༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་ཨུ་ཛི་རཱ་ཛེ་ཡ་(Uzra Zeya) མཆོག་ལ་ཐུགས་རྗེ་ཆེ་ཞུའི་འཚམས་འཕྲིན་ཞིག་ཕུལ་ཡོད།
དེ་ཡང་འཚམས་འཕྲིན་ནང་དཔལ་ལྡན་སྲིད་སྲིད་སྐྱོང་མཆོག་གིས་སྐུ་ཞབས་ཇོ་བྷ་ཡི་ཌན་མཆོག་གིས་བོད་དོན་དམིགས་བསལ་འབྲེལ་མཐུད་པ་མགྱོགས་མྱུར་བསྐོ་བཞག་གནང་བར་ཐུགས་རྗེ་ཆེ་ཞུས་པ་དང་། དེ་བཞིན་འཛམ་གླིང་གི་ཆབ་སྲིད་དང་། དཔལ་འབྱོར། ཐབས་བྱུས་བཅས་ཀྱི་འཕེལ་རིམ་འགྱུར་བ་འགྲོ་བཞིན་པའི་དུས་སྐབས་འདིར་སྲིད་གཞུང་གི་དབུ་ཁྲིད་ལམ་སྟོན་མིག་དཔེ་འོས་པ་ཞིག་གནང་བར་བཀའ་དྲིན་ཆེ་ཞུས་ཡོད།
དེ་མཚུངས་དཔལ་ལྡན་སྲིད་སྐྱོང་མཆོག་གིས་ལྕམ་ཨུ་ཛི་རཱ་ཛེ་ཡ་མཆོག་ལ་ཨ་རི་དང་བོད་དབར་གྱི་འབྲེལ་ལམ་ཤུགས་ཆེ་རུ་གཏོང་བར་ཐུགས་རྗེ་ཆེ་ཞུས་པ་དང་འབྲེལ་གསུང་དོན། ཁྱེད་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཐེངས་མང་མཇལ་འཕྲད་གནང་བ་དང་། བོད་མིའི་སྒྲིག་འཛུགས་ཀྱི་དབུ་ཁྲིད་རྣམ་པ་དང་། དེ་བཞིན་དྷ་རམ་ས་ལར་ཕེབས་པ་བཅས་ཀྱིས་ང་ཚོའི་མི་མང་ལ་རེ་བ་གསར་པ་བསྐྲུན་པ་ཙམ་མ་ཟད། བོད་རྒྱའི་རྩོད་རྙོག་སེལ་ཐབས་སུ་འཚེ་མེད་ཞི་བ་དང་། ཕན་ཚུན་གཉིས་ཕན། གྲོས་མོལ་བཅས་ཀྱི་ཐབས་ལམ་ཐོག་ནས་ང་ཚོའི་ཐབས་རྩོད་མདུན་སྐྱོད་བྱེད་ཐུབ་པ་བྱུང་ཡོད། ཅེས་གསུངས།
དེ་ནས་དཔལ་ལྡན་སྲིད་སྐྱོང་མཆོག་གིས་བོད་རྒྱའི་རྩོད་རྙོག་སེལ་བའི་ཁྲིམས་ཡིག་དེར་ཨ་རིའི་གྲོས་ཚོགས་ཕྱོགས་གཉིས་ཀའི་རྒྱབ་སྐྱོར་ཤུགས་ཆེན་པོ་གནང་བ་དང་། སྲིད་འཛིན་བྷ་ཡི་ཌན་མཆོག་གིས་ཁྲིམས་ཡིག་ཏུ་གཏན་འབེབས་གནང་བ་དེས་རྒྱལ་སྤྱིའི་འབད་བརྩོན་ལ་སྐུལ་འདེད་གཏོང་བའི་གལ་གནད་ཆེན་པོ་ཆགས་ཡོད་པ་གསུངས།
དེ་བཞིན་ཁོང་གིས། ང་ཚོས་བོད་དོན་དང་འབྲེལ་བའི་གཏན་འབེབས་བྱུང་བའི་ཁྲིམས་ཡིག་འདི་ལག་བསྟར་ཐད་རྗེས་མའི་སྲིད་གཞུང་དང་ལྷན་ལས་དོན་སྤེལ་རྒྱུར་རེ་བ་ཞུ་བཞིན་ཡོད། ཅེས་འཁོད་ཡོད།
དཔལ་ལྡན་སྲིད་སྐྱོང་མཆོག་གིས་དྲུང་ཆེ་གཞོན་པ་སྐུ་ཞབས་རི་ཆཌ་ཝར་མ་ལགས་དང་། སྐུ་ཞབས་ཀརཊ་ཀེམ་བྷེལ་ལགས་རྣམ་གཉིས་ཀྱིས་བོད་དོན་ཐོག་རྒྱབ་སྐྱོར་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བདེ་ཐང་ལ་ཐུགས་ཁུར་གནང་བར་བཀའ་དྲིན་ཆེ་ཞུས་པ་སྦྲགས། ཨ་རིའི་ཕྱི་སྲིད་ལས་ཁུངས་དང་། ཨ་རིའི་རོགས་ཚོགས་ (USAID) གཙོས་པའི་ལས་ཁུངས་ཁག་བཅས་ནས་ཝ་ཤིང་ཊོན་ཌི་སི་རུ་བོད་དོན་ཐོག་རྒྱབ་སྐྱོར་འཐོབ་ཐབས་སུ་རོགས་རམ་གནང་བར་ཐུགས་རྗེ་ཆེ་ཞུས་ཡོད།
དེ་ཡང་ཕྱི་ལོ་ ༢༠༢༥ ཟླ་བ་ ༠༡ ཚེས་ ༠༨ ཉིན་ལྕམ་སྐུ་ཨུ་ཛི་རཱ་ཛེ་ཡ་མཆོག་གིས་དཔལ་ལྡན་སྲིད་སྐྱོང་མཆོག་ལ་ཕྱག་བྲིས་ཤིག་བསྐུར་ནས་ཁོ་མོའི་ལས་ཡུན་རིང་གྲོས་བསྡུར་དང་མཉམ་ལས་གནང་བར་ཐུགས་རྗེ་ཆེ་ཞུས་ཡོད། ཁོང་མོས། ད་ལྟའི་སྲིད་གཞུང་གི་ལས་ཡུན་རིང་ཨ་རིའི་བོད་དོན་ཐོག་སྲིད་བྱུས་ལག་བསྟར་བྱེད་པ་དང་། བོད་དོན་ལ་རྒྱལ་སྤྱིའི་རྒྱབ་སྐྱོར་ཤུགས་ཆེ་རུ་གཏོང་བ། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བར་འགན་འཁྲི་བཟོ་བ་བཅས་བོད་མིའི་སྒྲིག་འཛུགས་དང་ཨ་རིའི་བོད་དོན་སྲིད་བྱུས་གཉིས་ཀྱི་མཉམ་ལས་ཀྱི་གྲུབ་འབྲས་ཡིན། ཞེས་དང་། ཨ་རིའི་ཕྱི་སྲིད་ལས་ཁུངས་ནས་བྱམས་བརྩེའི་ལོ་འཁོར་ནང་༸གོང་ས་མཆོག་གི་མཛད་རྗེས་དང་། དེས་འགྲོ་བ་མིར་ཕན་ཐོགས་གང་བྱུང་བ་སོགས་གསལ་སྟོན་ཆེད་ཁྱེད་ཚོའི་སྒྲིག་འཛུགས་དང་མུ་མཐུད་མཉམ་ལས་བྱ་རྒྱུར་རེ་བ་ཞུ་བཞིན་ཡོད། ཅེས་ཁས་ལེན་གནང་ཡོད།
མཐར་ཁོང་མོས་ཨ་རིས་འདས་པའི་ལོ་བཅུ་ཕྲག་མང་པོའི་རིང་གནང་བ་ལྟར་བོད་མིའི་འགྲོ་བ་མིའི་ཐོབ་ཐང་དང་། གཞི་རྩའི་རང་དབང་སྲུང་སྐྱོབ་བྱ་རྒྱུ་དེ་སྔར་བཞིན་གལ་ཆེན་དུ་བརྩི་རྒྱུ་ཡིན་པ་དང་། དེ་ནི་ཕྱོགས་གཉིས་ཀའི་རྒྱབ་སྐྱོར་ཡོད་པའི་ཨ་རིའི་ཁྲིམས་ཡིག་ནང་གཏན་འབེབས་གནང་ཡོད་པས་ཡིད་ཆེས་ཡོད་པ་གསུངས། དེའི་རྗེས་ཉིན་ཁ་ཤས་རྗེས་སུ་ལྕམ་ཨུ་ཛི་རཱ་ཛེ་ཡ་མཆོག་གིས་ཁོ་མོའི་བོད་དོན་དམིགས་བསལ་འབྲེལ་མཐུད་པའི་ལས་ཡུན་གྱི་ཉམས་མྱོང་བརྗོད་པའི་བརྙན་ཐུང་ཞིག་ (X) བརྒྱུད་ལམ་དུ་བཞག་ཡོད།
སྤྱིར་ཕྱི་ལོ་ ༢༠༢༡ ཟླ་བ་ ༡༢ ཚེས་ ༢༠ ཉིན་ཨ་རིའི་ཕྱི་སྲིད་དྲུང་ཆེ་ཨན་ཊོ་ནི་བྷི་ལིན་ཀེན་མཆོག་གིས་མི་སེར་བདེ་འཇགས་དང་མང་གཙོ། འགྲོ་བ་མིའི་ཐོབ་ཐང་གི་དྲུང་ཆེ་གཞོན་པ་ཨུ་ཛེ་རཱ་ཛི་ཡ་མཆོག་ལ་ཕྱི་ལོ་ ༢༠༠༢ ལོའི་བོད་དོན་རྒྱབ་སྐྱོར་གྱི་སྲིད་བྱུས་ནང་གསལ་ལྟར་ཨ་རིའི་བོད་དོན་དམིགས་བསལ་འབྲེལ་མཐུད་པའི་ལས་འགན་བསྐོ་གཞག་གནང་བ་ནས་བཟུང་དྲུང་ཆེ་གཞོན་པ་ལྕམ་ཨུ་ཛི་རཱ་ཛེ་ཡ་མཆོག་གིས་བོད་མིའི་འགོ་ཁྲིད་དང་མཉམ་དུ་འབྲེལ་བ་གནང་བ་དང་། སྡིངས་ཆ་དང་ལས་འཆར་འདྲ་མིན་བརྒྱུད་བོད་དོན་དང་འབྲེལ་བའི་གནད་དོན་ཐོག་ལས་དོན་གནང་ཡོད་པ་བཅས།།
