༢༠༡༢ ཟླ་ ༣ ཚེས་ ༢༡ རེས་གཟའ་ལྷག་པ།
༄༅། །འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། མཚོ་སྔོན་ཞིང་ཆེན་མཚོ་ལྷོ་ཁུལ་འབའ་ཐུན་ཏེ་རྫོང་ངམ་གད་པ་གསུམ་མདོ་རྫོང་ཁོངས་སུ་ཡོད་པའི་ཤིང་ཁྲི་དགོན་པའི་དགེ་འདུན་པ་ཞལ་གྲངས་ ༡༥༠ ནས་ ༢༠༠ ཙམ་གྱིས་རྫོང་ཐོག་ཏུ་ཞི་བའི་སྐད་འབོད་གནང་བའི་གནས་ཚུལ་ཐོན་འདུག
དེ་ཡང་ཕྱི་ལོ་ ༢༠༡༢ ཟླ་ ༣ ཚེས་ ༡༥ ཉིན་མཚོ་སྔོན་ཞིང་ཆེན་ཁོངས་མཚོ་ལྷོ་ཁུལ་འབའ་རྫོང་ཤིང་ཁྲི་དགོན་པའི་དགེ་འདུན་པ་གྲངས་ ༡༥༠ ནས་ ༢༠༠ ཙམ་གྱིས་སྔ་དྲོ་ཆུ་ཚོད་དྲུག་པ་ཙམ་ནས་དབུ་བཙུགས་ཏེ་རྫོང་སྲིད་གཞུང་བར་དུ་བསྐྱོད་ནས་ཞི་བའི་ངོ་རྒོལ་སྐད་འབོད་གནང་འདུག
ཁོང་རྣམ་པས་སྐད་འབོད་གནང་རྗེས་རིམ་པས་ས་གནས་མང་ཚོགས་གྲངས་ ༡༠༠༠ བརྒལ་བར་མཉམ་ཞུགས་གནང་ཡོད་ཅིང་། ངོ་རྒོལ་སྐད་འབོད་ནང་བོད་ལ་རང་དབང་དགོས། ྋརྒྱལ་བ་རིན་པོ་ཆེ་བོད་དུ་གདན་འདྲེན་ཞུ་དགོས། སྐད་ཡིག་འདྲ་མཉམ་དགོས། ཞེས་སྐད་འབོད་གནང་འདུག
གནས་ཚུལ་དེས་རྐྱེན་པས་ཕྱི་ཚེས་ ༡༥ ཉིན་གྱི་དགོང་དྲོ་དགེ་འདུན་པ་ ༥༠ ཙམ་ཞིག་ཉེན་རྟོག་པས་འཛིན་བཟུང་བྱས་ཡོད་འདུག ཕྱི་ཚེས་ ༡༦ ཉིན་རྫོང་སྲིད་གཞུང་མདུན་མང་ཚོགས་ ༢༠༠༠ བརྒལ་བ་འདུ་འཛོམས་བྱས་ཏེ་ཕྱི་ཚེས་ ༡༥ ཉིན་འཛིན་བཟུང་བྱས་པའི་དགེ་འདུན་པ་ཚོ་གློད་བཀྲོལ་དགོས་པ་དང་སྐད་ཡིག་འདྲ་མཉམ་དགོས་པ། བོད་ལ་རང་དབང་དགོས་པ། ྋརྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས་ཞེས་སྐད་འབོད་གནང་འདུག ངོ་རྒོལ་སྐད་འབོད་ཞི་འཇགས་ཡོང་ཆེད་རྫོང་སྲིད་གཞུང་གི་དཔོན་རིགས་ནས་ཕྱི་ཚེས་ ༡༦ ཉིན་གྱི་དགོང་དྲོ་ཆུ་ཚོད་ ༥ ཙམ་ལ་མང་ཚོགས་ཁྲོད་གཏམ་བཤད་སྤེལ་བའི་ནང་། མང་ཚོགས་རྣམས་རང་ཁྱིམ་དུ་ཕྱིར་ལོག་དགོས་པ་དང་གཞུང་ཕྱོགས་ནས་ཐག་གཅོད་ཡག་པོ་བྱ་རྒྱུ་ཡིན་ལུགས་བརྗོད་པ་ལྟར། མང་ཚོགས་ངོས་ནས་གལ་ཏེ་ལུགས་མཐུན་གྱི་ཐག་གཅོད་མ་བྱས་ན་མུ་མཐུད་ངོ་རྒོལ་སྐད་འབོད་བྱ་རྒྱུ་ཡིན་པ་བརྗོད་འདུག དེ་བཞིན་འབའ་རྫོང་མི་རིགས་སློབ་འབྲིང་གི་སློབ་མས་ཕྱི་ཚེས་ ༡༦ ཉིན་སློབ་གྲྭའི་ནང་སྐད་ཡིག་འདྲ་མཉམ་དང་། མི་རིགས་ལ་རང་དབང་དགོས་པའི་སྐད་འབོད་གནང་འདུག  ད་ལྟ་འབའ་རྫོང་ས་གནས་སུ་གཞུང་ཕྱོགས་ནས་དམག་མི་ཕོན་ཆེན་མངགས་གཏོང་བྱས་ཏེ་དམ་བསྒྲགས་ཤུགས་ཆེ་བྱེད་ཀྱི་ཡོད་པའི་གནས་ཚུལ་ཐོན་འདུག་པ་བཅས།