༄༅། །ཡུ་རོབ་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་སྐུ་ཞབས་མོ་ནིར་ས་ཏོ་རི་ (Mounir Satouri) ལགས་ཀྱིས་བོད་ནང་དུ་བྱུང་བའི་ས་ཡོམ་གྱི་གོད་ཆག་འོག་རྐྱེན་འདས་སུ་གྱུར་བ་དང་གནོད་སྐྱོན་ཚབས་ཆེ་ཕོག་པར་ཐུགས་གསོ་གནང་བ་དང་སྦྲགས། ཡུ་རོབ་ནས་བོད་དང་བོད་མིར་རྒྱབ་སྐྱོར་གནང་རྒྱུའི་ཆོད་སེམས་བརྟན་པོ་ཡོད་པ་གསུང་འདུག
ཐུགས་གསོའི་གསུང་འཕྲིན་དེ་བཞིན་ཉེ་ལམ་སྐུ་ཞབས་མོ་ནིར་ས་ཏོ་རི་ལགས་དང་། བེལ་ཇི་ཡམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་རྣམ་གཉིས་དབར་མཇལ་མོལ་བྱུང་བའི་རྗེས་ཡིན་པ་དང་། སྐབས་དེར་སྐུ་ཞབས་མོ་ནིར་ལགས་ཀྱིས་ས་ཡོམ་གྱི་གོད་ཆག་འོག་བོད་ནང་དུ་རྒྱལ་སྤྱིའི་སྤྱི་ཚོགས་ནས་རོགས་རམ་དུས་ཐོག་ཡོང་སླད་རྒྱ་ནག་གཞུང་ནས་བཀག་འགོག་མེད་པར་ངོས་ལེན་དགོས་པ་ནན་བརྗོད་གནང་ཡོད། ཡུ་རོབ་གྲོས་ཚོགས་ངོས་ནས་འགྲོ་བ་མིའི་ཐོབ་ཐང་སྲུང་སྐྱོབ་ཆེད་མུ་མཐུད་བོད་དང་བོད་མིར་རྒྱབ་སྐྱོར་གནང་རྒྱུ་ཡིན་པ་གསུང་འདུག
གདུང་སེམས་མཉམ་སྐྱེད་ཀྱི་གསུང་འཕྲིན་དེར་བེལ་ཇི་ཡམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས། སྐུ་ཞབས་མོ་ནིར་ལགས་ནས་བོད་དོན་ཐོག་རྒྱབ་སྐྱོར་གཡོ་མེད་དང་། གདུང་སེམས་མཉམ་སྐྱེད་གནང་བར་ཐུགས་རྗེ་ཆེ་ཞུས་པ་མ་ཟད། དཀའ་ཚེགས་ཆེ་བའི་དུས་སྐབས་འདིར་བོད་དང་བོད་མིར་རྒྱབ་སྐྱོར་དང་ཐུགས་འཚབ་གནང་བ་འདི་ཡིས་རང་རེའི་མང་ཚོགས་ལ་སྙིང་སྟོབས་དང་རེ་བ་ཆེན་པོ་སྦྱིན་གྱི་ཡོད་པ་གསུང་འདུག
དེ་མཚུངས་ཕ་རན་སིའི་སྲིད་འཛིན་སྐུ་ཞབས་ཨེ་མ་ནུལ་མེག་རོན་མཆོག་དང་། ནེ་དར་ལེནྜ་ཀྱི་ཕྱི་སྲིད་ལྷན་ཁང་། ཡུ་རོབ་སྤྱི་མཐུན་རྒྱལ་ཁབ་ཀྱི་སྐུ་ཚབ་ལྕམ་ཧཌ་ཇ་ལ་བི་བི་ལགས། དེ་བཞིན་ཕ་རན་སིའི་གྲོས་ཚོགས་གོང་མའི་འཐུས་མི། ཡུ་རོབ་གྲོས་ཚོགས་འཐུས་མི། ནང་པའི་ཚོགས་པ་ཁག་བཅས་ནས་གདུང་སེམས་མཉམ་སྐྱེད་དང་རྒྱབ་སྐྱོར་གནང་ཡོད་པ་བཅས།།
