༄༅། །ཨོ་སྟྲེ་ལི་ཡའི་སྐུ་ཚབ་དོན་གཅོད་ཀརྨ་སེང་གེ་ལགས་ཀྱིས་ཨོ་གླིང་གི་བདེ་སྲུང་བློན་ཆེན་ཟུར་པ་དང་། བོད་དོན་རྒྱབ་སྐྱོར་བ་སྐུ་ཞབས་ཀི་ཝིན་ཨེན་ཌི་རིའུ་མཆོག་འདས་གྲོངས་སུ་གྱུར་བར་ཐུགས་གསོའི་གསུང་འཕྲིན་ཞིག་ཕུལ་ཡོད། སྐུ་ཞབས་ཀེ་ཝིན་མཆོག་ཕྱི་ལོ་ ༢༠༡༧ ལོར་ཨོ་གླིང་གྲོས་ཚོགས་འཐུས་མིའི་ཚོགས་ཆུང་དང་ལྷན་བཞུགས་སྒར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཞུས་པ་དང་། བོད་མིའི་སྒྲིག་འཛུགས་ཀྱི་དབུ་ཁྲིད་རྣམ་པ་མཇལ་འཕྲད་གནང་ཡོད།
དེ་ཡང་ཀརྨ་སེང་གེ་ལགས་ཀྱིས་སྐུ་ཞབས་ཀེ་ཝིན་མཆོག་གི་བཟའ་ཟླར་ཕུལ་བའི་གསུང་འཕྲིན་ནང་། ཁྱེད་ཀྱི་བཟའ་ཟླ་སྐུ་ཞབས་ཀེ་ཝིན་མཆོག་འདས་གྲོངས་སུ་གྱུར་བར་བློ་ཕམ་བྱུང་བ་མ་ཟད། བོད་མི་ཡོངས་ལ་གྱོང་གུན་ཆེན་པོ་ཞིག་ཡིན། ཁོང་ནི་བོད་མིའི་གྲོགས་པོ་བཟང་པོ་ཞིག་དང་། བོད་ཀྱི་ཐབས་རྩོད་ཐོག་རྒྱབ་སྐྱོར་གནང་མཁན་ཞིག་ཡིན། ཞེས་དང་།
ཕྱི་ལོ་ ༢༠༡༧ ལོར་སྐུ་ཞབས་ཀེ་ཝིན་མཆོག་ཨོ་སྟྲེ་ལི་ཡའི་གྲོས་ཚོགས་འཐུས་མི་བཞི་དང་ལྷན་བཞུགས་སྒར་དུ་ཕེབས་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཞུས་པ་དང་། བོད་མིའི་སྒྲིག་འཛུགས་ཀྱི་དབུ་ཁྲིད་རྣམས་དང་ལྷན་མཇལ་མོལ་གནང་ཡོད། ཁོང་གིས་བོད་དོན་ཐོག་རྒྱབ་སྐྱོར་གཡོ་མེད་གནང་བ་དེ་བོད་མི་ཡོངས་ཀྱིས་རྟག་ཏུ་དྲན་བཞིན་ཡོད། ངས་བོད་མི་ཡོངས་ཀྱི་ཚབ་ཞུས་ཏེ་དུས་ཚོད་འདིར་མྱ་ངན་ཞུ་བཞིན་ཡོད།
སྐུ་ཞབས་ཀེ་ཝིན་ཨེན་ཌི་རིའུ་མཆོག་ནི་ཨོ་སྟྲེ་ལི་ཡའི་གྲོས་ཚོགས་འོག་མའི་འཐུས་མི་ཡུན་རིང་ཤོས་གནང་མཁན་ཞིག་ཡིན་པ་དང་། ཁོང་གིས་བདེ་སྲུང་གི་བློན་ཆེན་དང་། གནས་སྤོ་དང་མི་ཟེར་གྱི་བློན་ཆེན་བཅས་ཀྱི་ལས་གནས་སུ་ཕྱག་ལས་གནང་མྱོང་ཡོད་པ་བཅས།།
