༄༅། །ཕྱི་ལོ་ ༢༠༢༤ ཟླ་བ་ ༡༢ ཚེས་ ༢༡ ཉིན་ཉི་འོང་སྐུ་ཚབ་དོན་ཁང་ནས་ཉི་འོང་དུ་སློབ་གཉེར་དང་ཕྱག་ལས་གནང་བཞིན་པའི་བོད་མི་རྣམས་ལ་ལོ་འཁོར་བོད་དོན་གོ་རྟོགས་ཀྱི་ཟབ་སྦྱོང་ཞིག་གོ་སྒྲིག་གནང་ཡོད། ཟབ་སྦྱོང་གི་དམིགས་ཡུལ་ནི་བོད་མི་རྣམས་རང་གི་ངོ་བོ་དང་། བོད་ཀྱི་རང་དབང་སླར་གསོ་རྒྱུན་འཛིན་གནང་རྒྱུའི་ཆེད་དུ་ཡིན།
དེ་ཡང་ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་སློབ་ཕྲུག་དང་ཆེད་ལས་པ་རྣམས་ལ་ཕེབས་བསུའི་འཚམས་འདྲི་ཞུས་པ་དང་ཆབས་ཅིག བོད་མི་རྣམས་བཙན་བྱོལ་དུ་གྱར་དགོས་དོན་དང་། བོད་མིའི་ཐབས་རྩོད་ཀྱི་དམིགས་ཡུལ། དེས་འཛམ་གླིང་ཞི་བདེ་ལ་ཞབས་འདེགས་ཇི་ལྟར་སྒྲུབ་དགོས་མིན་སོགས་ཀྱི་སྐོར་གསུང་བཤད་གནང་ཡོད། ཁོང་གིས་གནས་ཚུལ་དང་། དེང་རབས་གནས་ཚུལ་འཕྲུལ་རིག་གི་གལ་གནད། དེ་བཞིན་སློབ་ཕྲུག་ཚོས་དེ་དག་བོད་དོན་གོ་རྟོགས་ཁྱབ་སྤེལ་ཆེད་བེད་སྤྱོད་གཏོང་དགོས་པའི་ནན་སྐུལ་གནང་། གཞན་ཡང་ཁོང་གིས་སློབ་ཕྲུག་ཚོར་བོད་མིའི་སྒྲིག་འཛུགས་དང་། ཉི་འོང་སྐུ་ཚབ་དོན་ཁང་གི་དྲྭ་ཚིགས་ལ་རྒྱུས་མངའ་དགོས་པ་དང་། བོད་མིའི་སྒྲིག་འཛུགས་ཀྱི་ཉི་འོང་སྐད་ཡིག་ཐོག་གི་བདུན་རེའི་གསར་འགྱུར་ཁག་གཟིགས་ནས་ཉི་འོང་གི་གྲོགས་པོ་ཚོར་བརྒྱུད་བཀུར་གནང་དགོས་པའི་འབོད་སྐུལ་གནང་ཡོད། དེ་བཞིན་ཨརྱ་ཚེ་དབང་རྒྱལ་པོ་ལགས་ཀྱིས་རྒྱ་ནག་གཞུང་གིས་བོད་ཀྱི་ཆོས་ཕྱོགས་ཀྱི་གནད་དོན་ཐོག་ཐད་བྱུས་བྱེད་བཞིན་པའི་སྐོར་དང་། མི་སེར་སྤེལ་ཡུལ་གཏན་འཇགས་སློབ་གྲྭའི་ཤུགས་རྐྱེན། ཨ་རིའི་སྲིད་གཞུང་གི་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་གི་གལ་གནད་བཅས་ཀྱི་སྐོར་འགྲེལ་བརྗོད་གནང་ཡོད།
དེ་ནས་ཉི་འོང་གི་རེ་ཏ་ཀུ་གཙུག་ལག་སློབ་ཁང་དུ་སློབ་གཉེར་གནང་བཞིན་བོད་མིའི་སྒྲིག་འཛུགས་ཀྱི་ལས་བྱེད་བསྟན་འཛིན་དགྲ་ལྷ་ལགས་དང་། བསྟན་འཛིན་བཀྲ་ཤིས་ལགས་གཉིས་ཀྱིས་བོད་མིའི་སྒྲིག་འཛུགས་སུ་ཕྱག་ལས་གནང་བའི་ཉམས་མྱོང་སྐོར་གསུང་བཤད་གནང་བ་དང་། བསྟན་འཛིན་དགྲ་ལྷ་ལགས་ཀྱིས་བོད་ཀྱི་སྲིད་བྱུས་ཉམས་ཞིབ་ཁང་གི་ལས་དོན་དང་གལ་གནད་སྐོར་ངོ་སྤྲོད་གནང་ཡོད།
དེ་རྗེས་སློབ་ཕྲུག་ཚོགས་པའི་ཚོགས་གཙོ་ཟུར་པ་དབྱངས་ཅན་ལྷ་མོ་ལགས་ཀྱིས་མཉམ་ཞུགས་པ་རྣམས་ལ་ཚོགས་པའི་ལོ་འཁོར་ལས་འགུལ་སྐོར་ངོ་སྤྲོད་གནང་རྗེས་ཚོགས་པའི་ཚོགས་གཙོ་གསར་པ་བསྟན་འཛིན་བརྩོན་འགྲུས་ལགས་ངོ་སྤྲོད་གནང་ཡོད།
དེ་ནས་ (Sogo Consulting Firm) སོ་གོ་སློབ་སྟོན་ཚོང་ལས་ཁང་གི་འགན་འཛིན་དང་། བོད་པའི་སློབ་ཕྲུག་གི་ཤེས་ཡོན་ལས་གཞིའི་སྦྱིན་བདག་ཇུ་ནི་ཅི་ཨོ་གྷ་ཏཱ་ལགས་ཀྱིས་སློབ་ཕྲུག་དང་ལྷན་གྲོས་མོལ་གནང་ཞིང་། ཉི་འོང་དུ་ཕྱག་ལས་ཀྱི་གོ་སྐབས་ཡོད་པ་རྣམས་ངོ་སྤྲོད་གནང་ཡོད།
བོད་ཕྲུག་ཁྱིམ་སྡེའི་ཡུན་རིང་མཐུན་འགྱུར་བ་དང་། རྒྱབ་སྐྱོར་བ་སྐུ་ཞབས་གུན་ཇི་ལགས་དང་། ལྕམ་ཕུ་རུ་ཀ་ཝ་ལགས་རྣམ་གཉིས་ནས་བོད་པའི་སྤྱི་ཚོགས་ནང་ཕྱག་ལས་གནང་བའི་ཉམས་མྱོང་དང་། སློབ་ཕྲུག་རྣམས་ནས་རང་ཉིད་ཉི་འོང་དུ་སློབ་གཉེར་བྱས་པའི་ཉམས་མྱོང་བརྒྱུད་སྤྱི་ཚོགས་གཉིས་དབར་འབྲེལ་ལམ་གོང་མཐོར་གཏོང་རྒྱུ་མ་ཟད། བཙན་བྱོལ་བོད་མིའི་སྤྱི་ཚོགས་ནང་ལས་དོན་ཚགས་ཚུད་དང་། དེང་རབས་ཅན་དུ་གཏོང་རྒྱུར་ཞབས་འདེགས་སྒྲུབ་དགོས་པའི་ལམ་སྟོན་གནང་།
ཟབ་སྦྱོང་དེར་མཉམ་ཞུགས་པ་ ༢༠ ཕེབས་ཡོད་པ་དང་། མཉམ་ཞུགས་པ་རྣམས་ནས་སོ་སོའི་སློབ་གཉེར་དང་ཕྱག་ལས་གནང་ཡུལ་སྐོར་ངོ་སྤྲོད་གནང་ཞིང་། གསུང་བཤད་པ་དང་ལྷན་དུ་བགྲོ་གླེང་གནང་ཡོད།
ཟབ་སྦྱོང་དེ་བཞིན་ཉི་འོང་དོན་ཁང་གི་དྲུང་ཆེ་བཀྲ་ཤིས་དབྱངས་འཛོམས་ལགས་ཀྱིས་གཙོ་སྐྱོང་གནང་སྟེ་གསུང་བཤད་པ་དང་མཉམ་ཞུགས་པ་ཡོངས་ལ་ཐུགས་རྗེ་ལེགས་འབུལ་ཞུས་ཡོད། མཐར་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་གསུང་བཤད་པ་ཨོ་གྷ་ཏཱ་ལགས་དང་། གུན་ཇི་ལགས། ཕུ་རུ་ཀ་ཝ་ལགས་བཅས་ལ་མཇལ་དར་དང་། བོད་སྐོར་གྱི་ཕྱག་དེབ་ཕུལ་ཡོད་པ་བཅས།།
