༄༅། །འདི་གར་པེ་རི་སི་འབྲེལ་མཐུང་ལས་ཁང་ནས་བཏང་གནས་ནང་འཁོད་དོན། ཕ་རན་སི་བོད་རིགས་ཚོགས་པའི་རྐང་འགན་བཞེས་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༥ འཁོར་བའི་མཛད་སྒོ་ཕྱི་ལོ་ ༢༠༢༤ ཟླ་བ་ ༡༢ ཚེས་ ༡༤ ཉིན་གྱི་སྔ་དྲོ་ཆུ་ཚོད་ ༡༡།༣༠ ནས་དགོང་དྲོ་ཚོུད་ ༦།༠༠ བར་དུས་དྲན་སྲུང་བརྩི་ཞུས་ཡོད།
དེ་ཡང་མཛད་སྒོའི་སྐུ་མགྲོན་གཙོ་བོ་པེ་རི་སིའི་གྲོང་སྡེ་སྤྱི་ཁྱབ་ལས་ཁུངས་ཀྱི་སློབ་སྟོན་པ་ལྕམ་སྐུ་གྷེ་ནི་བི་ གྷ་རི་གོ་སི་ (Genevieve Garrigos) ལགས་དང་། རྫོང་བཅུ་གཅིག་གི་རྫོང་དཔོན་ཕ་རན་ཀོཡེ་སི་ ཝག་ལིན་ (Francois Vauglin) ལགས། པེ་རི་སི་འབྲེལ་མཐུད་ལས་ཁུངས་ཀྱི་འབྲེལ་མཐུད་པ། ཚོགས་སྡེ་ཁག་གི་ཚོགས་གཙོ། ཕ་རན་སི་ནང་གི་བོད་དོན་རྒྱབ་སྐྱོར་ཚོགས་པ་ཁག་ཅིག་གི་ཚོགས་གཙོ་དང་སྐུ་ཚབ། པེ་རི་སི་ནང་གནས་སྡོད་མི་མང་བཅས་ཁྱོན་མི་གྲངས་ ༨༠༠ ལྷག་ཙམ་མཉམ་འཛོམས་ཀྱི་དུས་དྲན་སྲུང་བརྩི་ཞུ་གནང་ཡོད།
མཛོད་སྒོའི་སྐབས་ཐོག་མར་བོད་རིགས་ཚོགས་པའི་ཚོགས་གཙོ་པདྨ་རིན་ཆེན་ལགས་ནས་དུས་ཆེན་ངོ་སྤྲོད་དང་། སྐུ་མགྲོན་རྣམ་པ་དང་མི་མང་བཅས་ལ་འཚམས་འདྲིའི་གསུང་བཤད་གནང་། པེ་རི་སི་འབྲེལ་མཐུད་ལས་ཁུངས་ཀྱི་འབྲེལ་པ་ནས་དཔལ་ལྡན་བཀའ་ཤག་དང་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་ཀྱི་གནད་དོན་སྙིང་བསྡུས་དང་། དེ་བཞིན་མ་འོངས་ལོ་གསར་པའི་ནང་གོ་སྟོན་སྲུང་བརྩི་ཞུ་ཕྱོགས་ཀྱི་ལས་འཆར་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཡུ་རོབ་སྤྱི་ཡོངས་ཀྱི་བརྟན་བཞུགས་འབུལ་རྒྱུའི་ལས་འཆར་སྐོར། དཔྱ་དངུལ་དུས་ཐོག་འབུལ་དགོས་པའི་གལ་གནད་སོགས་ཀྱི་སྐོར་གསལ་བསྒྲགས་ཞུ་རྒྱུའི་གོ་སྐབས་བྱུང་།
དེ་རྗེས་སྐུ་མགྲོན་གཙོ་བོ་རྣམ་གཉིས་ནས་མི་མང་ལ་གསུང་བཤད་གནང་རྗེས་ཕ་རན་སི་ནང་གི་གཟའ་མཇུག་སློབ་གྲྭ་ཁག་དང་། ཚོགས་སྡེ་ཁག་ནས་གཞས་སྣ་འཁྲབ་སྟོན་གཟིགས་འབུལ་གྲུབ་མཚམས་མི་མང་རྣམས་ནས་སྒོར་གཞས་ཁྲབ་ཡོད། མི་མང་ནས་དཔྱ་དངུལ་བསྡུ་རུབ་ཞུ་ཡུལ་གོ་སྒྲིག་གི་མི་མང་མི་ཉུང་བ་ཞིག་གི་མཉམ་བཞུགས་གནང་སོང་བཅས།།
