༢༠༡༢ ཟླ་ ༣ ཚེས་ ༢༦ རེས་གཟའ་ཟླ་བ།
༄༅། །འདི་གར་ཆེས་མཐོའི་ཁྲིམས་ཞིབ་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༣ ཚེས་ ༢ ནས་ ༡༩ བར་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གིས་ས་གནས་ཁྲིམས་ཁང་སོ་སོའི་ཁྱབ་ཁོངས་མང་ཚོགས་ལ་ཁྲིམས་ལུགས་གོ་རྟོགས་སྤེལ་དགོས་པའི་བཀོད་ཁྱབ་གཞིར་བཟུང་། ལྷོ་ཕྱོགས་ས་གནས་ཁྲིམས་ཞིབ་པ་རྣམ་རྒྱལ་ཚེ་སྐྱིད་ལགས་ཀྱིས་ལྷོ་གཞིས་ཁག་བཞིར་སྐོར་བསྐྱོད་ཀྱི་ལས་དོན་མཇུག་བསྒྲིལ་འདུག
དེ་ཡང་ཕྱི་ཚེས་ ༢ ནས་ ༩ བར་ས་གནས་ཁྲིམས་ཞིབ་པ་རྣམ་རྒྱལ་ཚེ་སྐྱིད་ལགས་ཀྱིས་སྦེལ་ཀོབ་བདེ་སླར་དང་། ལུགས་བསམ་གཞིས་ཆགས་གཉིས་ཀྱི་གྲོང་སྡེ་ཁག བོད་ཁྱིམ། རྣམ་གྲོལ་གླིང་དགོན་པ་སོགས་ཚོགས་ཡུལ་ཁག་དྲུག་ཏུ་སེར་སྐྱ་མང་ཚོགས་མི་གྲངས་ ༡༢༥༠ བརྒལ་བ་དང་། ཕྱི་ཚེས་ ༡༢ ནས་ ༡༥ བར་ཧོན་སུར་རབ་རྒྱས་གླིང་དུ་རྒྱུད་སྨད་གྲྭ་ཚང་དང་། རྫོང་ཁ་ཆོས་སྡེ། གྲོང་སྡེ་ཁག་བཅས་ཚོགས་ཡུལ་བདུན་དུ་སེར་སྐྱ་མི་གྲངས་ ༢༦༥ ཙམ། དེ་བཞིན་ཕྱི་ཚེས་ ༡༦ ནས་ ༡༨ བར་ཀོ་ལི་གྷལ་དོན་ལྡན་གླིང་གྲོང་སྡེ་ཁག་དང་།
ཉིན་སློབ་བཅས་ཚོགས་ཡུལ་ཁག་བཞིར་མང་ཚོགས་ཁྱོན་གྲངས་ ༨༣༧ བཅས་སོ་སོར་བཙན་བྱོལ་བོད་མིའི་ཁྲིམས་ལུགས་དབང་འཛིན་གྱི་སྐོར་སྤྱི་དང་། བྱེ་བྲག་གཞི་རྩའི་ཆ་རྐྱེན། བྱེད་ཐབས་ཇི་ཡོད། ཁྲིམས་ཁོངས་ཁྱབ་ཚད། ཉམ་ཐག་ལ་མཐུན་རྐྱེན། ཞུ་རྩ་བཟོ་ཕྱོགས་བཅས་ཀྱི་སྐོར་ལ་ཡིག་ཆ་བཟོ་སྒྲིག་པར་འགྲེམས་ཀྱིས་མང་ཚོགས་ལ་ཁྲིམས་ལུགས་སྐོར་ལ་གོ་རྟོགས་སྤེལ་ཡོད། ཕྱོགས་མཚུངས་དོན་ལྡན་གླིང་གཞིས་ཆགས་སུ་དེར་ཡོད་ཁྲིམས་རྩོད་པ་གསུམ་དང་ཐུག་འཕྲད་ཀྱིས་བོད་མིའི་ཁྲིམས་ལུགས་སྐོར་ལ་བགྲོ་གླེང་གནང་ཡོད།
ཐེངས་འདིའི་མང་ཚོགས་ལ་ཁྲིམས་ལུགས་གོ་རྟོགས་སྤེལ་བའི་ལས་གཞིར་ས་གནས་འགོ་འཛིན་ལས་ཁང་ཁག་ནས་དོ་ཁུར་ཆེན་པོས་མཐུན་འགྱུར་སྣེ་ལེན་གང་ལེགས་གནང་འདུག་པ་བཅས།།
