༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་སྲིད་འཛིན་སྐུ་ཞབས་ཌོ་ནལ་ཊམ་མཆོག་ནས་ཨ་རིའི་སྲིད་འཛིན་གྱི་དམ་འབུལ་ཞུས་པ་དང་། སྐུ་ཞབས་མར་ཀོ་རུ་བྷིའོ་མཆོག་ཨ་རིའི་ཕྱི་སྲིད་དྲུང་ཆེ་བསྐོ་བཞག་བྱུང་བར་འཚམས་འདྲི་ཞུས་གནང་ཡོད།
དེ་ཡང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྐུ་ཞབས་ཌོ་ནལ་ཊམ་མཆོག་ལ་འཚམས་འདྲི་ནང་འཁོད་དོན། སྐུ་ཉིད་ཀྱིས་འཛམ་གླིང་གི་དཀའ་ངལ་ཐོག་ཐུགས་ཁུར་དང་། མང་གཙོའི་གཞི་རྩའི་རིན་ཐང་སྲུང་སྐྱོབ་གནང་བར་བསྔགས་བརྗོད་ཞུ་བཞིན་ཡོད། ཁྱེད་ཀྱི་ལས་ཡུན་རིང་ཨ་རིའི་རྒྱལ་ཁབ་ནས་རང་དབང་དང་། མང་གཙོའི་ལམ་ལུགས་འཛམ་གླིང་ཡོངས་ལ་མུ་མཐུད་ཁྱབ་སྤེལ་གནང་རྒྱུའི་རེ་བ་ཡོད་ཅེས་གསུངས།
དེ་བཞིན་དཔལ་ལྡན་སྲིད་སྐྱོང་མཆོག་གིས་ཨ་རིའི་སྲིད་གཞུང་ནས་བོད་དོན་ཐོག་རྒྱབ་སྐྱོར་མུ་མཐུད་གནང་བར་ངོས་འཛིན་དང་། དེ་ནི་ཨ་རི་དང་བོད་བར་གྱི་མཉམ་ལས་བརྟན་པོ་མཚོན་གྱི་ཡོད་པ་གསལ་སྟོན་གནང་། ཨ་རིའི་སྲིད་གཞུང་ནས་བོད་མིར་རྒྱབ་སྐྱོར་གཡོ་མེད་གནང་བ་དེས་བོད་མི་རྣམས་ལ་དཀའ་ཚེགས་ཆེ་བའི་དུས་སུ་རེ་བ་དང་། སྤོབས་པ་སྤེལ་བར་རྒྱབ་སྐྱོར་གནང་ཡོད་པས་ཐུགས་རྗེ་ཆེ་ཞུས་ཡོད།
མཐར་དཔལ་ལྡན་སྲིད་སྐྱོང་མཆོག་གིས་སྐུ་ཞབས་ཊམ་མཆོག་གིས་ཕྱི་ལོ་ ༢༠༢༠ ལོར་བོད་ཀྱི་སྲིད་བྱུས་དང་། རྒྱབ་སྐྱོར་ཁྲིམས་འཆར་ལ་མཚན་རྟགས་བཀོད་པར་ཐུགས་རྗེ་ཆེ་ཞུས་ཡོད་པ་རེད།
དེ་མཚུངས་དཔལ་ལྡན་སྲིད་སྐྱོང་མཆོག་གིས་སྐུ་ཞབས་མར་ཀོ་རུ་བྷིའོ་མཆོག་ཨ་རིའི་ཕྱི་སྲིད་དྲུང་ཆེ་བསྐོ་བཞག་བྱུང་བར་འཚམས་འདྲི་ཞུས་ཏེ། ཨ་རིའི་གྲོས་ཚོགས་ནང་ཁོང་གི་ལས་ཡུན་རིང་བོད་དོན་ལ་རྒྱབ་སྐྱོར་དང་། བོད་རྒྱ་རྩོད་རྙོག་གི་གནད་དོན་ལ་ཐུགས་ཁུར་གནང་བར་ངོས་འཛིན་ཞུས་ཡོད། སྐུ་ཞབས་རུ་བྷིའོ་མཆོག་གིས་ལས་ཡུན་རིང་ཨ་རི་དང་བོད་བར་གྱི་འབྲེལ་བ་དམ་ཟབ་གཏོང་བ་མ་ཟད། རང་དབང་དང་། མང་གཙོ། འགྲོ་བ་མིའི་ཐོབ་ཐང་བཅས་ཐུན་མོང་གི་རིན་ཐང་དེ་དག་སྲུང་སྐྱོབ་བྱ་རྒྱུའི་རེ་བ་ཡོད་ཅེས་གསུངས།
དཔལ་ལྡན་སྲིད་སྐྱོང་མཆོག་གིས་ཨ་རི་དང་བོད་གཉིས་ཀྱི་འབྲེལ་བ་དང་། བོད་མིའི་ཐོབ་ཐང་སྲུང་སྐྱོབ་སླད་ཨ་རིའི་འགོ་ཁྲིད་ཀྱི་ནུས་ཤུགས་གལ་ཆེན་པོ་ཡིན་སྐོར་ནན་བརྗོད་གནང་ཡོད། ཁོང་གིས་སྐུ་ཞབས་ཊམ་མཆོག་དང་། སྐུ་ཞབས་རུ་བྷིའོ་མཆོག་རྣམ་གཉིས་སོ་སོའི་ལས་གནས་ཐོག་འཚམས་འདྲི་ཞུས་པ་དང་སྦྲགས། རང་དབང་དང་། དྲང་བདེན། འགྲོ་བ་མིའི་ཐོབ་ཐང་བཅས་ཀྱི་ཐོག་མཉམ་ལས་གནང་རྒྱུའི་རེ་བ་བཏོན་གནང་ཡོད་པ་བཅས།།
