༄༅། །ཕྱི་ལོ་ ༢༠༢༥ ཟླ་བ་ ༡ ཚེས་ ༡༦་ཉིན་བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་ཨི་ཊ་ལི་གྲོས་ཚོགས་ནང་གཟིགས་སྐོར་གནང་ཡོད་པ་དང་། སྐབས་དེར་མཉམ་འབྲེལ་རྒྱལ་ཚོགས་ཀྱི་འབྲེལ་མཐུད་པ་ཕུན་ཚོགས་སྟོབས་རྒྱལ་ལགས་དང་། ཨི་ཊ་ལི་བོད་རིགས་ཚོགས་པའི་ཚོགས་གཙོ་གཞོན་པ་ཉི་མ་དོན་གྲུབ་ལགས་ལྷན་བཅར་ཞུས་ཡོད།
ཨི་ཊ་ལི་ཕྱི་སྲིད་བློན་ཆེན་གཞོན་པ་ཟུར་པ་སྐུ་ཞབས་གྷེ་ནི་(Gianni Vernetti) ལགས་ཀྱིས་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང་གྲོས་ཚོགས་འཐུས་མི་སྐུ་ཞབས་ཌི་པི་རི་མོ་(Andrea De Priamo) ལགས་ངོ་སྤྲོད་གནང་ཡོད་པ་དང་། ཚོགས་འདུའི་སྐབས་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་བོད་ནང་གི་ད་ལྟའི་གནས་སྟངས་སྐོར་ཞིབ་ཕྲ་སྙན་སེང་ཞུས་པའི་ནང་། རྒྱ་ནག་གི་བཙན་འོག་ཏུ་བོད་མིའི་དཀའ་ངལ་མུ་མཐུད་གནས་ཡོད་པས་གནས་སྟངས་ལ་འགྱུར་བ་གང་ཡང་ཕྱིན་མེད་སྐོར་ནན་བརྗོད་གནང་ཡོད།
ཨི་ཊ་ལི་ཕྱི་སྲིད་བློན་ཆེན་གཞོན་པ་ཟུར་པ་སྐུ་ཞབས་གྷེ་ནི་མཆོག་གིས་ཉེ་ཆར་བོད་ནང་ས་ཡོམ་བྱུང་བའི་སྐོར་ལའང་ཐུགས་འཚབ་གསལ་འདོན་གནང་ཡོད་པ་མ་ཟད། གོད་ཆག་དེའི་འོག་ནས་རྐྱེན་འདས་སུ་སོང་བའི་བོད་མི་ཚོར་རྒྱ་ནག་གཞུང་གི་ངོས་ནས་གུན་སྐྱོབ་དང་། འཕྲོད་བསྟེན་སོགས་ཀྱི་མཐུན་འགྱུར་འདང་ངེས་ཤིག་གནང་ཡོད་མེད་སོགས་ཀྱི་ཐད་གནས་ཚུལ་ཕྱི་གསལ་ནང་གསལ་མེད་པའི་གནས་སྟངས་ལ་ཐུགས་འཚབ་གནང་ཡོད།
དེ་བཞིན་ཁོང་གིས་རྒྱལ་སྤྱིའི་གསར་འགྱུར་བརྒྱུད་ལམ་ཁག་ས་གནས་དེར་འགྲོ་རྒྱུར་བཀག་འགོག་བྱས་ཡོད་པ་དེས་དངོས་ཡོད་གནས་སྟངས་གང་འདྲ་ཡོད་མེད་གསལ་པོ་མེད་པའི་གནས་སྟངས་ཆགས་ཡོད་པ་གསལ་འདོན་གནང་རྗེས། སྐུ་ཞབས་ཌི་པི་རི་མོ་ལགས་ལ་ཨི་ཊ་ལི་གཞུང་གིས་རྒྱ་ནག་གཞུང་ལ་གནོན་ཤུགས་སྤྲད་དེ་ས་ཡོམ་གྱི་རྗེས་འབྲས་དང་། བོད་མི་ཚོར་གུན་སྐྱོབ་ཀྱི་མཐུན་འགྱུར་གནང་ཕྱོགས་ཐད་གནས་ཚུལ་ཕྱི་གསལ་ནང་གསལ་ཡོང་ཐབས་སུ་རྒྱབ་སྐྱོར་གནང་དགོས་པའི་འབོད་སྐུལ་ཡང་གནང་ཡོད་པ་རེད།
དེ་རྗེས་ཕྱི་དྲོ་ཚོུད་ ༣ ཐོག་བཀའ་བློན་རྒྱ་རི་སྒྲོལ་མ་མཆོག་དང་གྲོས་ཚོགས་གོང་མའི་འཐུས་མི་ལྕམ་སྐུ་ཨི་ལེ་ནི་ཡ་མཇལ་འཕྲད་ཀྱིས་གྲོས་མོལ་གནང་སྐབས་བཀའ་བློན་རྒྱ་རི་སྒྲོལ་མ་མཆོག་གིས་སྔ་དྲོ་གྲོས་ཚོགས་འཐུས་མི་གཞན་རྣམས་དང་ལྷན་བཀའ་མོལ་གནང་བ་ཁག་དང་གཅིག་མཚུངས་ཀྱི་གནད་དོན་ཁག་ངོ་སྤྲོད་གནང་ཡོད། སྐབས་དེར་གྲོས་ཚོགས་གོང་མའི་འཐུས་མི་ལྕམ་སྐུ་ཨི་ལེ་ནི་ཡ་(Ilenia Malavasi) མཆོག་གིས་བོད་ནང་གི་བོད་ཕྲུག་ཚོར་ཤེས་ཡོན་སློབ་གསོའི་ཐོབ་ཐང་དང་། བོད་པའི་སློབ་ཕྲུག་ཚོར་རྒྱ་ནག་གི་མི་སེར་སྤེལ་ཡུལ་གྱི་ལམ་ལུགས་ལག་བསྟར་བྱས་པའི་བཅའ་སྡོད་སློབ་གྲྭའི་དཀའ་ངལ་སེལ་ཐབས་སུ་རྒྱབ་སྐྱོར་གནང་རྒྱུའི་གྲོས་ཆོད་གཏན་འབེབས་ཡོང་ཐབས་སུ་ཨི་ཊ་ལིའི་གྲོས་ཚོགས་ནང་གླེང་སློང་གནང་རྒྱུའི་ཞལ་བཞེས་གཙང་མ་གནང་།
མཐར་བཀའ་བློན་རྒྱ་རི་སྒྲོལ་མ་མཆོག་གིས་ཨི་ཊ་ལི་གཞུང་ནས་བོད་དོན་ལ་རྒྱབ་སྐྱོར་ཡུན་རིང་གནང་བར་ཐུགས་རྗེ་ཆེ་ཞུས་པ་དང་། བོད་མིའི་བདེ་དོན་ཆེད་མུ་མཐུད་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུས་གནང་ཡོད།
ཚོགས་འདུ་མཇུག་བསྒྲིལ་སྐབས་བཀའ་བློན་མཆོག་ནས་མ་འོངས་མཉམ་ལས་བྱེད་ཕྱོགས་དང་། དེ་བཞིན་ད་བར་རྒྱབ་སྐྱོར་གནང་བར་ཐུགས་རྗེ་ཆེ་ཞུས། །
