༄༅། །ཕྱི་ལོ་ ༢༠༢༥ ཟླ་བ་ ༡ ཚེས་ ༣༠ ཉིན་སེ་ཏ་གྷ་ཡ་ག་ཀུན་ (Setagaya Gakuen) སློབ་གྲྭའི་སློབ་སྤྱི་ཟུར་པ་སློབ་དཔོན་ལྦན་ཧ་ཡ་ཤི་ཤུཡི་ (Ven. Hayashi Shuei) ལགས་དང་། སློབ་གྲྭའི་དགེ་ཆེ། ལས་བྱེད། སློབ་ཕྲུག་བཅས་དང་ལྷན་ཉི་འོང་སྐུ་ཚབ་ཁང་དུ་ཕེབས་ཞིང་། ཉེ་ལམ་བོད་ནང་ས་ཡོམ་གྱི་གོད་ཆག་བྱུང་བར་བོད་མི་རྣམས་ལ་གདུང་སེམས་མཉམ་སྐྱེད་གནང་ཡོད།  སློབ་དཔོན་ལྦན་ཧ་ཡ་ཤི་ཤུཡི་ལགས་ཀྱིས་ས་ཡོམ་གྱི་གོད་ཆག་རྐྱེན་གྱིས་གནོད་འཚེ་ཕོག་མཁན་རྣམས་ལ་མྱུར་དུ་དྲག་སྐྱེད་འགྱུར་བའི་སྨོན་འདོན་ཞུས་ཡོད།

དེ་ཡང་སེ་ཏ་གྷ་ཡ་ག་ཀུན་སློབ་གྲྭའི་སློབ་ཕྲུག་ཚོས་བོད་མི་ཆེད་དུ་རོགས་དངུལ་གསོག་སྒྲུབ་ཀྱི་ལས་འགུལ་ཞིག་སྤེལ་གནང་ཡོད་པ་དང་། དེ་ནས་ཞལ་འདེབས་བྱུང་བ་རྣམས་སྐུ་ཚབ་དོན་ཁང་དུ་ཕུལ་ཡོད། སློབ་ཕྲུག་སྐུ་ཚབ་ཞིག་གིས། ས་ཡོམ་གོད་ཆག་གི་གནོད་འཚེ་ཕོག་མཁན་རྣམས་ལ་གདུང་སེམས་མཉམ་སྐྱེད་མཚོན་བྱེད་དུ་ང་ཚོས་ཞལ་འདེབས་ཆུང་ཆུང་ཞིག་བསྡུ་རུབ་བྱེད་ཡོད་ཅེས་གསུངས།

དེ་བཞིན་ཉི་འོང་སྐུ་ཚབ་དོན་གཅོད་འབུམ་རམས་པ་ཨརྱ་ཚེ་དབང་རྒྱལ་པོ་ལགས་ཀྱིས་སེ་ཏ་གྷ་ཡ་ག་ཀུན་སློབ་གྲྭའི་ལས་བྱེད་དང་། སློབ་ཕྲུག་རྣམས་ལ་བོད་མིའི་ཆེད་དུ་ཞལ་འདེབས་བསྡུ་རུབ་གནང་བར་ཐུགས་རྗེ་ཆེ་ཞུས་པ་ཆབས་ཅིག ས་ཡོམ་གྱི་གནས་བབ་སྐོར་གསལ་བཤད་གནང་སྐབས་ས་ཡོམ་དེ་རང་འབྱུང་མ་ཡིན་པར་མིས་བཟོས་པའི་གོད་ཆག་ཅིག་ཡིན་པ་དང་། དེ་བཞིན་རྒྱ་ནག་གཞུང་གིས་ཚད་ལས་འདས་པའི་ཆུ་མཛོད་གསར་རྒྱག་དང་། གཏེར་ཁ་བསྔོག་འདོན་རྐྱེན་གྱིས་བྱུང་བ་ཡིན་ཞེས་གསལ་སྟོན་གནང་རྗེས་སློབ་གྲྭའི་རེ་སྐུལ་ལྟར་བོད་ཀྱི་ལོ་རྒྱུས་དང་། རྒྱ་ནག་གི་བཙན་འཛུལ་བྱས་ཚུལ། དེ་བཞིན་བོད་ནང་ད་ལྟའི་གནས་སྟངས་སྐོར་གསུང་བཤད་གནང་ཡོད།

སྤྱིར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སེ་ཏ་གྷ་ཡ་ག་ཀུན་སློབ་གྲྭར་ཐེངས་གསུམ་ཆིབས་བསྒྱུར་བསྐྱངས་ཏེ་སློབ་ཕྲུག་དང་ལས་བྱེད་རྣམས་ལ་བཀའ་སློབ་སྩལ་ཡོད་པ་བཅས།།