ཕྱི་ལོ་ ༢༠༠༨ ཟླ་ ༩ ཚེས་ ༢༢ རེས་གཟའ་ཟླ་བ།
བཀའ་བློན་ཁྲི་པ་མཆོག་གིས་དབུས་ཕྱི་དྲིལ་བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་དང་། ལྡི་ལི་སྐུ་ཚབ་དོན་གཅོད་དང་བཀའ་བློན་གཅིག་ལྕོགས་བསྟན་པ་ཚེ་རིང་མཆོག་དབུ་བཞུགས་ཐོག་བོད་གཞུང་ཕྱི་རྒྱལ་སྐུ་ཚབ་དོན་གཅོད་ཁག་གི་ལོ་འཁོར་ཚོགས་འདུ་ཚོགས་བཞིན་པ།
༄༅། །བོད་གཞུང་ཕྱི་དྲིལ་ལས་ཁུངས་ཀྱི་ཁྱབ་ཁོངས་སྐུ་ཚབ་དོན་གཅོད་ཁང་ཁག་གི་ལོ་འཁོར་ཚོགས་འདུ་ཕྱི་ལོ་ ༢༠༠༨ ཕྱི་ཟླ་ ༩ ཚེས་ ༢༠ ནས་ ༢༡ བར་ཉིན་གྲངས་གཉིས་རིང་རྡ་ས་བཞུགས་སྒར་དུ་སྐོང་ཚོགས་གནང་ཡོད་པ་རེད། ཉིན་དང་པོོ་ཚོགས་འདུའི་དབུ་འབྱེད་ཀྱི་མཛད་སྒོར་བཀའ་བློན་ཁྲི་པ་མཆོག་དབུ་བཞུགས་ཐོག་ཕྱི་དྲིལ་བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་དང་། ལྡི་ལི་སྐུ་ཚབ་དོན་གཅོད་དང་བཀའ་བློན་གཅིག་ལྕོགས་བསྟན་པ་ཚེ་རིང་མཆོག་མཉམ་ཞུགས་གནང་ཡོད་པ་རེད། ཚོགས་འདུའི་དབུ་འབྱེད་མཛད་སྒོའི་ཐོག་ཕྱི་དྲིལ་བཀའ་བློན་མཆོག་ནས་འཚམས་འདྲིའི་བཀྲིས་བདེ་ལེགས་ཞུས་པ་དང་སྦྲགས་ལས་འཆར་ཁག་སྙན་སྒྲོན་གནང་གྲུབ་རྗེས་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་ནས་དབུ་འབྱེད་ཀྱི་གསུང་བཤད་དང་། ཉིན་གྲངས་གཉིས་རིང་གི་ཚོགས་འདུ་འཚོག་རྒྱུའི་ལམ་སྟོན་གསུང་བཤད་ཟབ་རྒྱས་གནང་།
དེ་རྗེས་སྐུ་ཚབ་དོན་གཅོད་ཁང་ཁག་གི་ལོ་འཁོར་ལས་དོན་ཚགས་ཚུད་གཏོང་ཐབས་སོགས་ཀྱི་སྐོར་ལ་ཚོགས་འདུ་དབུ་འཛུགས་གནང་ཡོད་པ་རེད། ཐེངས་འདིའི་ཚོགས་འདུར་ལྡི་ལི་སྐུ་ཚབ་དོན་ཁང་དང་། ཨ་རི་སྐུ་ཚབ་དོན་ཁང་། སུད་སི་སྐུ་ཚབ་དོན་ཁང་། ཉི་ཧོང་སྐུ་ཚབ་དོན་ཁང་། དབྱིན་ལེན་སྐུ་ཚབ་དོན་ཁང་། ཕ་རན་སི་སྐུ་ཚབ་དོན་ཁང་། ཨུ་རུ་སུ་སྐུ་ཚབ་དོན་ཁང་། ཨ་ཕི་རི་ཀ་སྐུ་ཚབ་དོན་ཁང་། ཐེ་ཝན་སྐུ་ཚབ་དོན་ཁང་། བལ་ཡུལ་སྐུ་ཚབ་དོན་ཁང་། ཨ་རི་སྐུ་ཚབ་དོན་གཅོད་ཁང་གི་ཁྱབ་ཁོངས་ལྷོ་ཨ་རི་འབྲེལ་མཐུད་ལས་ཁུངས་བཅས་ཨོ་སི་ཊོ་ལི་ཡའི་སྐུ་ཚབ་དོན་གཅོད་མ་གཏོགས་ཚང་མ་ལོ་འཁོར་ཚོགས་འདུར་ཚང་འཛོམས་གནང་བ་བཅས་ཀྱི་གནས་བསྡུས་སུ།།
