སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་དཔེ་དེབ་དབུ་འབྱེད་གནང་བ།

གསར་ལས་ཁང་གི་གསར་འགོད་པས།

༢༠༢༥-༠༢-༠༣

༄༅། །ཕྱི་ལོ་ ༢༠༢༥ ཟླ་བ་ ༢ ཚེས་ ༢ ཉིན་རེས་གཟའ་ཉི་མའི་ཉིན་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་བོད་རིགས་རྩོམ་པ་པོ་བསྟན་འཛིན་དབང་མོ་ལགས་ཀྱི་ཇར་མན་སྐད་ཡིག་གི་དཔེ་དེབ་རོ་སྒྲུང་དབུ་འབྱེད་གནང་ཡོད།

དེ་ཡང་ཕྱི་ཚེས་ ༢ ཉིན་ཕྱེད་ཡོལ་ཆུ་ཚོད་དང་པོའི་ཐོག་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཇི་ནི་ཝ་གཟའ་ཉི་མའི་བོད་ཡིག་སློབ་གྲྭ་ཆེད་ཕེབས་གནང་བ་མ་ཟད། བོད་ཀྱི་རྩོམ་པ་པོ་དང་སུད་བོད་ཚོགས་པའི་ཕ་རཱན་སི་ཁྱབ་ཁོངས་ཀྱི་ཚོགས་གཙོ་ཟུར་པ་བསྟན་འཛིན་དབང་མོ་ལགས་ཀྱིས་ཉེ་དུས་པར་སྐྲུན་གནང་བའི་ཇར་མན་སྐད་ཡིག་གི་དཔེ་དེབ་རོ་སྒྲུང་དབུ་འབྱེད་དང་། ཇི་ནི་ཝ་གཟའ་ཉི་མའི་བོད་ཡིག་སློབ་གྲྭའི་དགེ་སློབ་དང་ཕ་མ་རྣམས་ལ་ལམ་སྟོན་གསུང་བཤད་ཀྱང་གནང་ཡོད།

ཇི་ནི་ཝ་བོད་རིགས་ཚོགས་པས་གདན་འདྲེན་ཞུས་པ་ལྟར། སུད་སི་སྐུ་ཚབ་དོན་གཅོད་དང་བོད་ཀྱི་རྩོམ་པ་པོ་བསྟན་འཛིན་དབང་མོ་ལགས་ཇི་ནི་ཝ་གཟའ་ཉི་མའི་བོད་ཡིག་སློབ་གྲྭ་ཆེད་ཕེབས་ཀྱིས་བསྟན་འཛིན་དབང་མོ་ལགས་ཀྱིས་མོ་རང་གི་དཔེ་དེབ་རྣམས་ངོ་སྤྲོད་གནང་བ་དང་། སྐུ་ཚབ་དོན་གཅོད་ཀྱིས་བོད་ཀྱི་མ་འོངས་པ་ནི་ད་ལྟ་སློབ་ཕྲུག་རྣམས་ལ་བོད་ཀྱི་རིག་གཞུང་གི་སློབ་གསོ་ཡག་པོ་སྤྲད་ཡོད་མེད་ལ་ཐུག་ཡོད་པས། དགེ་རྒན་དང་ཕ་མ་ཚང་མས་གང་ནུས་ཀྱི་འབད་བརྩོན་གནང་དགོས་པ་དང་། དེ་བཞིན་སློབ་ཕྲུག་རྣམས་ནས་ཀྱང་སློབ་སྦྱོང་ཡག་པོ་བྱ་དགོས་པའི་སྐུལ་མ་གནང་རྗེས་སྐུ་ཚབ་དོན་གཅོད་ཀྱིས་བསྟན་འཛིན་དབང་མོ་ལགས་ཀྱི་ཇར་མན་སྐད་ཡིག་པར་གཞི་ཅན་གྱི་རོ་སྒྲུང་དབུ་འབྱེད་གནང་སོང་།

དེ་རྗེས་བསྟན་འཛིན་དབང་མོ་ལགས་ཀྱིས་མོ་རང་གི་མི་ཚེ་ལོ་རྒྱུས་ངོ་སྤྲོད་མདོར་བསྡུས་གནང་རྗེས་བོད་སྐད་དང་ཕ་རཱན་སི་སྐད་གཉིས་ཀྱི་ནང་མོའི་དཔེ་དེབ་རོ་སྒྲུང་གི་བརྗོད་བྱ་སློབ་ཕྲུག་རྣམས་ལ་ཆུ་ཚོད་གཉིས་ཙམ་ལ་ངོ་སྤྲད་གནང་བ་མ་ཟད། སློབ་ཕྲུག་རྣམས་ཀྱི་དྲི་བར་ལན་འདེབས་ཀྱང་གནང་ཡོད། མཐར་ཇི་ནི་ཝ་བོད་རིགས་ཚོགས་པའི་ཚོགས་གཙོ་ཕུར་བུ་ལགས་ཀྱིས་ཐུགས་རྗེ་ཆེ་གཏམ་བཤད་གནང་།

དཔེ་དེབ་དབུ་འབྱེད་ཐོག་ཇི་ནི་ཝ་བོད་རིགས་ཚོགས་པའི་ཚོགས་གཙོ་དང་རྒྱུན་ལས། གཟའ་ཉི་མའི་བོད་ཡིག་སློབ་གྲྭའི་སློབ་ཕྲུག་དང་ཕ་མ་རྣམས་མཉམ་ཞུགས་གནང་ཡོད།

བསྟན་འཛིན་དབང་མོ་ལགས་ཀྱི་རོ་སྒྲུང་ཐོག་མ་ཕ་རཱན་སི་སྐད་ཡིག་ནང་ཕྱི་ལོ་ ༢༠༡༢ ལོར་དཔར་ཐེངས་དང་པོ་དང་། ཕྱི་ལོ་ ༢༠༡༨ ལོར་དཔར་ཐེངས་གཉིས་པ་པར་སྐྲུན་གནང་ཡོད། ཨིན་ཡིག་ནང་ཕྱི་ལོ་ ༢༠༡༥ ལོར་པར་སྐྲུན་གནང་ཡོད། སི་པན་སྐད་ཡིག་ནང་ཕྱི་ལོ་ ༢༠༡༨ ལོར་པར་སྐྲུན་གནང་ཡོད། དེ་བཞིན་ཇར་མན་སྐད་ཡིག་ནང་ཕྱི་ལོ་ ༢༠༢༤ ལོར་པར་སྐྲུན་གནང་ཡོད། །