༢༠༡༢ ཟླ་ ༣ ཚེས་ ༡༧ རེས་གཟའ་སྤེན་པ།
༄༅། །ཕྱི་ལོ་ ༢༠༡༢ ཟླ་ ༣ ཚེས་ ༡༧ ཉིན་བཞུགས་སྒར་གངས་སྐྱིད་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་ལས་བྱེད་འདེམས་བསྐོ་ལྷན་ཁང་གིས་བོད་མིའི་སྤྱི་ཚོགས་ནང་འཛིན་སྐྱོང་དང་འབྲེལ་བའི་ལས་བྱེད་ཀྱི་སྔོན་འགྲོའི་ཟབ་སྦྱོང་སྤྲོད་རྒྱུའི་གསར་འགོད་གསལ་བསྒྲགས་སྤེལ་བ།
དེ་ཉིན་སྔ་དྲོ་ཆུ་ཚོད་ ༡༠ ཐོག་དབུས་འོས་བསྡུ་ལྷན་ཁང་དང་ལས་བྱེད་འདེམས་བསྐོ་ལྷན་ཁང་གི་འགན་འཛིན་གཅིག་ལྕོགས་འཇམ་དཔལ་ཆོས་བཟང་མཆོག་དང་དབུས་སྤྱི་ཁྱབ་འཆར་འགོད་ལས་ཁུངས་ཀྱི་འགན་འཛིན་དཀོན་མཆོག་བརྩོན་འགྲུས་ལགས། འབྲེལ་ཡོད་ལས་བྱེད་ལྷག་རྡོར་ལགས། གསར་འགོད་པ་བཅས་ལྷན་འཛོམས་ཐོག་འདེམས་ལྷན་གྱི་འགན་འཛིན་མཆོག་གིས་གསུང་དོན། དེ་རིང་གསར་འགོད་གསལ་བསྒྲགས་བྱེད་དགོས་དོན་གཙོ་བོ་ནི་བོད་མིའི་སྒྲིག་འཛུགས་ཀྱི་ལས་བྱེད་འདེམས་སྒྲུག་བྱ་རྒྱུའི་ཆེད་རེད། བཀའ་ཤག་ནས་གཏན་འབེབས་གནང་བའི་ལས་བྱེད་དབུས་རྡ་ས་ཙམ་མིན་པར་ཕྱི་རྒྱལ་སྐུ་ཚབ་དོན་གཅོད་ཁག་གིས་གཙོས་ལས་བྱེད་ཡོངས་ལ་བཀའ་འཁྲོལ་གནང་བའི་ས་མིག་གྲངས་ ༦༠༦ ཡོད། དེ་རིང་བར་ཞབས་འདེགས་ཞུ་བཞིན་པ་ ༥༣༡ ལས་མེད་པར་སོང་ས་མིག་སྟོང་པ་ ༧༥ ཡོད། བཀའ་ཁྲི་མཆོག་གི་དགོངས་གཞི་གཙོ་བོར་འཛིན་པའི་བཀའ་ཤག་གི་ངོས་ནས་སྲི་ཞུའི་ལས་བྱེད་ཀྱི་ཤེས་ཚད་དང་འཇོན་ཐང་། སྤྱི་ཡོངས་ཐོག་བསམ་བློ་གཏོང་སྟངས་ཡར་རྒྱས། ལྷག་པར་ད་ལྟའི་ལས་བྱེད་རྣམས་ཀྱི་ཤེས་འཇོན་མི་འདང་ཙམ་མིན་པར་འཛམ་གླིང་ཡར་རྒྱས་འགྲོ་བཞིན་པར་བརྟེན། ང་ཚོས་ཀྱང་གོམ་པ་མདུན་སྤོས་ཀྱིས་དུས་དང་འཚམ་པའི་སྤྱི་ཡོངས་ཀྱི་ལས་བྱེད་གནས་ཚད་གོང་མཐོར་གཏོང་ཆེད། འདི་ལོའི་ཕྱི་ཟླ་ ༧ ནས་འགོ་འཛུགས་ཀྱིས་ཟླ་བ་ ༥ རིང་གཞི་རིམ་དང་ཁྱད་ལས་པའི་སློབ་སྦྱོང་བོད་མིའི་སྤྱི་ཚོགས་ནང་འཛིན་སྐྱོང་སོགས་ལ་ཞབས་འདེགས་ཞུ་རྒྱུར་དམིགས་བསལ་ཟབ་སྦྱོང་ཞིག་གོ་སྒྲི་ཞུ་རྒྱུ་ཡིན་ཞེས་སོགས་གསུང་བཤད་གནང་རྗེས་སྤྱི་ཁྱབ་འཆར་འགོད་འགན་འཛིན་གྱིས་དྲི་བ་ཁག་ལན་ལ་འདེབས་ཞིབ་རྒྱས་གནང་ཡོད་པ་བཅས། །
