༄༅། །བོད་མིའི་སྒྲིག་འཛུགས་ཀྱི་ཉི་འོང་སྐུ་ཚབ་དོན་གཅོད་ལས་ཁུངས་ནས་ཡུལ་དེའི་མང་ཚོགས་ཁྲོད་བོད་དོན་གོ་རྟོགས་ཀྱི་ལས་འགུལ་ལ་དམིགས་ཏེ་ཕྱི་ལོ་ ༢༠༢༥ ཟླ་བ་ ༠༡ ཚེས་ ༡༩ ཉིན་ཊོག་ཀྱོ་གཙུག་ལག་སློབ་གཉེར་ཁང་གི་སློབ་མ་ཨི་ནུ་མཱ་ས་ཏ་ཀ་ (Itnui Masataka) ལགས་ཀྱིས་རྒྱ་གར་ལྷོ་ཕྱོགས་ཧོན་སུར་བོད་མིའི་གཞིས་ཆགས་སུ་རྟེན་གཞི་བྱས་པའི་དཔལ་ལྡན་སྨད་རྒྱུད་གྲྭ་ཚང་དུ་བོད་ཀྱི་སྐད་ཡིག་དང་ནང་དོན་རིག་པའི་ཟླ་དྲུག་ཟབ་ཁྲིད་ཐོག་མཉམ་ཞུགས་ཀྱིས་སློབ་གཉེར་གནང་བའི་ཉམས་མྱོང་སྐོར་གསུང་བཤད་གནང་བའི་ལས་རིམ་ཞིག་གོ་སྒྲིག་གནང་ཡོད།
དེ་ཡང་ཐོག་མར་ཉི་འོང་སྐུ་ཚབ་དོན་གཅོད་འབུམ་རམས་པ་ཨརྱ་ཚེ་དབང་རྒྱལ་པོ་ལགས་ཀྱིས་ཚོགས་ཞུགས་པ་རྣམས་ལ་འཚམས་འདྲི་དང་འབྲེལ། ཨི་ནུ་མཱ་ས་ཏ་ཀ་ལགས་ཀྱིས་ཊོག་ཀྱོ་གཙུག་ལག་སློབ་གཉེར་ཁང་དང་། ཉི་འོང་དོན་ཁང་གིས་གོ་སྒྲིག་གནང་བའི་སྐད་ཡིག་འཛིན་གྲྭ་བཅས་ནས་བོད་ཡིག་སློབ་གཉེར་གནང་ཞིང་། དེ་རྗེས་རྒྱ་གར་ལྷོ་ཕྱོགས་སྨད་རྒྱུད་གྲྭ་ཚང་དུ་ཟླ་དྲུག་བོད་ཀྱི་སྐད་ཡིག་དང་ནང་དོན་རིག་པའི་ཟབ་ཁྲིད་ཐོག་ལྷན་ཞུགས་ཀྱིས་སློབ་གཉེར་གནང་བའི་བརྒྱུད་རིམ་ངོ་སྤྲོད་གནང་ཡོད། ཕྱོགས་མཚུངས་སྐུ་ཚབ་དོན་གཅོད་ཀྱིས་ལྡི་ལི་བོད་ཁང་ནས་གོ་སྒྲིག་གནང་བཞིན་པའི་དྲྭ་ཐོག་བརྒྱུད་ནཱ་ལེནྡྲའི་ལག་འཁྱེར་ (Online Nalanda Certificate) དང་། ཌིབ་ལོ་མ་སློབ་སྦྱོང་ (Diploma Course) བཅས་ཀྱི་སྐོར་འགྲེལ་བརྗོད་གནང་།
དེ་ནས་ཨི་ནུ་མཱ་ས་ཏ་ཀ་ལགས་ཀྱིས་ཐོག་མར་བོད་ནང་ས་ཡོམ་གྱི་གནོད་སྐྱོན་ཕོག་པའི་བོད་མི་རྣམས་ལ་ཤེས་རབ་སྙིང་པོ་གསུང་འདོན་གནང་གྲུབ་མཚམས་སྨད་རྒྱུད་སྨད་གྲྭ་ཚང་ནང་སློབ་གཉེར་གནང་བའི་ཉམས་མྱོང་དང་། བོད་བརྒྱུད་ནང་བསྟན་གྱི་ནང་ཆོས་སློབ་ཁྲིད་ཐབས་ལམ་ལ་ཡི་རང་བསྔགས་བརྗོད་གནང་ཡོད།
དེ་བཞིན་ཁོང་གིས་དཔལ་ལྡན་སྨད་རྒྱུད་གྲྭ་ཚང་གི་ལོ་ ༡༦ རིང་གི་བསླབ་གཞི་རིམ་པའི་སྐོར་འགྲེལ་བརྗོད་གནང་ཡོད་པ་མ་ཟད། སཱི་ཤེས་ཡོན་སློབ་གསོའི་སྐོར་དང་འབྲེལ། ནུབ་ཕྱོགས་རྒྱལ་ཁབ་ཁག་གིས་སཱི་ཤེས་ཡོན་སློབ་གསོ་འདི་བཞིན་ཚན་རིག་དང་མཐུན་པ་གང་ཞིག་བྱམས་སྙིང་རྗེའི་བསླབ་གཞི་ལྟ་བུར་ངོས་འཛིན་བྱེད་བཞིན་པ་གསུངས།
གཞན་ཡང་འདུ་འཛོམས་ཐོག་སྐུ་ཚབ་དོན་གཅོད་འབུམ་རམས་པ་ཨརྱ་ཚེ་དབང་རྒྱལ་པོ་ལགས་ཀྱིས་ཉེ་ཆར་བོད་ནང་ས་ཡོམ་གྱི་གནས་ཚུལ་སྐོར་འགྲེལ་བརྗོད་གནང་སྐབས་མི་སྒེར་དང་། ཚོགས་པ་ཁག་གི་རེ་འདུན་ལྟར་བོད་མི་ཚོར་གདུང་སེམས་མཉམ་སྐྱེད་མཚོན་ཆེད་ཉི་འོང་སྐུ་ཚབ་དོན་ཁང་ནས་ཞལ་འདེབས་བསྡུ་རུབ་བྱ་རྒྱུ་གོ་སྒྲིག་གནང་ཡོད་སྐོར་དང་། རོགས་དངུལ་དེ་དག་འབྱོར་ཡུལ་དུ་ཕུལ་རྗེས་མང་ཚོགས་ལ་བརྡ་ལན་བྱ་རྒྱུ་ཡིན་སྐོར་གསུངས།
གསུང་བཤད་ལས་རིམ་དེ་བཞིན་ཉི་འོང་སྐུ་ཚབ་དོན་ཁང་གི་ལས་བྱེད་ཧ་སེ་ག་ལྦ་ན་ཀོ་ (Hasegawa Naoko) ལགས་ཀྱིས་གཙོ་སྐྱོང་གནང་ཞིང་། ཚོགས་བཅར་བ་རྣམས་ལ་སྐུ་ཚབ་དོན་ཁང་གི་ངོ་སྤྲོད་དེབ་ཆུང་འགྲེམས་སྤེལ་གནང་ཡོད་པ་བཅས།།
