༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༡༢ ཚེས་ ༡༠ ཕྱི་དྲོ་ཆུ་ཚོད་ ༦ ནས་ ༩ བར་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་དང་ཐའེ་སྡོད་བོད་རིགས་ཚོགས་པ་གཉིས་ཐུན་མོང་གི་གོ་སྒྲིག་འོག་ཐའེ་པེ་ཧྤ་ཧཱ་གསོལ་མགྲོན་ཁང་དུ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༥ འཁོར་བའི་དུས་དྲན་སྲུང་བརྩི་དང་སྦྲགས་ཐའེ་ཝན་གཞུང་དང་། གྲོས་ཚོགས་བོད་དོན་རྒྱབ་སྐྱོར་ཚོགས་པ། ཐའེ་ཝན་དུ་ཡོད་པའི་ཕྱི་རྒྱལ་གཞུང་ཚབ་ཁག ཐའེ་ཝན་བོད་ཀྱི་གྲོགས་པོ་བཅས་ལ་ལོ་མཇུག་ཐུགས་རྗེ་ཆེ་ཞུའི་དགོང་སྟོན་ཆེན་མོ་ཞིག་དཀྱུས་ཅིག་ཏུ་སྲུང་བརྩི་ཞུས་གནང་ཡོད།དགོང་སྟོན་གྱི་སྐུ་མགྲོན་གཙོ་བོ་ཐའེ་ཝན་སྲིད་འཛིན་ལས་ཁུངས་ཀྱི་མགྲིན་ཚབ་པ་གཙོས་པའི་ཐའེ་ཝན་རྟོག་ཞིབ་ལྷན་ཁང་གི་འཐུས་མི་ཁག་དང་། ཐའེ་ཝན་འགྲོ་བ་མིའི་ཐོབ་ཐང་ལྷན་ཚོགས་ཀྱི་འཐུས་མི། ཐའེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འཐུས་མི། ཐའེ་ཝན་སྲིད་འཛིན་ལས་ཁུངས་ཀྱི་སློབ་སྟོན་པ། ཐའེ་ཝན་མཚོ་ངོགས་འབྲེལ་མཐུད་ཐེབས་རྩ་ལས་ཁུངས། ཐའེ་ཝན་བོད་བརྒྱུད་ནང་བསྟན་ཞིབ་འཇུག་ཚོགས་པའི་་སྐུ་ཚབ། ཐའེ་ཝན་དགེ་ལུགས་མཐུན་ཚོགས་ཀྱི་ཚོགས་གཙོ། ཐའེ་ཝན་བོད་ཀྱི་གྲོགས་པོ་བཅས་སྐུ་མགྲོན་གྲངས་ ༡༥༠ ལྷག་མཉམ་འཛོམས་གནང་ཡོད།

མཛད་སྒོའི་ཐོག་ཐའེ་ཝན་སྲིད་འཛིན་ལས་ཁུངས་ཀྱི་མགྲིན་ཚབ་པ་སྐུ་ཞབས་ (Lii Wen) ལགས་ནས་་མཛད་སྒོ་དང་འབྲེལ་བའི་གསུང་བཤད་་གནང་རྗེས་ཐའེ་ཝན་གྱི་སྲིད་འཛིན་གཞོན་པ་ལྕམ་ཞའོ་མེལ་ཆིང་ (Xiao Mei Qing) མཆོག་གི་འཚམས་འཕྲིན་གནང་བ་སྒྲོགས་སྦྱང་གནང་ཡོད་པ་དང་། དེ་ནས་ཐའེ་ཝན་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མི་ལྕམ་ (Tian Quijin) ལགས་དང་། ཐའེ་ཝན་སྲིད་འཛིན་ལས་ཁུངས་ཀྱི་སློབ་སྟོན་པ་སྐུ་ཞབས་ (Yao Jiawen) མཆོག་དང་། ཐའེ་ཝན་མཆོ་ངོགས་འབྲེལ་མཐུད་ཐེབས་རྩའི་འགན་འཛིན་གཞོན་པ་སྐུ་ཞབས་ (Luo Wenjia) ལགས་བཅས་ཀྱི་གསུང་བཤད་གནང་རྗེས། ཐའེ་ཝན་བོད་ཀྱི་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་བཅས་ནས་དུས་ཆེན་སྲུང་བརྩི་དང་ལོ་མཇུག་ཐུགས་རྗེ་ཆེ་ཞུའི་གསུང་བཤད་གནང་ཡོད།

དེ་ནས་ཐའེ་ཝན་བོད་ཀྱི་གཞས་པ་ལྷུན་གྲུབ་ལགས་ནས་དུས་ཆེན་དང་འབྲེལ་བའི་གླུ་གཞས་ཕུལ་ཏེ་ཚང་མས་དགའ་དགའ་སྤྲོ་སྤྲོ་ངང་དུས་ཆེན་སྲུང་བརྩི་ཟབ་རྒྱས་ངང་ཞུས་གནང་ཡོད་པ་བཅས། །