངས་མདོག་དཔལ་རི་བཞེངས་དགོས་པའི་དམིགས་ཡུལ་དང་ལོ་རྒྱུས་མདོར་བསྡུས་སྙན་སྒྲོན་ཞུས་པ་དང་དབྱིན་དྲུང་སློབ་དཔོན་ཀུན་བཟང་རྡོ་རྗེ་ལགས་ཀྱིས་དབྱིན་ཡིག་ཐོག་ནས་ལོ་རྒྱུས་རྣམས་སྙན་སྒྲོན་ཞུས།
མཚམས་འདིར་བོད་མིའི་སྒྲིག་འཛུགས་ཆོས་རིག་བཀའ་བློན་པདྨ་ཆོས་འབྱོར་མཆོག་གིས་བཀའ་ཤག་གི་ཚབ་ཞུས་ཏེ་འཚམས་འདྲིའི་བཀྲ་ཤིས་བདེ་ལེགས་ཞུས་པ་དང་སྦྲགས་གསུང་བཤད་གནང་དོན། རི་མགོ་སྤྲུལ་སྐུ་རིན་པོ་ཆེ་མཆོག་གིས་སྐུ་ངལ་འཛེམས་མེད་ཐོག་ཐུགས་ཁུར་ཆེན་པོས་ཟངས་མདོག་དཔལ་རིའི་ཕོ་བྲང་དང་སྒྲུབ་ཁང་བསམ་གྱིས་མི་ཁྱབ་པ་བཞེངས་པ་འདི་ནི་གཟི་བརྗིད་དང་བྱིན་རླབས་ཆེན་པོ་ཞིག་རེད་བསམ་བཞིན་ཡོད། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་ཆིབས་སྒྱུར་བསྐྱངས་ཏེ་རབ་གནས་དང་དབུ་འབྱེད་མཛད་སྒོར་རང་ཉིད་བཅར་རྒྱུ་བྱུང་བ་ཧ་ཅང་སྐལ་པ་བཟང་པོ་བྱུང་། ང་རང་ཆོས་རིག་བཀའ་བློན་ལ་འཁོད་རྗེས་འཛམ་གླིང་ནང་དུ་ནང་པའི་ཆོས་ཚོགས་ཁག་ལ་འབྲེལ་བ་བྱེད་སྐབས་བདུན་བརྒྱ་ལྷག་ཙམ་ཞིག་འདུག་པས་དེ་དག་གི་ཁ་བྱང་བླངས་པ་ཡིན། ནང་ཆོས་སྤེལ་ས་ཕྱི་རྒྱལ་ཡུལ་དང་ནང་ཆོས་ཉན་མཁན་དེ་དག་ཕྱི་རྒྱལ་གྱི་མི་རེད། ཕྱི་ལོ་ ༡༩༥༩ སྔོན་ལ་ལུང་པ་དེ་དག་གི་མིས་བོད་ཅེས་པ་དེ་གོ་མྱོང་ཡོད་ཀྱི་མ་རེད་སྙམ་གྱི་ཡོད། འོན་ཀྱང་ད་ཆ་ནང་ཆོས་ཀྱི་བཀའ་དྲིན་ལ་བརྟེན་ནས་བོད་ཅེས་པ་དང་ནང་ཆོས་ཞེས་པ་ཡོངས་གྲགས་སུ་གྱུར་ཡོད། དེ་ནི་གཙོ་བོ་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་རྗེ་བཀའ་དྲིན་ཉག་གཅིག་རེད། འཛམ་གླིང་འདིའི་སྟེང་བླ་ཆེན་མང་པོ་ཡོད་ཀྱང་༸གོང་ས་མཆོག་ལྟ་བུ་གཅིག་ཀྱང་མེད་ལ་མ་འོངས་པར་ཡང་ཕལ་ཆེར་ཡོང་གི་མ་རེད་བསམ་བཞིན་ཡོད། མགོན་པོ་གང་ཉིད་མཆོག་གིས་འཛམ་གླིང་གང་སར་ཆིབས་སྒྱུར་བསྐྱངས་ཏེ་བཀའ་སློབ་སྩལ་བའི་བཀའ་དྲིན་ལ་བརྟེན་བོད་ཀྱི་གནད་དོན་ཐད་རྒྱབ་སྐྱོར་ཆེ་བ་འཐོབ་བཞིན་ཡོད། རྒྱ་ནག་དམར་པོའི་གཞུང་ནས་གང་བཤད་ཀྱང་ང་ཚོའི་བདེན་པ་གསལ་དུ་འགྲོ་བཞིན་པ་དང་གཟི་བརྗིད་ཆེ་རུ་འགྲོ་བཞིན་ཡོད། དེ་བཞིན་ད་ལྟའི་ཆར་བླ་ཆེན་དང་སྐྱེས་མཆོག་མང་པོ་བཞུགས་ཡོད་པའི་སྐབས་འདིར་སྔར་ལས་ལྷག་པའི་ཆོས་ལུགས་མཐུན་སྒྲིལ་གཟི་བརྗིད་ལྡན་པ་ཞིག་དང་སློབ་གཉེར་བྱས་ན། མ་འོངས་པར་བོད་བསྟན་པ་ཆབ་སྲིད་ལ་ཕན་གྱི་རེད་བསམ་བཞིན་ཡོད། ཅེས་སོགས་ཀྱི་གསུང་བཤད་གནང་ཡོད།
དེ་རྗེས་སྔ་འགྱུར་མཐོ་སློབ་ཁང་དེའི་མཁན་སློབ་བསླབ་པ་མཐར་སོན་རྣམས་ལ་ཆོས་རིག་བཀའ་བློན་མཆོག་གིས་ཕྱག་འཁྱེར་གནང་ཡོད། དེ་ནས་༸གོང་ས་མཆོག་གིས་ཟངས་མདོག་དཔལ་རིའི་སྦྱིན་བདག་བཟའ་ཚང་གཉིས་དང་འཆར་འགོད་པ། ལྷ་བཟོ་བ། ལས་དཔོན་བཅས་ལ་ལེགས་སྐྱེས་གསོལ་རས་སྩལ་རྗེས་བཀའ་སློབ་བཀའ་དྲིན་ཆེ་བ་སྩལ་ཡོད། དབུ་འབྱེད་མཛད་སྒོ་ཡོངས་སུ་ལེགས་གྲུབ་པར་བསྟུན་ཀུན་བཟང་བསྟན་འཛིན་རིན་པོ་ཆེ་མཆོག་གིས་བཀའ་དྲིན་གཏང་རག་གི་མཎྜལ་རྟེན་གསུམ་འདེགས་འབུལ་ཞུས་པ་དང་ལྷན་འབུལ་དངོས་རྣམས་སྤྱན་བསྟར་ཞུས། དེ་ནས་དབུ་མཛད་ཀྱིས་གསུང་བསྐུལ་གནང་སྟེ་མཆོག་གསུམ་ཤིས་བརྗོད་སྒོ་ནས་བདེ་ལེགས་ཀྱི་སྣང་བས་ཁྱབ་པར་མཛད། མཁན་པོ་ཨོ་རྒྱན་རིག་འཛིན་མཆོག་གིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་ལེགས་པར་གྲུབ་སྟེ་༸གོང་ས་མཆོག་སྤྱན་རྒྱ་སྤོས་སྣེས་གཟིམ་ཆུང་དུ་གདན་འདྲེན་ཞུས་རྗེས་མདུན་ཐང་དུ་དགེ་འདུན་པ་རྣམས་ཀྱིས་བཀྲ་ཤིས་རོལ་འཆམ་དང་། འབྲུག་ནས་ཆེད་དུ་བཅར་བའི་གཞོན་ནུ་ཕོ་མོ་རྣམས་ཀྱིས་བཀྲ་ཤིས་པའི་ཞབས་བྲོ་གཟིགས་འབུལ་ཞུས་ཡོད།  ཆུ་ཚོད་ ༣ ཐོག་༸གོང་ས་༸སྐྱབས་མགོན་ཆེན་པོ་མཆོག་ཟ་ཧོར་མཚོ་པདྨ་ཅན་ཨོ་རྒྱན་ཧེ་རུའི་ཕོ་བྲང་ངམ་རྙིང་མའི་དགོན་དུ་ཚེས་བཅུའི་ཚོགས་མགོན་དུ་དབུ་བཞུགས་ཀྱིས་ཚེས་བཅུའི་གསུང་ཚོགས་གསུང་འདོན་མཛད་ཡོད།
ཐེངས་འདིའི་ཟངས་མདོག་དཔལ་རིའི་ཕོ་བྲང་དབུ་འབྱེད་མཛད་སྒོའི་སྐུ་མགྲོན་དུ་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་མཆོག་དང་བདེ་སྲུང་བཀའ་བློན་མཆོག  དེ་བཞིན་བོད་མི་མང་སྤྱི་འཐུས་ཚོགས་གཙོ་མཆོག་དང་ཚོགས་གཞོན་མཆོག གཞན་ཡང་སྤྱི་འཐུས་ཁག་གཅིག་དང་དྲུང་ཆེ་ཁག་གཅིག  དེ་མིན་དགོན་དེའི་དབུ་བླ་རི་མགོ་སྤྲུལ་སྐུ་མཆོག་དང་རྫོང་ནང་ཡང་སྲིད་རིན་པོ་ཆེ་མཆོག མཁོ་ཁྱེམ་རིན་པོ་ཆེ་མཆོག སྤྲུལ་སྐུ་ཀུན་བཟང་དང་ཉི་གྲགས་སོགས་བཅར་འདུག་པ་བཅས།།