༢༠༡༢ ཟླ་ ༣ ཚེས་ ༡༢ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༣ ཚེས་ ༡༢ ཉིན་ཕ་ཟུར་དབང་ཕྱུག་ལགས་བཀའ་ཤག་གིས་བཀོད་ཁྱབ་ལྟར་བདེ་སྲུང་ལས་ཁུངས་ཀྱི་སྐུ་ཕྱྭའི་དྲུང་ཆེར་བསྐོ་གཞག་གནང་བ་ལྟར་ལས་ཁུར་ཞུས་འདུག
དེ་ཉིན་སྔ་དྲོ་ཆུ་ཚོད་ ༩ ཐོག་བདེ་སྲུང་ལས་ཁུངས་ཀྱི་བཀའ་བློན་ལས་ཁུངས་སུ་དྲུང་ཆེ་གསར་པ་ཕ་ཟུར་དབང་ཕྱུག་ལགས་ཀྱིས་༸རྒྱལ་བའི་སྐུ་དཔར་རིན་པོ་ཆེར་གུས་ཕྱག་དང་མཇལ་དར་ཕུལ་གྲུབ་རྗེས་བཀའ་བློན་འབྲོང་ཆུང་དངོས་གྲུབ་མཆོག་ལ་ངོ་མཇལ་གྱི་འཚམས་འདྲི་ཞུས་གྲུབ་བསྟུན་དྲུང་ཆེའི་ལས་ཁུངས་སུ་དྲུང་ཆེ་ཕ་ཟུར་དབང་ཕྱུག་ལགས་སུ་བདེ་སྲུང་བཀའ་བློན་མཆོག་དང་། སྡེ་ཚན་ཁག་གི་འགན་འཛིན་རྣམ་པས་འཚམས་འདྲི་དང་སྦྲགས་ལས་བྱེད་ཡོངས་ནས་རྟེན་འབྲེལ་གྱི་མཇལ་དར་བསྒྲོན་ཏེ་གསོལ་ཇ་བཞེས་འབྲས་ཕུལ་ནས་སྟབས་བདེའི་མཛད་སྒོ་ཞིག་ཚོགས་ཡོད་པ་བཅས།།