༄༅། །ཕྱི་ལོ་ ༢༠༢༥ ཟླ་བ་ ༠༤ ཚེས་ ༠༤ ཉིན་བོད་མིའི་སྒྲིག་འཛུགས་ཀྱི་བོད་ཀྱི་སྲིད་བྱུས་ཉམས་ཞིབ་ཁང་དུ་བོད་ཀྱི་སྲིད་བྱུས་ཉམས་ཞིབ་ཁང་གི་ཕྱི་ལོ་ ༢༠༢༤ ལོའི་བོད་ཡིག་དང་། ཨིན་ཡིག་གི་ལོ་འཁོར་དུས་དེབ་དབུ་འབྱེད་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༡ ཐོག་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་ཛམ་ལྷ་བསྟན་པ་རྒྱལ་མཚན་ལགས་ཀྱིས་ལོ་འཁོར་དུས་དེབ་ཀྱི་རྩོམ་པ་པོ་དང་། འབུམ་རམས་པ་རྣམས་ཀྱིས་དུས་ཡུན་རིང་པོའི་རིང་སྐུ་ལས་བསྐྱོན་པའི་གྲུབ་འབྲས་ཡིན་པས་གནད་འགག་ཆེན་པོ་ཞིག་ཡིན་པའི་གསལ་བཤད་དང་སྦྲགས། དུས་དེབ་དེའི་བོད་ཡིག་རྩོམ་སྒྲིག་པ་འབུམ་རམས་པ་བློ་བཟང་ཐབས་མཁས་ལགས་དང་། བོད་ཀྱི་སྲིད་བྱུས་ཁང་གི་ཉམས་ཞིབ་པ་ཕན་ཐོགས་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་འབུམ་རམས་པ་ཚེ་དབང་རྡོ་ལགས་བཅས་ངོ་སྤྲོད་གནང་།
དེ་ནས་ཉམས་ཞིབ་པ་ཕན་ཐོགས་ལགས་ཀྱིས་དུས་དེབ་དེའི་རྒྱབ་ལྗོངས་དང་འབྲེལ་དཔྱད་རྩོམ་རྣམས་ཕྱོགས་བསྡུས་གནང་བའི་བརྒྱུད་རིམ་སྐོར་གསུངས་རྗེས་རྩོམ་སྒྲིག་པ་འབུམ་རམས་པ་བློ་བཟང་ཐབས་མཁས་ལགས་ཀྱིས་དཔྱད་རྩོམ་དེ་དག་ཞུ་དག་གནང་ཕྱོགས་སྐོར་དང་། དཔྱད་རྩོམ་གྱི་ནང་དོན་མདོར་ཙམ་ངོ་སྤྲོད་གནང་རྗེས་འབུམ་རམས་པ་ཚེ་དབང་རྡོ་རྗེ་ལགས་ཀྱིས་དུས་དེབ་དེའི་རྩོམ་པ་པོ་རྣམས་ཀྱི་ཚབ་ཞུས་ཏེ་བོད་ཀྱི་སྲིད་བྱུས་ཉམས་ཞིབ་ཁང་ལ་ཐུགས་རྗེ་ཆེ་ཞུས་པ་དང་འབྲེལ་སླར་ཡང་གཞོན་སྐྱེས་དང་ཉམས་ཞིབ་པ་རྣམས་ལ་དེ་ལྟ་བུའི་གོ་སྐབས་གནང་རྒྱུའི་འབོད་སྐུལ་ཞུས་མཚམས་ཁོང་རང་ཉིད་ཀྱིས་བོད་ཡིག་དུས་དེབ་དེའི་ནང་དཔྱད་རྩོམ་སྤེལ་ཡོད་པ་དེའི་སྙིང་བསྡུས་སྒྲོགས་སྦྱང་གནང་ཡོད།
མཐར་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས་མཇུག་བསྡོམས་གསུང་བཤད་གནང་སྐབས་རྒྱ་ནག་གིས་བོད་ཀྱི་ཆོས་དང་རིག་གཞུང་རྣམས་ལོག་བཤད་བྱེད་བཞིན་པའི་སྐབས་འདིར་བོད་མི་རྣམས་ནས་རང་གི་ལོ་རྒྱུས་ཤེས་དགོས་པ་དང་། གཞན་ལ་འགྲེལ་བཤད་རྒྱག་ཐུབ་པ་ཞིག་དགོས་པའི་འགན་ཆེན་པོ་ཡོད་པ་ནན་བརྗོད་གནང་། དེ་མཚུངས་བོད་ཀྱི་གཞོན་སྐྱེས་དང་ཉམས་ཞིབ་པ་རྣམས་ལ་གོ་སྐབས་བསྐྲུན་རྒྱུ་དེ་བོད་ཀྱི་སྲིད་བྱུས་ཉམས་ཞིབ་ཁང་གི་འགན་ཡིན་ལ་བོད་མི་རིགས་དང་། ཆོས། རིག་གཞུང་། རྩ་དོན་བཅས་ལ་ཐད་ཀར་འབྲེལ་བ་ཡོད་ཅེས་གསུངས།
སྤྱིར་བོད་ཡིག་དང་ཨིན་ཡིག་གཉིས་ཀྱི་དུས་དེབ་ནང་བོད་པ་དང་རྒྱ་གར་བའི་འབུམ་རམས་པ་དང་། འབུམ་རམས་པའི་སློབ་གཉེར་གནང་བཞིན་པ་རྣམས་ཀྱི་དཔྱད་རྩོམ་ཡིན་ཞིང་། བོད་ཡིག་དུས་དེབ་ཏུ་ཁྱོན་དཔྱད་རྩོམ་བཅུ་གཉིས་དང་། ཨིན་ཡིག་དུས་ཐོག་དཔྱད་རྩོམ་བཅུ་ཡོད་པ་བཅས།།
ˌ