ཕྱི་ལོ་ ༢༠༠༨ ཟླ་ ༩ ཚེས་ ༢༤ རེས་གཟའ་ལྷག་པ།
༄༅། །རྒྱལ་སྤྱིའི་གསར་ལམ་ཁག་ནས་གནས་ཚུལ་སྤེལ་བར་གཞིགས་ན། ཨ་རིའི་སྲིད་འཛིན་ཇོར་ཇི་བུ་ཤུ་(George Bush)མཆོག་ནས་ཕྱི་ལོ་ ༢༠༠༨ ཟླ་ ༩ ཚེས་ ༢༣ རེས་གཟའ་མིག་དམར་ཉིན་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཞལ་པར་ཕུལ་ཏེ། ༸གོང་ས་༸སྐྱབས་མགོན་ཆེན་པོ་མཆོག་སྐུ་ཁམས་གང་འདྲ་ཡོད་མེད་བཀའ་དྲི་ཞུས་ཡོད་པ་དང་སྦྲགས་སྲིད་འཛིན་སྐུ་ཉིད་ནས་༸གོང་ས་༸སྐྱབས་མགོན་ཆེན་པོ་མཆོག་ལ་གུས་བརྩི་ཧ་ཅང་ཆེན་པོ་ཞུ་གི་ཡོད་པས་གང་ཉིད་ཀྱི་སྐུ་ཁམས་ལ་ཐུགས་འཚབ་ཧ་ཅང་ཆེན་པོ་ཡོད། ཅེས་གསུངས་སྐོར་སྲིད་འཛིན་གྱི་ལས་ཁུངས་ཕོ་བྲང་དཀར་པོ་ནས་གསལ་བསྒྲགས་གནང་ཡོད་པ་རེད།
དེ་ཡང་ཕྱི་ལོ་ ༢༠༠༨ ཟླ་ ༩ ཚེས་ ༢༣ རེས་གཟའ་མིག་དམར་ཉིན་ཕོ་བྲང་དཀར་པོའི་མགྲིན་ཚབ་པ་སྐུ་ཞབས་གོར་ཌོན་ཇོན་ཌོརིཡ་(Gordon Johndroe)ནས་གསར་འགོད་པ་ཚོར་གཏམ་བཤད་གནང་དོན། སྲིད་འཛིན་བུ་ཤུ་མཆོག་ནས་དེ་རིང་སྔ་དྲོ་བོད་མིའི་༸སྐྱབས་མགོན་ཏཱ་ལའི་བླ་མ་མཆོག་ལ་ཞལ་པར་ཕུལ་ཏེ་ཏཱ་ལའི་བླ་མ་མཆོག་གི་སྐུ་ཁམས་ལ་ཐུགས་འཚབ་ཡོད་ཅེས་ཞུས་ཡོད་པ་རེད། ཅེས་དང་། ཐེངས་འདིར་སྲིད་འཛིན་བུ་ཤུ་མཆོག་གིས་ཞལ་པར་ཕུལ་བ་དེའི་ཐོག་ནས་སྲིད་འཛིན་སྐུ་ཉིད་དང་ཨ་མི་རི་ཁའི་མི་མང་གིས་བོད་མིའི་སྐྱབས་མགོན་ཏཱ་ལའི་བླ་མ་མཆོག་ལ་གུས་བརྩི་དང་ཆེ་མཐོང་ཆེན་པོ་གང་ཙམ་གནང་གི་ཡོད་པ་དེ་གསལ་པོ་མཚོན་པ་རེད། ཅེས་གསུངས་ཡོད་པ་རེད།
ཁོང་གིས་མུ་མཐུད་གསུང་དོན། བོད་མིའི་༸སྐྱབས་མགོན་ཏཱ་ལའི་བླ་མ་མཆོག་ནི་འཛམ་གླིང་ཐོག་མཚན་སྙན་གྲགས་ཤིན་ཏུ་ཆེན་པོ་ཡོད་པའི་ཆོས་ཕྱོགས་ཀྱི་དབུ་ཁྲིད་ཅིག་ཡིན་པ་མ་ཟད། ནོ་བེལ་ཞི་བདེའི་གཟེངས་རྟགས་དང་། ཨ་མི་རི་ཁའི་གྲོས་ཚོགས་ཀྱི་གསེར་གྱི་གཟེངས་རྟགས་བཅས་རྒྱལ་སྤྱིའི་གཟེངས་ཕུད་ཀྱི་བྱ་དགའ་མང་པོ་བཞེས་མྱོང་མཁན་རླབས་ཆེན་གྱི་དབུ་ཁྲིད་ཅིག་ཡིན་པ་དང་། དེ་བཞིན་གལ་ཆེའི་རིག་གཞུང་གི་མཚོན་དོན། འགྲོ་བ་མིའི་ཐོབ་ཐང་གི་སླད་དུ་སྐུ་ངལ་འཛད་མེད་སྐྱོན་མཁན་གྱི་དབུ་ཁྲིད་ཅིག་ཀྱང་རེད། ཅེས་ཕོ་བྲང་དཀར་པོའི་མགྲིན་ཚབ་པས་འགྲེལ་བརྗོད་གནང་འདུག
