༢༠༡༢ ཟླ་ ༤ ཚེས་ ༢ རེས་གཟའ་ཟླ་བ།
༄༅། །ཕྱི་དྲིལ་སྒྲ་བརྙན་ཚན་པའི་གསར་འགོད་པ་རྣམ་རྒྱལ་ཚེ་དབང་ལགས་ཀྱིས་ཉི་ཧོང་ནས་བཏང་གནས་ནང་འཁོད་དོན། བཀའ་བློན་ཁྲི་པ་མཆོག་གི་ཉི་འོང་ནང་ཉིན་ལྔའི་ལས་འཆར་དབུ་འཛུགས་གནང་ཡོད་པ་རེད། ཕྱི་ལོ་ ༢༠༡༢ ཟླ་ ༤ ཚེས་ ༡ ཉིན་གྱི་སྔ་དྲོ་བཀའ་ཁྲི་མཆོག་གིས་ཐོག་མར་ཉི་འོང་གི་གསར་ཤོག་སྙན་གྲགས་ཆེ་བ་ཁག་གཉིས་ཀྱི་བཅར་འདྲིར་ལན་འདེབས་གནང་ཡོད། དེ་ཡང་བཅར་འདྲིའི་ནང་དོན་གཙོ་བོ་ནི་རྒྱ་ནག་གི་འགོ་ཁྲིད་གསར་པ་རྣམས་ལ་ཐུགས་རེ་གང་ཞིག་གནང་གི་ཡོད་པ་དང༌། བཀའ་ཤག་སྐབས་བཅུ་བཞི་པའི་ལས་དོན་གཙོ་ཆེ་ཁག དེ་བཞིན་བཙན་བྱོལ་བོད་མིའི་ཆབ་སྲིད་འཕོ་འགྱུར་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གནས་བབ། བོད་ནང་ད་བར་རང་ལུས་མེར་བཏང་བའི་ལས་འགུལ་ཐོག་བཀའ་ཤག་གི་གཟིགས་ཚུལ་གང་འདྲ་ཡོད་སྐོར་སོགས་ཡིན་འདུག ཕྱེད་ཡོལ་བཀའ་ཁྲི་མཆོག་གིས་ཐོག་མར་ཉི་འོང་དུ་གནས་སྡོད་བོད་མི་ཚོར་ཐུག་འཕྲད་གནང་སྟེ་ད་ལྟའི་བོད་ནང་གི་ཛ་དྲག་གནས་སྟངས་ངོ་སྤྲོད་དང༌། བོད་མིའི་སྒྲིག་འཛུགས་ཀྱི་ཆབ་སྲིད་འཕོ་འགྱུར་སྐོར། བོད་ཀྱི་ཛ་དྲག་གནས་སྟངས་སྐབས་ཚང་མས་མཐུན་སྒྲིལ་རྡོག་རྩ་ཆིག་སྒྲིལ་བྱེད་གལ། བོད་ཀྱི་རྩ་དོན་ཐོག་ཕྱར་གྲུ་མཉམ་འདེགས་གནང་རྒྱུ་གལ་ཆེན་ཡིན་སྐོར་སོགས་ཀྱི་གསུང་བཤད་གནང་བ་དང་ཆབས་ཅིག་ཉི་འོང་གཞུང་མང་གཉིས་ནས་ད་བར་བོད་དོན་ཐོག་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་དང༌། མ་འོངས་པར་མུ་མཐུད་རྒྱབ་སྐྱོར་ཡོང་བའི་ཆེད་དུ་བཅར་བ་ཡིན་སྐོར་འགྲེལ་བརྗོད་ཀྱང་གནང་ཡོད།
ཐེངས་འདིའི་བཀའ་བློན་ཁྲི་པ་མཆོག་གིས་བཀའ་ཁྲིའི་འགན་འཁུར་བཞེས་རྗེས་ཨེ་ཤི་ཡའི་ཕྱི་རྒྱལ་ཁབ་ནང་ཕེབས་ཐེངས་དང་པོ་དེ་ཆགས་ཡོད། གཞན་ཡང་དེ་ཉིན་དགོང་མོ་ཉི་འོང་སྐུ་ཚབ་དོན་གཅོད་ལས་ཁུངས་ནས་བཀའ་ཁྲི་མཆོག་ལ་ཕེབས་བསུའི་གསོལ་སྟོན་ཞིག་བཤམས་ཡོད་པ་དེའི་ཐོག་རྒྱལ་ས་ཊོཀ་ཁྱོའི་ཉེ་ཁུལ་གྱི་བོད་དོན་རྒྱབ་སྐྱོར་བ་དང་བོད་རིགས་ཚོགས་པ་སོགས་སྐུ་མགྲོན་མི་སྣ་ ༢༠༠ ཙམ་ཞིག་ནས་མཉམ་ཞུགས་གནང་ཡོད།
བཀའ་བློན་ཁྲི་པ་མཆོག་གིས་གསོལ་སྟོན་ཐོག་བོད་ནང་གི་ད་ལྟའི་ཛ་དྲག་གནས་སྟངས་སྐོར་དང༌། ཉི་འོང་གཞུང་མང་ཡོངས་ནས་ད་བར་ལྷག་བསམ་རྣམ་དག་གིས་བོད་དོན་ཐོག་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་ལྷན་མ་འོངས་པར་མུ་མཐུད་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུས་རྗེས་སྐུ་མགྲོན་མི་སྣ་རེ་རེར་མཇལ་མོལ་དང་སྐུ་པར་བསྒྲོན་ཡོད་པ་བཅས། །
