༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བཙན་བྱོལ་བོད་མིའི་འདུ་སྡོད་ས་གནས་ཁག་ཏུ་གཞུང་འབྲེལ་འཚམས་གཟིགས་ཐེངས་གཉིས་རེ་གནང་རྒྱུའི་མཛད་འཆར་ཡོད་པ་བཞིན། ཐེངས་འདིར་དཔལ་ལྡན་སྲིད་སྐྱོང་མཆོག་གིས་རྒྱ་གར་བྱང་ཤར་ཁུལ་དུ་འཚམས་གཟིགས་ཐེངས་གཉིས་པ་དེ་དབུ་འཛུགས་གནང་ཡོད།
དེ་ཡང་ཕྱི་ལོ་ ༢༠༢༥ ཟླ་བ་ ༠༡ ཚེས་ ༢༢ ཉིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དྷི་མ་སྤུར་གནམ་ཐང་དུ་ཕེབས་འབྱོར་སྐབས་དྷི་མ་སྤུར་དུ་གནས་སྡོད་ས་གནས་བོད་མི་རྣམས་ནས་ཕེབས་བསུ་གཟབ་རྒྱས་ཞུས་ཡོད།
མཛད་སྒོའི་ཐོག་མར་ས་གནས་སློབ་ཕྲུག་ཁག་ཅིག་ནས་དཔལ་ལྡན་སྲིད་སྐྱོང་མཆོག་ལ་ཆེ་བསྟོད་ཀྱིས་སྙན་ངག་གྱེར་འདོན་དང་། རྟག་གསལ་སྤྱན་བསྟར་ཞུས་རྗེས་ཕ་མའི་ཚོགས་ཆུང་གི་སྐུ་ཚབ་པདྨ་དབང་ཕྱུག་ལགས་ཀྱིས་ས་གནས་ཀྱི་གནས་སྟངས་སྐོར་ངོ་སྤྲོད་གནང་གྲུབ་མཚམས་དཔལ་ལྡན་སྲིད་སྐྱོང་སྤེན་པ་ཚེ་རིང་གིས་གསུང་བཤད་གནང་དོན། བཙན་བྱོལ་བོད་མིའི་འོས་འདེམས་བྱས་པའི་སྐུ་ཚབ་ཅིག་ཡིན་པའི་ཆ་ནས་བཙན་བྱོལ་བོད་མིའི་འདུ་སྡོད་ས་གནས་ཁག་དང་། ཁ་ཐོར་ས་གནས་ཁག་ཏུ་དུས་བསྟུན་ཕྱོགས་བསྐྱོད་ཀྱིས་མང་ཚོགས་ཀྱིས་གནས་སྟངས་རྒྱུས་ལོན་དང་བདེ་སྡུག་ཁག་ལ་གཟིགས་ཞིབ་བརྒྱུད་བོད་མིའི་སྒྲིག་འཛུགས་དང་ས་གནས་བོད་མི་དབར་འབྲེལ་ལམ་དང་བོད་དོན་འཐབ་རྩོད་གོང་མཐོར་གཏོང་རྒྱུ་གལ་འགངས་ཆེན་པོ་ཡིན་ཞེས་དང་།
བཙན་བྱོལ་བོད་མིའི་གཞིས་ཆགས་ཁག་ཏུ་གནས་སྡོད་རང་རིགས་མང་དག་ཅིག་སོ་སོའི་མི་ཚེའི་མདུན་ལམ་ཆེད་ཕྱི་རྒྱལ་ཡུལ་གྲུ་ཁག་ཏུ་གཞིས་སྤོས་ཀྱི་གནས་སྟངས་དང་འབྲེལ། ཐབས་བྱུས་ལྡན་པའི་ཐོག་ནས་བོད་མིའི་རིག་གཞུང་དང་སྐད་ཡིག་སྲུང་སྐྱོབ་གོང་སྤེལ་སླད་འཛམ་གླིང་ཡུལ་གྲུ་ཁག་ཏུ་གྲམ་ནས་ཡོད་པའི་བོད་མིའི་གྲངས་འབོར་གྱི་གནས་སྟངས་ཤེས་རྟོགས་དགོས་གལ་སྐོར་གསལ་སྟོན་གནང་ཡོད།
ཕྱོགས་མཚུངས་བོད་ཀྱི་སྐད་ཡིག་དང་བོད་བརྒྱུད་ནང་བསྟན་གྱི་གལ་གནད་སྐོར་དང་འབྲེལ་དཔལ་ལྡན་སྲིད་སྐྱོང་མཆོག་གིས་བོད་མི་མང་ཚོགས་ནས་རང་མི་རིགས་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་།སྐད་ཡིག་མི་ཉམས་རྒྱུན་འཛིན་བྱ་རྒྱུའི་གནད་འགག་སྐོར་གསུང་བཤད་གནང་བ་དང་སྦྲགས། འཛམ་གླིང་ཞི་བདེ་བསྐྲུན་རྒྱུར་ནུས་པ་ལྡན་པའི་ནང་པའི་ཆོས་འདི་བཞིན་བོད་པ་ཙམ་མ་ཡིན་པར་ཧི་མ་ལ་ཡའི་རི་རྒྱུད་དང་། རྒྱལ་སྤྱིའི་ནང་པའི་སྤྱི་ཚོགས་ཁྲོད་ཤུགས་རྐྱེན་ཆེན་པོ་ཡོད་པ་ནན་བསྐུལ་གནང་ཡོད།
གཞན་ཡང་དཔལ་ལྡན་སྲིད་སྐྱོང་མཆོག་གིས་དང་བླངས་བོད་དོན་ཞུ་གཏུག་ལས་འགུལ་གྱི་གྲུབ་འབྲས་དང་། ལས་གཞི་སྐོར་ངོ་སྤྲོད་དང་འབྲེལ་ཉེ་ལམ་ཨ་རིའི་སྲིད་གཞུང་གིས་གཏན་འབེབས་གནང་བའི་བོད་རྒྱའི་རྩོད་རྙོག་གི་ཁྲིམས་ཡིག་གི་གལ་གནད་སྐོར་གསུངས། ཁོང་གིས་བོད་དོན་འཐབ་རྩོད་ཀྱི་འབད་རྩོལ་ཤུགས་ཆེར་གཏོང་ཆེད་སྒྲིག་འཛུགས་ཀྱི་སྒྲོམ་གཞི་ཚགས་ཚུད་དང་། ལས་བྱེད་ཀྱི་ནུས་རྩལ་གོང་སྤེལ་གཏོང་རྒྱུ་གལ་ཆེན་པོ་ཆགས་ཡོད། ཅེས་གསུངས་ཏེ་བཀའ་ཤག་གི་ལས་གཞི་མང་པོའི་ཁྲོད་བོད་ཀྱི་གྲངས་འཛིན་དཔེ་མཛོད་གསར་བཟོའི་ལས་གཞི་དང་། ཁྱིམ་ཐོ་ཞིབ་བཤེར། སྲི་ཞུའི་ལས་བྱེད་རྣམས་ཀྱི་ནུས་རྩལ་མཐོར་འདེགས་བཅས་ཀྱི་སྐོར་ངོ་སྤྲོད་ཞིབ་ཕྲ་གནང་ཡོད།
གཞན་ཡང་དཔལ་ལྡན་སྲིད་སྐྱོང་མཆོག་གིས་བོད་རྒྱའི་རྩོད་རྙོག་གི་ཐབས་ལམ་ནི་དབུ་མའི་ལམ་ཡིན་པ་དང་། བོད་མི་རྣམས་ནས་འཛམ་གླིང་གི་ཆབ་སྲིད་འགྱུར་ལྡོག་ལ་དོ་སྣང་བྱ་རྒྱུ། སྤྱི་ཚོགས་ནང་ཁུལ་ཆབ་སྲིད་ཀྱི་ལྟ་བ་མཐུན་མིན་ལ་མ་ལྟོས་པར་མཐུན་ལམ་ཟོང་ཁ་ཆིག་སྒྲིལ་དགོས་རྒྱུ་བཅས་ནི་བོད་མིའི་འཐབ་རྩོད་དང་། རང་དབང་ཆེད་གལ་ཆེན་པོ་ཡིན་པ་ནན་བརྗོད་གནང་མཐར་དྷི་མ་སྤུར་བོད་མིའི་གཞིས་ཆགས་ནས་རང་ཁ་རང་གསོ་ཐོག་ནས་གནས་ཐུབ་པར་བསྔགས་བརྗོད་གནང་ཡོད།
གསུང་བཤད་ལས་རིམ་འདིའི་ཐོག་ས་གནས་རང་བདེན་ཚོགས་ཆུང་གི་ཚོགས་གཙོ་དབང་ཆེན་མགོན་པོ་ལགས་དང་། ཤི་ལོང་ས་གནས་འགོ་འཛིན་ལས་ཁུངས་ཀྱི་ལས་དྲུང་། ས་གནས་འོས་བསྡུ་ཚོགས་མི་རྣམ་པ། སློབ་གྲྭའི་དགེ་རྒན་བཅས་ལྷན་ཞུགས་གནང་ཡོད། རྒྱ་གར་བྱང་ཤར་ཁུལ་གྱི་འཚམས་གཟིགས་སྐབས་དཔལ་ལྡན་སྲིད་སྐྱོང་མཆོག་དང་ལྷན་དུ་ནང་སྲིད་ལས་ཁུངས་ཀྱི་དྲུང་གཞོན་བསོད་ནམས་སྟོབས་རྒྱལ་ལགས་དང་དྲུང་ལས་དབུ་མ་འཕྲིན་ལས་ལགས་ལྷན་བཅར་ཞུས་ཡོད་པ་རེད། །
