༄༅། །ཕྱི་ལོ་ ༢༠༢༥ ཟླ་བ་ ༠༡ ཚེས་ ༡༣ རེས་གཟའ་ཟླ་བའི་ཉིན་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་འཛིན་སྐྱོང་སྦྱོང་བརྡར་བསྟི་གནས་ཁང་དུ་སྤྱི་ཁྱབ་རྩིས་ཞིབ་ལས་ཁང་དང་། ཁྱབ་ཁོངས་རྒྱ་གར་དང་བལ་ཡུལ་ཡན་ལག་ལས་ཁུངས་ཀྱི་རྩིས་ཞིབ་ལས་བྱེད་རྣམས་ལ་ཁྲིམས་སྒྲིག་གཞིར་བཟུང་རྩིས་ཞིབ་གནང་ཕྱོགས་དང་འབྲེལ་བའི་སྦྱོང་བརྡར་དབུ་འཛུགས་གནང་ཡོད།

སྦྱོང་བརྡར་དབུ་འབྱེད་མཛད་སྒོར་རྒྱ་གར་འཛིན་སྐྱོང་སྦྱོང་བརྡར་བསྟི་གནས་ཁང་གི་འགན་འཛིན་སྐུ་ཞབས་སུ་རེནྡྲ་ནཱཐ་ཏྲི་པཱ་ཐཱི་ (Surendra Nath Tripathi) ལགས་དང་། རིགས་དྲུང་ཨམི་ཏབ་རན་ཇན་ (Amitabh Ranjan) ལགས། བསྟི་གནས་ཁང་གི་ལས་འཆར་འགན་འཛིན་ལྕམ་སྐུ་སུ་རཱ་སྦི་པཱཎ་དེ་ (Surabhi Pandey) ལགས། སྤྱི་ཁྱབ་རྩིས་ཞིབ་ལས་ཁང་གི་ཟུང་དྲུང་དཀོན་མཆོག་དབང་འདུས་ལགས་བཅས་ཕེབས་གནང་ཡོད།

སྐབས་དེར་ཟུང་དྲུང་དཀོན་མཆོག་དབང་འདུས་ལགས་ཀྱིས་སྤྱི་ཁྱབ་རྩིས་ཞིབ་ལས་ཁང་གི་ཚབ་ཞུས་ཏེ་རྒྱ་གར་འཛིན་སྐྱོང་སྦྱོང་བརྡར་བསྟི་གནས་ཁང་ལ་ཐུགས་རྗེ་ཆེ་ཞུས་པ་དང་སྦྲགས། སྤྱི་ཁྱབ་རྩིས་ཞིབ་ལས་ཁུངས་ཀྱི་ལས་དོན་མཐོར་འདེགས་ཡོང་རྒྱུར་སྦྱོང་བརྡར་འདི་ལྟ་བུ་གོ་སྒྲིག་གནང་བར་ཡི་རང་བསྔགས་བརྗོད་ཞུས་ཡོད།

ཕྱི་ཚེས་ ༡༣ ནས་ ༡༨ བར་འཚོགས་བཞིན་པའི་སྦྱོང་བརྡར་འདིའི་ཐོག་སྤྱི་ཁྱབ་རྩིས་ཞིབ་ལས་ཁང་དང་། ཁྱབ་ཁོངས་རྒྱ་གར་དང་བལ་ཡུལ་ཡན་ལག་ལས་ཁུངས་ཀྱི་རྩིས་ཞིབ་ལས་བྱེད་ཁྱོན་མི་གྲངས་ ༣༢ མཉམ་ཞུགས་གནང་འདུག་པ་དང་། ཁོང་རྣམས་ལ་གནས་ཡུལ་རྒྱ་གར་གྱི་ཕྱི་དངུལ་ལེན་ཕྱོགས་དང་སྤྱོད་ཕྱོགས་ཀྱི་ཁྲིམས་སྒྲིག་དང་འབབ་ཁྲལ། སེམས་མྱོང་གི་རྣམ་དཔྱོད་སོགས་ཀྱི་ཐད་སློབ་སྟོན་གནང་རྒྱུ་རེད་འདུག །