༄༅། །སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་ཛུ་རིག་མངའ་སྡེའི་བདེ་སྲུང་བློན་ཆེན་སྐུ་ཞབས་མ་རི་ཡི་ཕེར་ (Mario Fehr) མཆོག་དང་མཇལ་འཕྲད་གནང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༩༠ ཕེབས་པའི་༸སྐུའི་གོ་སྟོན། དེ་བཞིན་ལས་དོན་གཞན་འགའི་སྐོར་ལ་བཀའ་མོལ་གནང་ཡོད་པ་དང་། གཞན་ཏཱ་ལའི་བླ་མ་ཞེས་པའི་དཔེ་དེབ་དབུ་འབྱེད་མཛད་སྒོར་ཡང་ཕེབས་ཡོད་པ་རེད།
དེ་ཡང་ཕྱི་ལོ་ ༢༠༢༥ ཟླ་བ་ ༤ ཚེས་ ༣ ཉིན་གྱི་སྔ་དྲོ་ཆུ་ཚོད་ ༡༠ ཐོག་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་སུད་སི་ཛུ་རིག་མངའ་སྡེའི་བདེ་སྲུང་བློན་ཆེན་སྐུ་ཞབས་མ་རི་ཡི་ཕེར་ (Mario Fehr) མཆོག་དང་མཇལ་འཕྲད་གནང་ཡོད། མཇལ་འཕྲད་སྐབས་སུད་སི་སྐུ་ཚབ་དོན་གཅོད་ཀྱིས་ཉེ་ལམ་འདོན་སྤེལ་གནང་བའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཕྱག་དཔེ་སྨྲ་བརྗོད་རང་དབང་མེད་པ་རྣམས་ཀྱི་མགྲིན་ཚབ་པ་ (Voice For The Voiceless) ཞེས་པའི་དཔེ་དེབ་ཇར་མན་སྐད་ཡིག་ཐོག་བསྒྱུར་བ་ཞིག་བློན་ཆེན་མཆོག་ལ་ཕུལ་ཡོད་པ་དང་། སྐབས་དེར་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་ཛུ་རིག་མངའ་སྡེའི་བདེ་སྲུང་བློན་ཆེན་གཉིས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གོ་སྟོན་དང་འབྲེལ་བའི་ལས་དོན་སྐོར། དེ་བཞིན་བོད་དང་འབྲེལ་བའི་ལས་དོན་གཞན་དག་གི་ཐོག་བཀའ་མོལ་ལྷུག་པོ་གནང་ཡོད།
གཞན་ཡང་ཕྱི་ཟླ་ ༤ ཚེས་ ༢ ཉིན་གྱི་དགོང་མོ་ཆུ་ཚོད་ ༧།༣༠ ཐོག་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དགའ་ལྡན་ཕོ་བྲང་ཐེབས་རྩས་པར་སྐྲུན་གནང་བའི་ཏཱ་ལའི་བླ་མ་ཞེས་པའི་དཔེ་དེབ་དབུ་འབྱེད་མཛད་སྒོར་ཕེབས་ཡོད། ཏཱ་ལའི་བླ་མ་ཞེས་པའི་དེབ་དེ་ནི། ལོ་ངོ་སུམ་ཅུའི་རིང་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་སྒྲོན་མཁན་མ་ནོ་ཨལ་སྦ་བོལ་ (Manuel Bauer) ཟེར་བའི་སུད་སིའི་པར་བས་ཕྱི་ལོ་ ༡༩༩༠ ནས་ ༢༠༢༤ དབར་སྒྲོན་པའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་ཕྱོགས་སྒྲིག་གི་དེབ་ཡིན་པ་དང་། དེ་བཞིན་སྐུ་པར་དང་འབྲེལ་བའི་བརྗོད་བྱ་རྣམས་ནི་སྐུའི་གསུང་སྒྱུར་ཐུབ་བསྟན་སྦྱིན་པ་ལགས་ཀྱིས་བྲིས་ཡོད། ཕྱག་དཔེ་དབུ་འབྱེད་མཛད་སྒོའི་ཐོག་ཨིན་ཡིག་དང་། ཇར་མན། ཕ་རཱན་སི་ཡི་གེ་གསུམ་ནང་འགྲེམ་སྤེལ་གནང་ཡོད། སྐབས་དེར་ཕྱི་གླིང་བ་དང་བོད་རིགས་བཅས་མི་བརྒྱ་ལྷག་དབུ་འབྱེད་མཛད་སྒོར་མཉམ་ཞུགས་གནང་ཡོད།
གོང་གི་མཛད་རིམ་དེ་དག་གི་སྐབས་སུ་སུད་སི་དོན་ཁང་གི་ཡུ་རོབ་རྒྱ་རིགས་འབྲེལ་མཐུད་པ་སངས་རྒྱས་སྐྱབས་ལགས་ལྷན་བཅར་གནང་ཡོད། །
