༢༠༡༢ ཟླ་ ༤ ཚེས་ ༢ རེས་གཟའ་ཟླ་བ།
༄༅། །ཨ་རིའི་གྲོས་ཚོགས་གོང་མའི་(Senate)ནང་བོད་དོན་ལ་རྒྱབ་སྐྱོར་གྱིས་དོན་ཚན་དྲུག་ཅན་གྱི་གྲོས་ཆོད་བཞག་ཡོད་པ་ནི་གཤམ་གསལ།
༡༽ རང་ལུས་མེར་སྲེག་བཏང་བའི་བོད་མི་རྣམས་ལ་གདུང་སེམས་མཉམ་སྐྱེའི་མྱ་ངན་གུས་འདུད་ཞུ་རྒྱུ་དང། བོད་མིའི་ཐོག་དམ་བསྒྲགས་ཅན་གྱི་སྲིད་བྱུས་བཟུང་དང་འཛིན་བཞིན་ཡོད་པར་་བློ་འགྱོད་བྱ་རྒྱུ།
༢༽ རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་མིའི་ཆོས་ཕྱོགས་ཀྱི་ལས་དོན་ཐད་དམ་བསྒྲགས་དང་ཐེ་བྱུས་བྱ་རྒྱུའི་སྲིད་བྱུས་འཕྲལ་མར་མཚམས་འཇོག་གིས་བོད་ཀྱི་ས་ཁུལ་ཁག་ཏུ་ཆོས་དང་བདེ་འཇགས་ཀྱི་སྲིད་བྱུས་ལ་བསྐྱར་ཞིབ་གནང་དགོས་པ་མ་ཟད།  བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་གྲོས་མོལ་བསྐྱར་གསོ་གནང་དགོས།
༣༽ རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བཙན་དབང་འོག་བཀག་ཉར་བྱས་པ་ཚང་མ་གློད་བཀྲོལ་གཏོང་དགོས་པ་དང། ཞི་རྒོལ་བྱེད་མཁན་རྣམས་ལ་འཇིགས་བསྐུལ་དང་བསུན་གཙེ་བཟོ་རྒྱུ་མཚམས་འཇོག་གིས་འགོག་རྐྱེན་གང་ཡང་མེད་པའི་ཐོག་ནས་བོད་ནང་དུ་རྒྱལ་སྤྱིའི་གསར་འགོད་པ་དང། གཞུང་འབྲེལ་མི་སྣ། ཕྱི་རྒྱལ་སྐུ་ཚབ་འཐུས་མི། དེ་བཞིན་རྒྱལ་སྤྱིའི་ཚོགས་པ་ཁག་གི་སྐུ་ཚབ་འཐུས་མི་རྣམས་ཆེད་གཏོང་དགོས་པ།
༤༽  བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་ཆབ་སྲིད་སྐུ་དབང་ཡོངས་རྫོགས་མི་མང་གིས་འོས་འདེམས་བྱས་པའི་དབུ་ཁྲིད་ལ་རྩིས་སྤྲོད་མཛད་དེ་བོད་མི་ཚོ་ཡང་དག་པའི་མང་གཙོའི་ལམ་ལུགས་ཐོག་ཁྲིད་གནང་མཛད་པའི་མཛད་རྗེས་ལ་བསྔགས་བརྗོད་ཞུ་རྒྱུ།
༥༽ ཕྱི་ལོ་ ༢༠༡༡ ཟླ་ ༣ ཚེས་ ༢༠ ཉིན་བོད་མི་བཙན་བྱོལ་བ་རྣམས་ཀྱིས་དྲང་བདེན་དང་རྒྱལ་སྤྱིའི་གནས་བབ་ལྡན་པའི་མང་གཙོའི་འོས་ཤོག་འཕེན་རྒྱུའི་ལས་འགུལ་ཐོག་མཉམ་ཞུགས་གནང་བར་བསྔགས་བརྗོད་ཞུ་རྒྱུ།
༦༽ བོད་མི་དང་ཨ་རིའི་མི་མང་དབར་གྱི་མཛའ་བརྩེའི་འབྲེལ་ལམ་བསྐྱར་དུ་སྲ༌བརྟན་གཏོང་རྒྱུ་བཅས་སོགས་འཁོད་ཡོད། སྐབས་དེར་གྲོས་ཚོགས་གོང་མའི་འཐུས་མི་ལྕམ་སྐུ་ཌིན་ཕ་ཡིན་སེ་ཝེན་(Dianne Feinstein)མཆོག་གིས་གསུང་དོན། བོད་མི་ཚོས་ཆོས་དད་དང་རིག་གཞུང་བདག་གཅེས་བྱ་རྒྱུར་འཐབ་རྩོད་བྱེད་བཞིན་པར་ང་ཚོས་མཐའ་གཅིག་ཏུ་རྒྱབ་སྐྱོར་ཞུ་རྒྱུ་ཡིན་ཞེས་གྲོས་ཚོགས་གོང་མ་བརྒྱུད་བརྡ་ལན་གསལ་པོ་བཏང་ཡོད། རྒྱ་ནག་གཞུང་གིས་བརྡ་ལན་དེར་ཉན་འཇོག་བྱས་ནས་བོད་མི་ཚོར་དམ་བསྒྲགས་ཅན་གྱི་སྲིད་བྱུས་ལག་བསྟར་བྱ་རྒྱུ་མཚམས་འཇོག་བྱེད་དགོས།  བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་རང་བཙན་རྩོད་གནང་མཛད་ཀྱི་མེད། དེར་བརྟེན་ངས་གྲོས་ཆོད་འདིའི་བརྒྱུད་ནས་རྒྱ་ནག་སྲིད་གཞུང་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་འབྲེལ་མོལ་གནང་སྟེ་བོད་མི་ཚོའི་དངོས་ཡོད་དཀའ་ངལ་སེལ་ཐབས་ཡོང་རྒྱུར་མཐའ་གཅིག་ཏུ་རེ་བ་ཞུ་བཞིན་ཡོད། ཅེས་གསུངས་ཡོད། དེ་བཞིན་འཐུས་མི་ཇོ་སེབ་ལི་བྷར་མན་(Joseph Lieberman)མཆོག་གིས་གསུང་དོན། བཙན་བྱོལ་བོད་མི་ཚོས་བྱུང་རབས་ལོ་རྒྱུས་ལྡན་པའི་འོས་ཤོག་འཕེན་པར་བརྟེན་བོད་མི་ཤེས་འཇོན་ལྡན་པའི་འགོ་ཁྲིད་གཅིག་བདམས་ཐུབ་པར་གྲོས་ཚོགས་ནས་གྲོས་ཆོད་འདི་བརྒྱུད་ངོས་འཛིན་གནང་ཡོད།  འོན་ཀྱང་སྟབས་མ་ལེགས་པ་ཞིག་ལ་བོད་ནང་དུ་ཡོད་པའི་བོད་མི་ཚོས་དཀའ་སྡུག་ཧ་ཅང་མྱངས་དང་མྱོང་བཞིན་ཡོད་པར་བརྟེན་ནས་རང་ལུས་མེར་སྲེག་གཏོང་དགོས་ཐུག་ཡོད། ཅེས་གསུངས། གོང་བརྗོད་གྲོས་ཚོགས་འཐུས་མི་གཉིས་དང་གྲོས་ཆོད་དེར་རྒྱབ་སྐྱོར་གནང་མཁན་གྱི་གྲོས་ཚོགས་འཐུས་མི་གཞན་རྣམས་ནི་སྐུ་ཞབས་མར་ཀོ་རུ་བྷི་ཡོ་(Marco Rubio)མཆོག་དང་བྷར་བྷར་ར་མཆོག(Barbara Boxer) ཌིཀ་ཌར་བྷིན་མཆོག(Dick Durbin) ཇོན་མེཀ་ཀེན་མཆོག(John McCain) ཇིམ་ཝེབ་མཆོག(Jim Web) མག་ཨུ་ཌཱལ་མཆོག(Mark Udall) བྷེན་ཀར་ཌིན་མཆོག(Ben Cardin) པེ་ཊིག་ལི་ཧེ་མཆོག(Patrick Leahy)
རོ་བྷཌ་མན་ནེ་ཌེ་ཛི་མཆོག(Robert Menendez) ཊོམ་ཨུ་ཌཱ་(Tom Udall)བཅས་ཡིན་འདུག
དེ་ཡང་སྔ་ལོ་ཕྱི་ཟླ་ ༧ ནང་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་རྒྱལ་ས་ཝ་ཤིང་ཊོན་དུ་ཆིབས་སྒྱུར་བསྐྱངས་སྐབས་བཀའ་ཁྲི་བློ་བཟང་སེང་གེ་མཆོག་ཀྱང་ཆེད་བཅར་ཞུས་ཏེ་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་འཐུས་མི་ཇོན་ཀེ་རི་(John Kerry)མཆོག་དང་མཇལ་འཕྲད་གནང་སྟེ་བོད་ནང་གི་ད་ལྟའི་ཛ་དྲག་གནས་སྟངས་ཐོག་གྲོས་ཚོགས་ནང་གྲོས་ཆོད་འཇོག་རྒྱུའི་རྒྱབ་སྐྱོར་གནང་རོགས་ཞེས་འབོད་སྐུལ་ཞུས་ཡོད་པ་བཅས།།