༢༠༡༢ ཟླ་ ༣ ཚེས་ ༢༤ རེས་གཟའ་སྤེན་པ།
༄༅། །སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པ་ཕྱི་ལོ་ ༢༠༡༢ ཟླ་ ༣ ཚེས་ ༡༤ ནས་འགོ་འཛུགས་ཀྱིས་ཚེས་ ༢༤ ཉིན་རྒྱལ་ཁའི་ངང་ནས་ལེགས་གྲུབ་བྱུང་ཡོད་ཅིང་། ཚོགས་དུས་མཐའ་མའི་ཉིན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གསུང་བཤད་གནང་དོན། དེ་རིང་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པའི་ཉིན་མཐའ་མ་རེད། ཁ་སྔོན་ཚོགས་འདུ་དབུ་འཛུགས་ཀྱི་གཏམ་བཤད་ནང་གྲོས་ཚོགས་ཀྱི་ལས་རིམ་ཚང་མ་དོན་སྙིང་ལྡན་པ་ཞིག་ཡོང་རྒྱུའི་རེ་བ་ཞུ་བཞིན་ཡོད་ཅེས་ཞུས་པ་ཡིན། དེ་བཞིན་བཀའ་ཁྲི་མཆོག་གིས་དབུས་བཀའ་བློན་རྣམ་པ་དང་། དཔལ་ལྡན་ཚོགས་གཙོ་གཞོན་པ་མཆོག་གིས་གཙོས་སྤྱི་འཐུས་རྣམ་པ་ཚང་མས་སེམས་ཚོར་ཆེན་པོའི་ཐོག་ནས་ཐུགས་འཁུར་གནང་སྟེ་གྲོས་ཚོགས་ཀྱི་ལས་རིམ་ནང་མཉམ་བཞེས་ཀྱི་དོན་སྙིང་ལྡན་པའི་གནད་དོན་ཁག་མང་པོ་ཞིག་བགྲོ་གླེང་གནང་བར་བརྟེན་ནས་ཐག་གཅོད་མང་དག་ཅིག་བྱུང་ཡོད། དེར་བརྟེན་བཀའ་ཁྲི་མཆོག་གིས་དབུས་བཀའ་ཤག་ལྷན་རྒྱས་དང་། དཔལ་ལྡན་ཚོགས་གཞོན་མཆོག་གིས་གཙོས་སྤྱི་འཐུས་རྣམ་པ་ཚང་མར་ཐུགས་རྗེ་ཆེ་ཞུ་རྒྱུ་ཡིན། ད་རེས་གྲོས་ཚོགས་ཀྱི་ལས་རིམ་ནང་རྗེས་དྲན་གྱི་གྲོས་འཆར་མང་ཤོས་ཆགས་ཡོད། དེ་ཡང་བོད་ནང་གི་ཛ་དྲག་གནས་སྟངས་དང་འབྲེལ་བ་ཡོད་པ་མ་ཟད། གྲོས་ཚོགས་འཚོགས་བཞིན་པའི་སྐབས་ལ་ཡང་བོད་ནང་ཛ་དྲག་གནས་སྟངས་བྱུང་སྟབས། སྔར་དང་མི་འདྲ་བའི་རྗེས་དྲན་གྲོས་འཆར་མང་བ་བྱུང་ཡོད། ཚོགས་འདུ་ཉིན་དང་པོར་བོད་ནང་གི་ཛ་དྲག་གནས་སྟངས་དང་འབྲེལ་བའི་ཐོག་ནས་ཆབ་སྲིད་བགྲོ་གླེང་ཉིན་གང་ཚོགས་ཡོད། དེའི་བར་དུ་ཚོགས་འདུ་མཚམས་འཇོག་གིས་གྲོས་འཆར་ཐོག་ཡང་བསྐྱར་བགྲོ་གླེང་གནང་བ་རེད། ད་རེས་སྤྱི་འཐུས་མང་པོ་ཞིག་གིས་གསུངས་པ་ལྟར་ལས་རིམ་མང་པོ་ཞིག་གི་ནང་ནས་གལ་ཆེ་བ་མཇུག་བསྡོམས་ལ་ཡང་བོད་ནང་གི་ཛ་དྲག་གནས་སྟངས་ཐོག་ཟུར་གནོན་གྱི་གྲོས་ཆོད་གྲོས་འཆར་འཇོག་རྒྱུ་དང་། དེ་བཞིན་སྤྱི་འཐུས་རྣམ་པས་བགྲོ་གླེང་གི་ཆ་ཤས་ལེན་སྐབས་གནད་དོན་གལ་ཆེ་དེ་འདྲ་གསུངས་སོང། དེར་བརྟེན་གྲོས་ཚོགས་ནང་བཀའ་མོལ་གནང་བ་བཞིན་ལས་འགུལ་སྐབས་སུ་སྤྱི་འཐུས་ཚང་མས་མཉམ་ཞུགས་གནང་རྒྱུའི་རེ་བ་ཞུ་གི་ཡོད། ཅེས་སོགས་ཀྱི་གསུང་བཤད་གནང་སྟེ་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པ་རྒྱལ་ཁའི་ངང་ནས་ལེགས་གྲུབ་བྱུང་ཡོད་པ་བཅས། །