ཕྱི་ལོ་ ༢༠༠༨ ལོའི་ཟླ་ ༩ ཚེས་ ༨ རེས་གཟའ་ཟླ་བ།
བོད་མི་མང་སྤྱི་འཐུས་ཚོགས་གཙོ་ཀརྨ་ཆོས་འཕེལ་མཆོག་དབུས་པའི་ཚོགས་གཞོན་རྒྱ་རི་སྒྲོལ་མ་མཆོག་དང་། བཙན་བྱོལ་བོད་གཞུང་གི་དཔལ་ལྡན་བཀའ་བློན་ཁྲི་པས་དབུས་བཀའ་བློན་རྣམ་པ། ཆོལ་གསུམ་ཆོས་ལུགས་དང་བཅས་པའི་བོད་མི་མང་སྤྱི་འཐུས་རྣམ་པ་བཅས་ལྷན་བཞུགས་ཐོག་བཙན་བྱོལ་བོད་གཞུང་གི་སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཐེངས་དྲུག་པ་སྐོང་ཚོགས་གནང་བཞིན་པ།
༄༅། བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པ་བོད་རྒྱལ་ལོ་ ༢༡༣༥ རབ་བྱུང་བཅུ་བདུན་པའི་ས་བྱི་ཕྱི་ལོ་༢༠༠༨ ཟླ་ ༩ ཚེས་ ༨ ནས་ཚེས་ ༡༦ བར་ཉིན་གྲངས་དགུ་རིང་བཙན་བྱོལ་བོད་གཞུང་གི་བསྟི་གནས་གངས་ཅན་སྐྱིད་གཤོངས་ཀྱི་གྲོས་ཚོགས་ཁང་དུ་བསྐོང་ཚོགས་གནང་ཡོད། དེ་ཡང་ཕྱི་ཟླ་ ༩ ཚེས་ ༨ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་བོད་མི་མང་སྤྱི་འཐུས་ཚོགས་གཙོ་ཀརྨ་ཆོས་འཕེལ་མཆོག་དང་། ཚོགས་གཞོན་རྒྱ་རི་སྒྲོལ་མ་མཆོག བཙན་བྱོལ་བོད་གཞུང་གི་དཔལ་ལྡན་བཀའ་བློན་ཁྲི་པས་དབུས་བཀའ་བློན་རྣམ་པ། ཆོལ་གསུམ་ཆོས་ལུགས་དང་བཅས་པའི་བོད་མི་མང་སྤྱི་འཐུས་རྣམ་པ། ལྷན་ཁང་ཁག་གི་དྲུང་ཆེ་རྣམ་པ། གསར་འགོད་པ་དང་། ཟུར་ཉན་རྣམ་པ་བཅས་ཚང་འཛོམས་ཀྱི་ཚོགས་འདུ་དབུ་འཛུགས་ཀྱི་ཐོག་མར་རྟེན་འབྲེལ་གསོལ་ཇ་དང་། འབྲས་བསིལ་འདེགས་འབུལ་གནང་གྲུབ་རྗེས་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས་བོད་མི་མང་སྤྱི་འཐུས་ཚོགས་གཙོ་ཀརྨ་ཆོས་འཕེལ་མཆོག་ནས་དབུ་འཛུགས་མཛད་སྒོའི་གསུང་བཤད་གནང་དོན། དཔལ་ལྡན་བཀའ་བློན་ཁྲི་པ་མཆོག་གི་དབུས་པའི་དཔལ་ལྡན་བཀའ་བློན་རྣམ་པ་དང་། སྤྱི་འཐུས་རྒྱུན་ལས་རྣམ་པས་དབུས་ཕྱོགས་ཕེབས་སྤྱི་འཐུས་རྣམས་དང་། ཕྱི་ཟླ་ ༣ ནང་གྲོས་ཚོགས་ཚོགས་དུས་ཐེངས་ལྔ་པ་ཚོགས་བཞིན་པའི་སྐབས་ལ་བོད་ནང་གཞི་ལུས་སྤུན་ཟླ་རྣམ་པས་རྒྱ་ནག་གཞུང་ལ་ཞི་བའི་གྱེན་ལངས་ཀྱི་ལས་འགུལ་རྩོམ་གནང་བཞིན་ཡོད་པའི་ཛ་དྲག་གི་གནས་སྟངས་ཡོད་པའི་རིང་གྲོས་ཚོགས་ཀྱི་ལས་འགུལ་མཚམས་འཇོག་གནང་བའི་ཐོག་ནས་བོད་ཀྱི་ཆགས་འཇིག་གིས་ཛ་དྲག་གི་གནས་སྟངས་དེའི་ཐོག་ལ་བཀའ་སྡུར་གནང་རྒྱུ་དང་། དེ་ལས་འཕྲོས་པའི་སྤྱི་འཐུས་རྣམ་པ་ཚོ་ལྡི་ལི་ལ་ཕེབས་ནས་གདུང་སེམས་མཉམ་སྐྱེ་མཚོན་སླད་ཉིན་གཅིག་ཟས་བཅད་ངོ་རྒོལ་དང་རྒྱལ་སྤྱིའི་ཐོག་གསལ་བསྒྲགས་ཞུ་ཆེད་གསར་འགོད་ལྷན་ཚོགས་ཚོགས་ཡོད་པ་དང་། དེ་ནས་བཀའ་སྤྱི་ལྷན་ཚོགས་འདུས་པའི་ཐོག་ནས་བོད་གཞུང་མང་ཛ་དྲག་ཚོགས་ཆུང་ཞིག་གསར་འཛུགས་གནང་སྟེ་ཛ་དྲག་གི་ལས་འགུལ་དེའི་ནང་བོད་གཞུང་མང་ཡོངས་ནས་ལས་འགུལ་ལྷན་དུ་སྤེལ་རྒྱུ། དུས་ད་ལྟ་ཡང་བོད་ནང་གཞི་ལུས་སྤུན་ཟླ་ཚོས་ཞི་བའི་གྱེན་ལངས་ཀྱིས་ལས་འགུལ་སྤེལ་བར་རྒྱ་ནག་གཞུང་གི་ངོས་ནས་དམ་བསྒྲགས་ཆེན་པོ་བྱས་ཡོད་སྟབས་ཛ་དྲག་གི་འོག་གནས་ཡོད། ཡིན་ནའང་བོད་མི་ཚོས་ཞི་རྒོལ་གནང་རྒྱུའི་ཆོས་སེམས་དེ་མུ་མཐུད་ནས་གཏན་པོ་བྱས་ནས་གནས་ཡོད་རེད། དེས་རྐྱེན་པས་རྒྱ་ནག་གིས་དམ་བསྒྲགས་ཆེན་པོ་ཡོད་པས་ཛ་དྲག་གི་གནས་ཡོད་པ་ཕྱོགས་གཅིག་རེད། གཉིས་ནས་རྒྱལ་སྤྱིའི་ཨོ་ལེམ་པིཀ་རྩེད་འགྲན་ཚར་བ་རེད། ཚར་པའི་རྗེས་སུ་བོད་ལ་རྒྱ་གཞུང་ཐོག་ནས་ཞིབ་གཤེར་དང་དེ་དང་འབྲེལ་བའི་དམ་བསྒྲགས་ཤུགས་ཆེ་གཏོང་རྒྱུ་ཡིན་དུས་མུ་མཐུད་ཛ་དྲག་གི་གནས་སྟངས་འོག་གནས་ཡོད་པ་རེད། དེར་བརྟེན་ད་ལྟའི་གྲོས་ཚོགས་དེའི་ནང་དུའང་རྩ་བའི་ང་ཚོས་བོད་གཞུང་མང་ཛ་དྲག་གི་ལས་འགུལ་ཚོགས་ཆུང་གི་ལས་བསྡོམས་ཞིབ་གཤེར་གནང་སླད་ལས་བསྡོམས་ཐོག་གྲོས་སྡུར་གནང་རྒྱུ། དྲི་བ་དྲིས་ལན་སོགས་པའི་གྲོས་ཚོགས་ཀྱིས་འཆར་ཅན་གནང་རྒྱུའི་ལས་དོན་དེ་དག་གནང་དགོས་ངེས་རེད། ཡིན་ནའང་དེ་རིང་ཉིན་མ་ཐོག་མ་དེར་མྱ་ངན་གུས་འདུད་ཀྱི་གྲེོས་འཆར་དང་། དེ་བཞིན་བོད་ཀྱི་ད་ལྟའི་ཛ་དྲག་གི་གནས་སྟངས་དེའི་ཐོག་ལ་གྲོས་ཚོགས་ཀྱིས་ཐུགས་འཚབ་ཡོད་པ་དེ་གསལ་སྟོན་གནང་ཆེད་གཞུང་འབྲེལ་གྲོས་སྡུར་གྲོས་འཆར་ཡོད་པ། གྲོས་ཚོགས་འདིའི་སྐབས་གྲོས་ཚོགས་ཀྱིས་གཞི་ལུས་བོད་མི་རྣམས་ཀྱིས་ཞི་བའི་ལས་འགུལ་ལ་ཐུགས་འཚབ་དང་རྒྱབ་སྐྱོར་ཡོད་པ་གསལ་སྟོན་ཡོང་གི་རེད་བསམ་གྱི་འདུག
བོད་མི་མང་སྤྱི་འཐུས་ཚོགས་གཙོ་ཀརྨ་ཆོས་འཕེལ་མཆོག་ནས་གསུང་བཤད་གནང་བཞིན་པ།
དེ་ནས་གནས་ཚུལ་གཞན་ཞིག་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཉེ་འཆར་ཡུ་རོབ་ཕ་རན་སི་རྒྱལ་ཁབ་ནང་ཕེབས་ནས་ཚུར་ཞབས་སོར་འཁོད་པའི་རྗེས་བོད་ནང་གི་གནས་སྟངས་ལ་ཐུགས་འཚབ་དང་མཛད་འཕྲིན་རྒྱས་དྲག་པའི་རྐྱེན་གྱིས་སྐུ་ངལ་ཆེན་པོ་བྱུང་བའི་གནས་སྟངས་ཀྱིས་རྐྱེན་པས་མུ་མཐུད་ཕྱི་རྒྱལ་ཁག་ཏུ་ཞབས་སོར་འཁོད་རྒྱུའི་མཛད་རིམ་ཕྱི་ཤོལ་གནང་དགོས་པ་དང་། གཏན་བྱའི་སླད་མུམ་བཡི་ལ་སྐུ་ཁམས་བདེ་མིན་བརྟག་དཔྱད་གནང་བར་ཕེབས་དགོས་བྱུང་ཡོད་པ་རེད། ཡིན་ནའང་ད་ལྟའི་ཆར་བོད་གཞུང་བཀའ་ཤག་ནས་གསལ་བསྒྲགས་གནང་ཡོད་པ་དང་། དཔལ་ལྡན་སྐུ་སྒེར་ཡིག་ཚང་ནས་ཀྱང་གསལ་བསྒྲགས་གསལ་པོ་གནང་ཡོད་པ་རེད། དེར་བརྟེན་གྲོས་ཚོགས་ནང་ངོས་ཀྱིས་འབྲེལ་ཡོད་ལ་བཀའ་འདྲི་ཞུས་པའི་ཐོག་ནས་དེ་རིང་གྲོས་ཚོགས་བརྒྱུད་ནས་རྒྱ་ཆེའི་མང་ཚོགས་དང་ཕྱི་རྒྱལ་གྱི་རྒྱབ་སྐྱོར་བ་ཚང་མར་ཞུ་རྒྱུར། དཔལ་ལྡན་སྐུ་སྒེར་ཡིག་ཚང་དང་རང་གཞུང་བཀའ་ཤག་ནས་གསལ་བསྒྲགས་གནང་བ་གཞིར་བཟུང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྨྱུང་གཞི་དེ་འདྲ་གང་ཡང་མིན་འདུག ཁ་སེང་མུམ་བཡི་ནས་ཚུར་ལྡི་ལིར་ཞབས་སོར་འཁོད་ཡོད་པ་དང་སང་ཉིན་བཞུགས་སྒར་རྡ་སར་ཞབས་སོར་འཁོད་རྒྱུ་ཡིན་པ་རེད། གོང་དུ་ཞུས་པ་བཞིན་བདུན་ཕྲག་གསུམ་རིང་རྡ་སར་བཞུགས་ཞག་མཛད་ནས་དུས་ཡུན་དེའི་རིང་སྐུ་ངལ་གསོ་ནས་བཞུགས་ཞག་མཛད་རྒྱུ་ཡིན་ན། ཚང་མས་ཐུགས་ཁྲལ་གནང་མི་དགོས་པ་དང་། ཡིན་ནའང་མུ་མཐུད་ནས་སྤྱི་མཐུན་གྱི་བསོད་ནམས་ཕེལ་སླད་སྐུ་ཕྱྭའི་ཞབས་རིམ་མུ་མཐུད་དེ་བསྒྲུབ་དགོས་ཀྱི་རེད་བསམ་གྱི་འདུག ཅེས་གསུང་བཤད་གནང་།
དེ་རྗེས་སྤྱི་འཐུས་སློབ་དཔོན་བསོན་ནམས་བསྟན་འཕེལ་ལགས་དང་སྤྱི་འཐུས་བསོད་ནམས་དགྲ་འདུལ་ལགས་གཉིས་ནས་བོད་ཀྱི་དཔའ་བོ་དང་། དཔའ་མོ་དམ་པ་རྣམས་ཀྱི་རླབས་ཆེན་མཛད་རྗེས་ལ་གུས་འདུད་དང་ཡི་རངས་བསྔགས་བརྗོད་དང་། སྐུ་གཤེགས་གཡུང་དྲུང་བོན་སྤྱི་ཟུར་པ་སྡེ་དགེ་གཡུང་དྲུང་རྣམ་རྒྱལ་མཆོག་གི་མཛད་རྗེས་ལ་ཡི་རངས་བསྔགས་བརྗོད་བཅས་ཀྱི་གཞུང་འབྲེལ་མྱ་ངན་གུས་འདུད་སྐར་མ་རེ་ཞུས་ཏེ་རྗེས་དྲན་ཁག་གཉིས་རིམ་པས་གྲོས་འཆར་འདོན་གནང་གྲུབ་རྗེས་གྲོས་ཚོགས་དངོས་གཞི་དབུ་འཛུགས་གནང་ཡོད་པ་རེད།།
