༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྐུ་ཞབས་མ་ཧིག་ཇོན་སན་ (Mike Johnson) མཆོག་བསྐྱར་དུ་ཨ་རིའི་གྲོས་ཚོགས་འོག་མའི་ཚོགས་གཙོར་བདམས་ཐོན་བྱུང་བར་དགའ་བསུའི་འཚམས་འདྲི་ཞུས་གནང་ཡོད།

དེ་ཡང་མཚམས་འཕྲིན་ནང་དཔལ་ལྡན་སྲིད་སྐྱོང་མཆོག་གིས། ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་སྐུ་ཉིད་སླར་ཡང་ཨ་རིའི་གྲོས་ཚོགས་འོག་མའི་ཚོགས་གཙོར་བདམས་ཐོན་བྱུང་བར་འཚམས་འདྲི་ཞུ་རྒྱུ་ཡིན།

ཨ་རིའི་གྲོས་ཚོགས་ནི་བོད་དོན་ཐོག་ཡུན་རིང་རྒྱབ་སྐྱོར་གནང་མཁན་ཞིག་དང་། ལོ་ངོ་མང་པོའི་རིང་ཆབ་སྲིད་ཚོགས་པ་གཉིས་ཀས་གལ་ཆེའི་རྒྱབ་སྐྱོར་གནང་བ་དེས་ཨ་རིའི་སྲིད་བྱུས་དང་། བོད་དོན་ཐོག་རྒྱབ་སྐྱོར་བརྟན་པོ་ཞིག་བསྐྲུན་ཡོད། སྐུ་ཉིད་ཀྱི་ཚོགས་གཙོའི་དུས་ཡུན་རིང་དབུ་མའི་ལམ་སྲིད་བྱུས་ཐོག་ནས་བོད་རྒྱའི་དཀའ་རྙོག་སེལ་ཐབས་ཆེད་ཕྱག་ལས་གནང་རྒྱུའི་རེ་བ་ཡོད། ཅེས་དང་།

དེ་བཞིན་དཔལ་ལྡན་སྲིད་སྐྱོང་མཆོག་གིས་ཨ་རིའི་གྲོས་ཚོགས་ཀྱིས་བོད་དོན་ཐོག་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་མ་ཟད། ཨ་རིའི་གྲོས་ཚོགས་དང་བོད་མིའི་དབར་གྱི་འབྲེལ་ལམ་ཤུགས་ཆེར་གཏོང་ཆེད་སྐུ་ཞབས་མ་ཧིག་ཇོན་སན་མཆོག་དང་མཇལ་འཕྲད་གནང་འདོད་ཡོད་ཅེས་གསུངས།།