༄༅། །ཕྱི་ལོ་ ༢༠༢༥ ཟླ་བ་ ༠༡ ཚེས་ ༧ ཉིན་བོད་མིའི་སྒྲིག་འཛུགས་ཀྱི་སྤྱི་ཁྱབ་རྩིས་ཞིབ་ལས་ཁང་གི་གོ་སྒྲིག་འོག་དྷ་ས་འཛིན་སྐྱོང་སྦྱོང་བརྡར་བསྟི་གནས་ཁང་དུ་རྩིས་ཞིབ་འཛིན་སྐྱོང་ཚོགས་འདུ་དབུ་འཛུགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་ཟབ་སྦྱོང་གི་དབུ་འབྱེད་མཛད་སྒོའི་སྐུ་མགྲོན་དུ་སྤྱི་ཁྱབ་རྩིས་ཞིབ་ལས་ཁང་གི་དྲུང་འཕར་འཕྲིན་ལས་ཆོས་འཕེལ་ལགས་ཀྱིས་སྣང་གསལ་མར་མེ་ཞལ་ཕྱེ་གནང་གྲུབ་མཚམས་ཉིན་ལྔའི་རིང་གི་ཟབ་སྦྱོང་གི་མཛད་རིམ་སྙན་སྒྲོན་ཞུས་རྗེས་ཟུང་དྲུང་བསྟན་འཛིན་ཤེས་ལྡན་ལགས་ནས་སྤྱི་ཁྱབ་རྩིས་ཞིབ་འགན་འཛིན་མཆོག་གིས་གནང་བའི་འཕྲིན་ཡིག་སྒྲོགས་སྦྱང་གནང་ཡོད།
འཕྲིན་ཡིག་ནང་རྩིས་ཞིབ་ཀྱི་བརྒྱུད་རིམ་ནང་དྲང་བདེན་དང་། དེང་དུས་ཀྱི་འཕྲུལ་ཆས་བེད་སྤྱད་དེ་ཡར་རྒྱས་གཏོང་ཕྱོགས་སྐོར་ནན་བརྗོད་གནང་བ་མ་ཟད། རྩིས་ཞིབ་ལས་བྱེད་རྣམ་པས་འཛིན་སྐྱོང་ཚགས་ཚུད་དང་གོང་འཕེལ་ཆེད་ས་གནས་ཀྱི་སྡེ་ཚན་ཁག་ཏུ་རྩིས་ཞིབ་ལས་དོན་སྐབས་མཉམ་ལས་གནང་དགོས་གལ་སྐོར་ལམ་སྟོན་གནང་ཡོད།
ཚོགས་འདུའི་ཐོག་རྩིས་ཞིབ་ཀྱི་ལས་དོན་ཚགས་ཚུད་དང་ནུས་པ་ཡར་རྒྱས་གཏོང་ཕྱོགས་ལ་དམིགས་ཏེ་བརྗོད་གཞི་སྣ་མང་ཐོག་གྲོས་བསྡུར་གནང་རྒྱུ་ཡིན་པ་དང་། དེ་ཡང་ཡན་ལག་ལས་ཁུངས་རེ་རེས་བསམ་འཆར་རྣམས་ཕུལ་ཏེ་རྩིས་ཞིབ་ཀྱི་ལས་དོན་ཡར་རྒྱས་གཏོང་ཕྱོགས་ཐོག་གྲོས་བསྡུར་གནང་རྒྱུ་མ་ཟད། བོད་མིའི་སྒྲིག་འཛུགས་ཀྱི་སྒྲིག་གཞི་དང་། དངུལ་རྩིས་ཐོག་གྲོས་བསྡུར། བོད་མིའི་སྒྲིག་འཛུགས་ཀྱི་སྒྲིག་གཞི་དང་སྲིད་བྱུས་ཁག དེ་བཞིན་ཡོང་འབབ་ཁྲལ། ཅ་དངོས་ཞབས་ཞུའི་ཁྲལ། དངུལ་རྩིས་རྩིས་ཁྲ། རྩིས་ཞིབ་སྙན་ཐོ་བཅས་གལ་ཆེའི་དངུལ་རྩིས་གནད་དོན་ཁག་གི་སྐོར་གྲོས་བསྡུར་སོགས་གནང་རྒྱུ་རེད་འདུག
ཚོགས་འདུ་འདི་བརྒྱུད་རྩིས་ཞིབ་པ་དང་ལས་བྱེད་རྣམས་ལ་འདས་པའི་ལས་དོན་བསྐྱར་ཞིབ་དང་། དཀའ་ངལ་སེལ་ཐབས། དེ་བཞིན་མ་འོངས་སྤྱི་ཁྱབ་རྩིས་ཞིབ་ལས་ཁང་གི་འཆར་གཞི་ཁག་གཏན་འབེབས་གནང་རྒྱུའི་གོ་སྐབས་བསྐྲུན་ཡོད།
རྩིས་ཞིབ་འཛིན་སྐྱོང་ཚོགས་འདུ་དེ་བཞིན་ཕྱི་ཟླ་ ༡ ཚེས་ ༧ ནས་ ༡༡ བར་ཉིན་ལྔའི་རིང་ཚོགས་རྒྱུ་ཡིན་པ་དང་། ཚོགས་འདུའི་མཐར་རྩིས་ཞིབ་ཀྱི་ལས་དོན་ཡར་རྒྱས་གཏོང་ཆེད་ལག་བསྟར་བྱ་རྒྱུའི་གྲོས་ཆོད་ཁག་གཏན་འབེབས་གནང་རྒྱུ་ཡིན་པ་བཅས།།
