ཕྱི་ལོ་ ༢༠༠༨ ཟླ་ ༩ ཚེས་ ༡༨ རེས་གཟའ་ཕུར་བུ།
ཆོས་རིག་བཀའ་བློན་མཆོག་ནས་ཞིང་གཤེགས་དམ་པ་དེ་ཉིད་ཀྱི་སྐུ་ཚེའི་ལོ་རྒྱུས་སྒྲོག་སབྱངས་གནང་བཞིན་པ།
༄༅། །འཇམ་མགོན་༸རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་བརྒྱ་པ་ཁྲི་ཟུར་བློ་བཟང་ཉི་མ་དཔལ་བཟང་པོ་མཆོག་ཕྱི་ལོ་ ༢༠༠༨ ཟླ་ ༩ ཚེས་ ༡༤ དང་བོད་ཟླ་ ༧ ཚེས་ ༡༤ ཉིན་གྱི་མཚན་གྱི་ཆུ་ཚོད་ ༡།༥༥ ཐོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་ཏེ་ཡིད་སྐྱོའི་གནས་ཚུལ་ཐོན་སྐོར་དཔལ་ལྡན་འབྲས་སྤྲུངས་མཁས་མང་བྱེ་བའི་གླིང་གྲྭ་ཚང་ནས་ཕྱི་ལོ་ ༢༠༠༨ ཟླ་ ༩ ཚེས་ ༡༦ རེས་གཟའ་མིག་དམར་ཉིན་དཔལ་ལྡན་རང་གཞུང་བཀའ་ཤག་ལ་སྙན་སེང་ཞུས་ཡོད་པ་དང་། དེ་བཞིན་བཀའ་ཤག་ནས་ཕྱི་ཟླ་ ༩ ཚེས་ ༡༧ ཉིན་གསལ་བསྒྲགས་གནང་དོན་ལྟར་བདེ་བར་གཤེགས་པ་དེ་ཉིད་ཀྱི་ཐུགས་དགོངས་མཐའ་དག་ཡོངས་སུ་རྫོགས་ཕྱིར་ཕྱི་ཟླ་ ༩ ཚེས་ ༡༧ རེས་གཟའ་ལྷག་པ་ཉིན་གྱི་ཕྱེད་ཡོལ་ཆུ་ཚོད་ ༢ ཐོག་གངས་སྐྱིད་ལས་བྱེད་གསོལ་ཚང་ཡང་སྟེང་ཚོགས་ཁང་དུ་བཀའ་བློན་རྣམས་དང་། བོད་མི་མང་སྤྱི་འཐུས་ཚོགས་གཞོན་གྱི་དབུས་སྤྱི་འཐུས་རྣམ་པ། དྲུང་ཆེ་ཆུང་གི་དབུས་སྲི་ཞུ་བ་ཡོངས་ཚང་འཛོམས་ཀྱིས་སྨོན་ལམ་ཆུ་ཚོད་ ༡ རིང་གསུངས་རྗེས་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་ནས་ཞིང་གཤེགས་དམ་པ་དེ་ཉིད་ཀྱི་སྐུ་ཚེའི་ལོ་རྒྱུས་སྒྲོག་སབྱངས་ཞུས་གནང་ཡོད་པ་དང་། དེ་རྗེས་མྱ་ངན་གུས་འདུད་སྐར་ཆ་གཅིག་ཞུས་ནས་དབུས་ཀྱི་ལས་ཁུངས་ཁག་སྒོ་བརྒྱབ་སྟེ་མྱ་ངན་ཞུས་ཡོད་པ་རེད།།
