༄༅། །འདི་གར་སུད་སི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༥ ཟླ་བ་༢ ཚེས་ ༩ ཉིན་བོད་ཀྱི་ཆབ་སྲིད་བཙོན་ཟུར་རྣམ་སྐྱིད་ལགས་ཕྱི་ལོ་ ༢༠༢༥ ལོའི་ཇི་ནི་ཝ་ལྷན་ཚོགས་སུ་མཉམ་ཞུགས་ཆེད་སུད་སི་ཇི་ནི་ཝ་གྲོང་ཁྱེར་དུ་ཕེབས་འབྱོར་དང་བསྟུན་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་ཐེངས་ ༥༨ (UNHRC 58th session) མ་འཚོགས་གོང་ཕྱི་ལོ་ ༢༠༢༥ ཟླ་བ་ ༢ ཚེས་ ༡༠ ནས་ ༡༤ བར་ཉིན་གྲངས་ལྔའི་རིང་བོད་ནང་གི་འགྲོ་བ་མིའི་ཐོབ་ཐང་དང་། རྣམ་སྐྱིད་ལགས་བཙོན་ཁང་དུ་མྱོང་བའི་ལོ་རྒྱུས་ངོ་སྤྲོད་ཆེད་ཞུ་གཏུག་གི་ལས་འགུལ་སྤེལ་འགོ་ཚུགས་ཡོད།
ཞུ་གཏུག་གི་ལས་འགུལ་དེ་སྡེ་ཚན་གཙོ་བོ་གསུམ་གྱི་ནང་བཀོད་སྒྲིག་བྱས་པའི་ནང་། དང་པོ་འགྲོ་བ་མིའི་ཐོབ་ཐང་གི་ཆེས་མཐོའི་ལྷན་ཁང་གི་རྒྱ་ནག་སྡེ་ཚན་གྱི་ལས་བྱེད་ལྷན་དུ་མཇལ་འཕྲད་ཚོགས་འདུ། གཉིས་པ་ཇི་ནི་ཝར་མཉམ་འབྲེལ་རྒྱལ་ཚོགས་ཀྱི་གཞུང་ཚབ་ཚོ་དང་ལྷན་ཚོགས་འདུ། གསུམ་པ་མཉམ་འབྲེལ་རྒྱལ་ཚོགས་ཀྱི་དམིགས་བསལ་ཆེད་ལས་ (UN Special Rapporteurs) ཚོ་དང་ལྷན་དུ་ཚོགས་འདུ་བཅས་ཞུ་གཏུག་གོ་སྒྲིག་གནང་བ་བཞིན་ཞུ་གཏུག་གི་ལས་འགུལ་འགྲོ་དང་འགྲོ་མུས་སུ་ཡོད།
ད་ལན་ཞུ་གཏུག་གི་སྐབས་སུ་གཙོ་བོ་མཉམ་འབྲེལ་རྒྱལ་ཚོགས་ཀྱི་ཚོགས་ཞུགས་རྒྱལ་ཁབ་དེ་སྔོན་ཞུ་གཏུག་གནང་མྱོང་མེད་པའི་རྒྱལ་ཁབ་ཆུང་བ་ཁག་གི་གཞུང་ཚབ་ཁག་དང་རྒྱུན་ལྡན་ནས་འབྲེལ་བ་ཡོད་པའི་རྒྱལ་ཁབ་ཆེ་ཁག་གཉིས་ཀ་ཡོད་པ་དང་། ཞུ་གཏུག་སྐབས་གཞུང་ཚབ་མང་པོ་ཞིག་གིས་བོད་དོན་ལ་གདུང་སེམས་མཉམ་སྐྱེད་ཀྱི་རྣམ་པ་ཤུགས་ཆེ་སྟོན་པ་དང་། རྒྱལ་ཚོགས་ཀྱི་ཚོགས་བཞུགས་རྒྱལ་ཁབ་ཆུང་བ་རྣམས་ཀྱིས་གསུང་དོན་དུ། སྤྱིར་རྒྱལ་ཁབ་ཆེ་བ་ཁག་ལ་དཔལ་འབྱོར་དང་། དམག་དོན། ཐབས་བྱུས་ཀྱི་གནད་དོན་ཐད་ལ་བརྟེན་དགོས་པའི་རྐྱེན་གྱིས་བོད་དོན་ཐོག་ཐབས་ལམ་མཁས་པོའི་ངང་ནས་རྒྱབ་སྐྱོར་གནང་རྒྱུ་ལས་ཐད་ཀར་གདོང་ཐུག་གིས་གནང་རྒྱུ་ཕྲན་བུ་ཁག་པོ་ཡོད་ཅེས་གསལ་བཤད་དང་། གལ་ཏེ་བོད་དོན་དང་འབྲེལ་བའི་གནད་དོན་ཁག་དུས་དང་རན་པ་ཞིག་ལ་ཕྱི་འབྲེལ་གྱི་ལམ་ནས་གླེང་སློང་བྱ་རྒྱུའི་དུས་སུ་འབབ་ཚེ་དངོས་སུ་རྒྱབ་སྐྱོར་གནང་གི་ཡིན་ཞེས་ཁས་ལེན་གནང་ཡོད།
གང་ལྟར་ད་ལྟའི་ཞུ་གཏུག་དེའི་མཉམ་འབྲེལ་རྒྱལ་ཚོགས་ཀྱི་ནང་དུ་དངོས་སུ་རྒྱབ་སྐྱོར་གནང་མ་ཐུབ་ཀྱང་རྒྱ་ནག་གིས་བོད་ནང་གི་དངོས་སུ་གདུག་རྩུབ་ཇི་ལྟར་བྱེད་ཀྱི་ཡོད་མེད་སྐོར་རྣམ་སྐྱིད་ལགས་ཀྱི་ལོ་རྒྱུས་ཐོག་ཁ་གསལ་ཞུས་ཐུབ་པ་བྱུང་ཡོད། དེར་བརྟེན་རྒྱལ་ཁབ་སོ་སོའི་རྒྱལ་ཚོགས་ཚོགས་མི་རྣམས་ཀྱི་རྒྱ་ནག་ཐོག་འཛིན་པའི་སྲིད་བྱུས་དང་མ་འོངས་འབྲེལ་ལམ་གནང་ཕྱོགས་ཐད་ཏན་ཏན་བསམ་བློ་གཉིས་པ་ཞིག་གཏོང་དགོས་པའི་གནས་སྟངས་སུ་འགྱུར་ཡོད།སྒོ་བསྡམས་ཀྱི་ཚོགས་འདུ་དེ་དག་གི་ནང་ཆབ་སྲིད་བཙོན་ཟུར་རྣམ་སྐྱིད་ལགས་དང་། སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས། སུད་སི་མཉམ་འབྲེལ་རྒྱལ་ཚོགས་ཀྱི་ཞུ་གཏུག་པ་ཕུན་ཚོགས་སྟོབས་རྒྱལ་ལགས་བཅས་མཉམ་ཞུགས་གནང་ཡོད། ཉིན་ལྔའི་ལས་འགུལ་དེའི་རིང་བོད་དོན་ཐོག་མཉམ་འབྲེལ་རྒྱལ་ཚོགས་ཀྱི་ད་བར་རྒྱལ་ཁབ་མི་འདྲ་བའི་གཞུང་ཚབ་པ་ ༦ ཞུ་གཏུག་ཟིན་པ་དང་། ད་དུང་གཞུང་ཚབ་མི་འདྲ་བ་ ༧ ལྷག་ལ་ཞུ་གཏུག་བྱ་རྒྱུ་ལྷག་ཡོད་པ་མ་ཟད། འགྲོ་བ་མིའི་ཐོབ་ཐང་གི་ཆེས་མཐོའི་ལྷན་ཁང་གི་རྒྱ་ནག་སྡེ་ཚན་གྱི་ལས་བྱེད་ལྷན་དུ་མཇལ་འཕྲད་ཀྱིས་ཞུ་གཏུག་བྱ་འཆར་དང་། དེ་ནས་མཉམ་འབྲེལ་རྒྱལ་ཚོགས་ཀྱི་དམིགས་བསལ་ཆེད་ལས་ (UN Special Rapporteurs) ཚོ་དང་ལྷན་དུ་ཞུ་གཏུག་གནང་རྒྱུའི་ལས་རིམ་མུ་མཐུད་འགྲོ་མུས་སུ་ཡོད་པ་བཅས། །
