༄༅། །འདི་གར་སུད་སི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༡༢ ཚེས་ ༦ ནས་ཚེས་ ༨ བར་ཉིན་གྲངས་གསུམ་གྱི་རིང་ཨོསྟྲི་ཡཱའི་རྒྱལ་ས་ཝི་ཡ་ན་རུ་ན་གཞོན་འགོ་ཁྲིད་དང་ནུས་སྟོབས་གོང་སྤེལ་གྱི་ཟབ་སྦྱོང་བསྐོང་ཚོགས་གནང་ཡོད་པ་དང་། ཟབ་སྦྱོང་འདིའི་ནང་ཇར་མ་ནི་དང་སུད་སི། ཨོསྟྲི་ཡཱབཅས་ནས་བོད་རིགས་གཞོན་སྐྱེས་མི་གྲངས་ ༢༣ མཉམ་ཞུགས་གནང་ཡོད།
ཟབ་སྦྱོང་དབུ་བྱེད་མཛད་སྒོའི་ཐོག་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་། དམིགས་བསལ་སྐུ་མགྲོན་ཕྱི་དྲིལ་དྲུང་འཕར་བསྟན་འཛིན་ལེགས་བཤད་ལགས་བཅས་ཕེབས་ཡོད་པ་དང་། མཛད་སྒོ་དེར་རྟེན་འབྲེལ་མཚོན་ཆེད་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེའི་སྐུ་མདུན་དུ་མར་མེ་ཞལ་འབྱེད་དང་མཇལ་དར་བསྒྲོན་ཏེ་མཛད་སྒོ་འགོ་འཛུགས་གནང་བའི་ཐོག་མར་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ནས་ཟབ་སྦྱོང་ནང་གཏམ་བཤད་གནང་མཁན་མཁས་དབང་དང་ཚོགས་བཅར་བ་ཡོངས་ལ་དགའ་བསུའི་འཚམས་འདྲི་དང་སྦྲགས་ཟབ་སྦྱོང་ཕུལ་དགོས་པའི་སྐོར་ལ་ངོ་སྤྲོད་མདོར་བསྡུས་ཤིག་གནང་ཡོད།
དེ་རྗེས་བོད་མིའི་སྒྲིག་འཛུགས་ཀྱི་ཕྱི་དྲིལ་དྲུང་འཕར་བསྟན་འཛིན་ལེགས་བཤད་ལགས་ཀྱིས་ཞུ་གཏུག་གི་ཐབས་ལམ་ཉིས་བརྩེགས་བྱེད་རྒྱུ་གལ་ཆེན་པོ་ཡིན་པའི་ནན་བཤད་གནང་། ཁོང་གིས་སྲིད་བྱུས་གཏན་འབེབས་བྱེད་མཁན་ལ་ཞུ་གཏུག་བྱེད་རྒྱུ་དེ་གལ་ཆེན་པོ་ཡིན་པ་མ་ཟད། གཞི་རིམ་མང་ཚོགས་ཀྱི་ལས་འགུལ་ཡང་གལ་ཆེན་པོ་ཡིན་པ་གསལ་སྟོན་གནང་། ཁོང་གིས། ཁྱེད་ཀྱི་འཛིན་གྲོགས་དང་གྲོགས་པོ། ཁྱིམ་མཚེས་སོགས་མང་ཚོགས་ལ་ཞུ་གཏུགས་གནང་སྟེ་གཞི་རྒྱ་ཆེ་བའི་འགྱུར་བ་གཏོང་དགོས། ཞེས་གསུངས་པ་མ་ཟད། ཁོང་གིས་ད་དུང་སྲིད་བྱུས་གཏན་འབེབས་བྱེད་མཁན་གྱི་གནས་རིམ་མཐོ་བ་རྣམས་ལ་མཉམ་རུབ་ཀྱིས་ལས་འགུལ་སྤེལ་དགོས་པའི་ནན་བཤད་གནང་ཡོད།
ད་ཐེངས་ཉིན་གྲངས་གསུམ་གྱི་ཟབ་སྦྱོང་གི་བརྗོད་གཞི་ཁག་ནི་རྒྱལ་སྤྱིའི་ཐོག་དྲག་གནོན་དང་། མི་སེར་སྤེལ་ཡུལ་གྱི་སློབ་གྲྭ ཆབ་སྲིད་བཙོན་པའི་མྱོང་ཚོར། རྒྱ་ནག་གི་སྲིད་བྱུས་ངོ་སྤྲོད། སྤྱི་ཚོགས་དྲྭ་རྒྱའི་ནུས་པ། འདས་དང་ད་ལྟའི་ཞུ་གཏུག་ཐབས་ལམ་བཅས་ཀྱི་གནད་འགག་ཆེ་བའི་བརྫོད་གཞི་ཁག་དང་། དེ་བཞིན་མ་འོངས་ལས་འཆར་གྱི་ཐབས་བྱུས་སྐོར་ཡང་བགྲོ་གླེང་གནང་ཡོད།
ཉིན་དང་པོའི་གཏམ་བཤད་གནང་མཁན་གཉིས་ཀྱི་བརྗོད་གཞི་གཉིས་ནི། རྒྱལ་སྤྱིའི་ཁྲོད་ཀྱི་དྲག་གནོན་དང་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་གཉིས་ཡིན་པ་དང་། བརྗོད་གཞི་རེ་རེར་མཁས་དབང་སོ་སོས་རང་ཉིད་ཀྱི་ལྟ་ཚུལ་དང་ཉམས་མྱོང་ངོ་སྤྲོད་དང་། བོད་ནང་གི་གཏན་སློབ་ཀྱིས་རིག་གཞུང་རྩ་མེད་བཟོ་བཞིན་པའི་ལམ་ལུགས་ཀྱི་སྐོར་ལ་འགྲེལ་བརྗོད་ཞིབ་ཕྲ་གནང་།
ཉིན་གཉིས་པའི་ཟབ་སྦྱོང་ཐོག་ཆབ་སྲིད་བཙོན་ཟུར་ཕུན་ཚོགས་ཉི་སྒྲོན་ལགས་ཀྱིས་རྒྱ་ནག་གི་བཙོན་འོག་ཏུ་མནར་གཅོད་ཀྱི་དཀའ་སྡུག་མྱངས་པའི་གནས་སྟངས་གསུང་སྐབས། ཁོང་སྒེར་གྱི་དཀའ་སྡུག་གླེང་སློང་བྱེད་པ་ཙམ་མིན་པར་བོད་ནང་གི་ཆབ་སྲིད་བཙོན་པ་གཞན་དག་གི་དཀའ་སྡུག་ལ་དོ་སྣང་ཡོང་ཆེད་ཡིན་པ་ནན་བརྗོད་གནང་ཡོད། གཞན་ཡང་༸གོང་ས་མཆོག་གི་དམིགས་བསལ་སྐུ་ཚབ་ཟུར་པ་སྐལ་བཟང་རྒྱལ་མཚན་ལགས་ཀྱིས་རྒྱ་ནག་གི་གནས་སྟངས་ཤེས་རྟོགས་དང་འབྲེལ་བའི་བརྗོད་གཞི་ཐོག་གཏམ་བཤད་གནང་ཡོད། དེ་ནས་རིམ་བཞིན་གཏམ་བཤད་པ་ཚོས་རང་རང་སོོ་སོའི་བརྗོད་གཞི་འདྲ་མིན་ཐོག་གཏམ་བཤད་གནང་ཡོད།
ཟབ་སྦྱོང་གི་ཉིན་མཐའ་མའི་མཇུག་བསྡོམས་མཛད་སྒོའི་ཐོག་རྒྱལ་ཁབ་སོ་སོའི་དང་བླངས་བོད་དོན་ཞུ་གཏུག་ལས་འགུལ་བ་རྣམས་ཀྱིས་སོ་སོའི་ས་གནས་སུ་འདས་པའི་ལོ་གཅིག་གི་ནང་དུ་ལས་དོན་ཇི་གནང་སྐོར་གསལ་བཤད་དང་། མ་འོངས་པའི་ལས་འཆར་འཆར་གཞི་བཀོད་སྒྲིག་བྱས་པ་མ་ཟད། ཕན་ཚུན་སྦྱངས་བསམ་ཚུལ་བརྗེ་ལེན་བྱས་ཏེ། མཐར་ཕྱི་དྲིལ་དྲུང་འཕར་བསྟན་འཛིན་ལེགས་བཤད་ལགས་དང་། སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ནས་ཟབ་སྦྱོང་གོ་སྒྲིག་གནང་མཁན་འབྲེལ་ཡོད་ཚང་མར་ཐུགས་རྗེ་ཆེ་ཞུས་པ་མ་ཟད། ཟབ་སྦྱོང་ནང་ཚོགས་ཞུགས་གནང་མཁན་རྣམས་ལ་ལག་འཁྱེར་གསོལ་རས་གནང་སྟེ་ཟབ་སྦྱོང་མཇུག་སྒྲིལ་ཡོད་པ་བཅས།། 
