༄༅། །ཨེ་ཤེ་ཡ་རང་དབང་རླུང་འཕྲིན་ཁང་ནས་གནས་ཚུལ་སྤེལ་བར་གཞིགས་ན། ཕྱི་ལོ་ ༢༠༢༤ ཟླ་བ་ ༡༡ ནས་བཟུང་རྒྱ་ནག་གཞུང་གིས་གསེར་རྟ་བླ་རུང་སྒར་དུ་དམ་དྲག་དང་། གྲྭ་བཙུན་ཕྱིར་ཕུད་གཏོང་དགོས་པའི་བཀོད་སྡོམ་བྱས་པའི་གནས་ཚུལ་ཐོན་ཡོད་པ་བཞིན། ད་ལྟའི་ཆར་གྲྭ་བཙུན་ ༡༠༠༠ ལྷག་ལ་དགོན་པའི་ནང་སྡོད་ཆོག་པའི་ཡིག་ཆ་མེད་སྐོར་བརྗོད་ནས། རང་ངོས་ནས་ཕྱིར་ཐོན་བྱེད་དགོས་སྐོར་བརྗོད་དེ་མང་པོ་ཞིག་དགོན་པ་ནས་འབུད་དགོས་བྱུང་ཡོད་པ་དང་། དགོན་པའི་ནང་རྒྱ་ནག་གཞུང་འབྲེལ་གྱི་ལས་བྱེད་དང་ཉེན་རྟོག་པ་ ༤༠༠ ཙམ་གཏན་སྡོད་བྱས་ཏེ། གྲྭ་བཙུན་ཚོས་འགྲོ་འདུག་སྤྱོད་གསུམ་དང་དགོན་པའི་ནང་བཅར་མཁན་མཆོད་མཇལ་བ་དང་ཡུལ་སྐོར་བ་སོགས་ཀྱིས་གང་བྱུང་པར་བརྒྱབ་མི་ཆོག་པ་དང་། གཞུང་གི་གཏན་འབེབས་བྱས་པའི་དབྱེ་མཚམས་ནང་དུ་བཅར་བ་ལས་དགོན་པའི་ས་གནས་གང་སར་སྐྱོད་མི་ཆོག་པའི་དམ་དྲག་ཤུགས་ཆེ་བྱེད་བཞིན་ཡོད་པ། བོད་ཕྱི་ནང་གཉིས་ཀྱི་འབྲེལ་ཡོད་བོད་མི་གཉིས་ནས་འདི་ག་ཨེ་ཤི་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་།
གོང་ཞུས་བོད་ནང་གི་འབྲེལ་ཡོད་དེས་མུ་མཐུད་བརྗོད་དོན་ལ། རྒྱ་ནག་གཞུང་གིས་བླ་རུང་སྒར་དུ་གྲྭ་བཙུན་ ༥༠༠༠ ལས་སྡོད་མི་ཆོག་པའི་གཏན་འབེབ་བྱས་ཡོད་སྟབས། ཐེངས་འདིར་ཕྱིར་ཕུད་གཏོང་བཞིན་པའི་གྲྭ་བཙུན་ཚོར་བླ་རུང་སྒར་དུ་སྡོད་ཆོག་པའི་ཡིག་ཆ་མེད་པར་ཁ་གཡར་ནས་ཕྱིར་ཕུད་གཏོང་བཞིན་ཡོད་པ་དང་། གྲྭ་བཙུན་ ༡༠༠༠ ལྷག་དུས་གཅིག་ལ་ཕྱིར་ཕུད་མ་གཏང་བར་འདས་པའི་ཟླ་གཅིག་རིང་རང་འགུལ་གྱིས་འབུད་འཇུག་བཞིན་ཡོད་པ་དང་། གནད་དོན་དེ་ནི་སྤྱི་ཚོགས་སྟེང་མངོན་གསལ་དུ་འགྱུར་གཞི་མི་ཆགས་པ་དང་མང་ཚོགས་ལ་དོ་སྣང་མི་ཡོང་བའི་ཐབས་ཤེས་ཤིག་ཡིན་ཞིང་། ད་ལྟའི་ཆར་གྲྭ་བཙུན་མང་དག་ཅིག་དགོན་པ་ནས་ཕྱིར་ཕུད་བཏང་ཟིན་ཡོད་པ་མ་ཟད། ཕྱིར་ཕུད་གཏོང་བཞིན་པའི་གྲྭ་བཙུན་དག་གི་གྲྭ་ཤག་གཏོར་བཤིག་དགོས་སྐོར་བརྗོད་ནས་ཐོ་འགོད་བྱས་ཟིན་ན་ཡང་། ད་ལྟ་དངོས་སུ་གཏོར་བཤིག་བཏང་མེད་ན་ཡང་ཕྱི་ཟླ་ ༤ ནང་དགོན་པའི་གླིང་དུ་གཞུང་ལམ་བཟོ་དགོས་སྐོར་བརྗོད་བཞིན་ཡོད་པས། དེ་དང་ལྷན་གྲྭ་ཤག་མང་དག་ཅིག་གཏོར་བཤིག་གཏོང་ཉེན་དུ་གྱུར་ཡོད་པ་སོགས་འགྲེལ་བརྗོད་བྱེད་ཀྱི་འདུག
སྔ་ལོའི་ཕྱི་ཟླ་ ༡༢ ཚེས་ ༢༠ ཉིན་རྒྱ་ནག་གཞུང་གིས་བླ་རུང་སྒར་དུ་དཀར་མཛེས་ཁུལ་བྲག་མགོ་རྫོང་སོགས་ནས་དམག་མི་ ༤༠༠ ཙམ་འགྲེམས་འཇོག་བྱས་པ་མ་ཟད། ཐད་འཕུར་གནམ་གྲུ་བརྒྱུད་གྲྭ་བཙུན་རྣམ་པའི་འགུལ་བསྐྱོད་ལ་ལྟ་སྲུང་དང་། ཕྱི་ལོ་༢༠༢༥ ནས་འགོ་འཛུགས་ཀྱིས་བླ་རུང་སྒར་དུ་གྲྭ་བཙུན་རྣམས་ལོ་ ༡༥ བརྒལ་བ་གནས་སྡོད་མི་ཆོག་པའི་དམ་དྲག་བྱེད་བཞིན་ཡོད་པའི་གནས་ཚུལ་བྱུང་ཡོད་ལ། སྤྱིར་རྒྱ་ནག་གཞུང་གིས་ད་ཐེངས་ཙམ་མ་ཡིན་པར། དེ་སྔ་ཕྱི་ལོ་ ༢༠༡༧ ལོར་ཡང་བླ་རུང་སྒར་ནས་གྲྭ་བཙུན་ ༤༠༠༠ ལྷག་ཕྱིར་ཕུད་བཏང་པ་དང་གྲྭ་ཤག་ ༤༧༠༠ གཏོར་བཤིག་བྱས་ཡོད་པ་མ་ཟད། སྐབས་དེར་རྒྱ་ནག་གཞུང་འབྲེལ་མི་སྣས་ས་གནམ་གཉིས་ཀ་རྒྱ་ནག་དམར་ཤོག་ཚོགས་པར་བདག་གི་ཡོད་པས། བླ་རུང་སྒར་ག་རེ་བྱེད་མིན་ང་ཚོས་དབང་ཆ་ཡིན་ཞེས་སོགས་བརྗོད་པ་འབྲེལ་ཡོད་ནས་ངོ་སྤྲོད་གནང་ཡོད་པ་རེད། །
