༄༅། །ཕྱི་ལོ་ ༢༠༢༥ ཟླ་བ་ ༡ ཚེས་ ༡༧ ཉིན་ཧུ་ཀྲའོ་ཐེབས་རྩ་ཚོགས་པ་དང་རྒྱ་ནག་མང་གཙོ་ཚོགས་པས་མཉམ་འབྲེལ་ཐོག་ཀྲའོ་ཙི་ཡང་འདས་པོའི་ལོ་ཉི་ཤུ་འཁོར་བའི་དྲན་གསོའི་འགྲོ་གླེང་ཚོགས་འདུ་བསྐོངས་བའི་ཐོག བྱང་ཨ་རིའི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་མགྲོན་འབོད་ལྟར་ཚོགས་འདུར་མཉམ་ཞུགས་གནང་ཡོད།
ཚོགས་འདུའི་གཙོ་སྐྱོང་བ་པེ་ཅིན་དཔྱིད་ཀའི་དུས་དེབ་ཀྱི་རྩོམ་སྒྲིག་པ་གྲགས་ཅན་སྐུ་ཞབས་ཧུ་ཕིན་ལགས་ནས་གནང་བ་དང་། རྒྱ་ནག་མང་གཙོ་ཚོགས་པའི་ཚོགས་གཙོ་ཝང་ཅུན་ཐའོ་ལགས་དང་རྒྱ་རིགས་ཤེས་ཡོན་ཅན་མང་པོ་མཉམ་ཞུགས་གནང་བའི་ཁྲོད། སྐུ་ཞབས་ཆིན་ཅིན་ལགས། ཀྲང་ཅེ་ལགས། ཀྲེང་ཞུ་གུང་ལགས། ཝུན་གུན་ཀྲུང་ལགས། ཞང་ཞའོ་ཅི་ལགས། རོང་ཝེ་ལགས། གུ་ཝེ་ཆུན་ལགས། ཝན་ཡེན་ཧེ་ལགས། ཧོ་པིན་ལགས་སོགས་ཕེབས་ནས་ཀྲའོ་ཙི་ཡང་གི་མི་ཚེའི་ལྟ་བ་དང་། སྲི་ཞུ་ཞབས་འདེགས། ཤུགས་རྐྱེན་སོགས་ཀྱི་སྐོར་གྲོས་བསྡུར་གནང་བ་མ་ཟད། ཨ་རྒྱའི་འབྲེལ་བ་དང་རྒྱ་ནག་མང་གཙོའི་ལས་འགུལ་གྱི་འབྱུང་འགྱུར་གྱི་གནས་བབ་སོགས་ཀྱི་སྐོར་ལ་བསམ་ཚུལ་བརྗེ་རེས་གནང་ཡོད།
ཚུལ་ཁྲིམས་རྒྱ་མཚོ་ལགས་ཀྱིས་བོད་མིའི་སྒྲིག་འཛུགས་ཀྱིས་རྒྱ་རིགས་འབྲེལ་མཐུད་ཀྱི་ལས་དོན་ལ་རྟག་ཏུ་གལ་ཆེན་པོར་བརྩིས་ནས་རྒྱ་རིགས་འབྲེལ་མཐུད་པའི་ལས་གནས་ས་གནས་གསུམ་ལ་སྔར་བཞིན་ལས་དོན་གྲུབ་བཞིན་ཡོད་པ་དང་། ཁོང་གིས་མི་རབས་གསར་པའི་བོད་མི་ཚོས་ཧུ་ཡའོ་པང་དང་ཀྲའོ་ཙི་ཡང་གི་དུས་སྐབས་བརྒྱུས་མ་མྱོང་ཡང་། ཡིག་ཆ་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་བརྒྱུད་ནས་ལོ་རྒྱུས་དེ་དག་ཤེས་རྟོགས་བྱུང་བ་གསུངས།
ཁོང་གིས་ཧུ་ཡའོ་པང་དང་ཀྲའོ་ཙི་ཡང་གིས་དུས་སྐབས་སུ་སྲིད་བྱུས་ལྷུག་ཏུ་གཏོང་བ། རྒྱ་རིགས་ལས་བྱེད་ཕྱིར་འཐེན། བོད་ནང་དམ་བསྒྲགས་ཉུང་དུ་གཏོང་བ་སོགས་ཀྱི་གུ་ཡང་སྲིད་བྱུས་ལག་བསྟར་གནང་ཐབས་བྱས་ཡོད་ཀྱང་། སྐབས་དེའི་རྒྱ་ནག་དམར་ཤོག་གཞུང་གི་དབང་ཆའི་འཐབ་རྩོད་ཁྲོད་བོད་རྒྱའི་གནད་དོན་སེལ་བའི་གོ་སྐབས་བཟང་ཤོས་ཤིག་ཤོར་བ་ངོ་སྤྲོད་ཞུས།
ཉེ་ཆར་བོད་ཀྱི་དིང་རི་ས་ཁུལ་དུ་བྱུང་བའི་ས་ཡོམ་སྐོར་ལ། ཚུལ་ཁྲིམས་རྒྱ་མཚོ་ལགས་ཀྱིས་གནོད་འཚེ་འདིས་རྒྱ་ནག་དམར་ཤོག་གཞུང་གིས་བོད་ནང་འཛུགས་སྐྲུན་ཡར་རྒྱས་བཏང་བའི་བསྒྲགས་གཏམ་ཁག་གི་རྫུན་རྐུབ་བཏོལ་བ་འགྲེལ་བརྗོད་ཞུས་པ་དང་། གནོད་འཚེ་བྱུང་བའི་བརྙན་པར་ཕྱི་ལ་ཁྱབ་པའི་ནང་། ས་གནས་བོད་མི་ཚོའི་སྡོད་ཁང་ཧ་ཅང་མང་པོ་བཤིག་རལ་ཕྱིན་ཡོད་པ་ནི་ཁང་བཟོའི་སྤུས་ཚད་ཞན་པོའི་ལས་གཞི་ཡིན་པ་མཐོང་ཐུབ་པ། མདོ་དབུས་ཁམས་གསུམ་གྱི་བོད་མི་ཚོས་རང་འགུལ་གྱིས་རོགས་སྐྱོབ་ཀྱི་ལས་འགུལ་སྤེལ་སྐབས། རྒྱ་ནག་གཞུང་ཕྱོགས་ནས་བོད་མིའི་མཐུན་སྒྲིལ་གྱི་ནུས་པར་འཇིག་སྣང་སྐྱེས་ནས་རོགས་སྐྱོབ་ལས་འགུལ་ལ་འགོག་རྐྱེན་བཟོས་བཞིན་ཡོད་པ་འབྲེལ་བརྗོད་བྱས། ཁོང་གིས་བོད་ཀྱི་ས་བབ་ཆགས་སྟངས་ཐོག་ནས་བོད་ནི་ས་འགུལ་ཡང་སེ་བྱུང་སའི་ས་ཁུལ་ཡིན་པ་དང་། ཆུ་རགས་གློག་མཛོད་ཀྱི་ལས་གཞི་ཆེན་པོ་རྒྱག་པ་དེས་ས་གནས་བོད་མིའི་བདེ་འཇགས་ལ་ཉེན་ཁ་བཟོ་བ་མ་ཟད། ཨེ་ཤའི་ནང་གི་ཁྱིམ་མཚེས་རྒྱལ་ཁབ་ཁག་ལའང་གནོད་འཚེའི་ཉེན་ཁ་ཆེན་པོ་བཟོ་སྲིད་པ་བཤད།
རྒྱ་རིགས་འབྲེལ་མཐུད་པས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་ལམ་སྟོམ་འོག བོད་རྒྱའི་དབར་མི་རབས་ནས་མི་རབས་བར་འཚེ་བའི་གནས་སྟངས་སུ་མ་ལྷུང་བ་བྱུང་ཡོད་པའི་གནས་འགག་ཤེས་པའི་ཐོག་ནས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་འཚེ་མེད་ཞི་བའི་ལྟ་བ མ་བརྗེད་པར། བོད་རྒྱའི་འབྲེལ་བ་མུ་མཐུད་གོང་འཕེལ་གཏོང་བའི་འབོད་སྐུལ་ཞུས་པ་དང་བཅས། །
