༄༅། །ཕྱི་ལོ་ ༢༠༢༤ ཟླ་བ་ ༡༢ ཚེས་ ༠༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་ཝེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༥ འཁོར་བའི་གཞུང་འབྲེལ་མཛད་སྒོའི་སྐུ་མགྲོན་ནིའུ་ཛི་ལེནྚ་དང་ཕི་ཇཱིའི་གྲོས་ཚོགས་འཐུས་མི་རྣམ་པ་བཞུགས་སྒར་རྡ་རམ་ས་ལར་ཕེབས་འབྱོར་བྱུང་ཡོད་ཅིང་། སྐབས་དེར་བཞུགས་སྒར་ཉེ་འདབས་གྷ་གལ་གནམ་ཐང་དུ་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ནས་ཕེབས་བསུ་ཞུས་ཡོད།

དེ་ཡང་གཞུང་འབྲེལ་སྐུ་མགྲོན་རྣམས་ནས་ཉིན་གྲངས་བཞིའི་རིང་བཞུགས་སྒར་རྡ་རམ་ས་ལར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་ཚབ་རྒྱ་རི་སྒྲོལ་མ་མཆོག་དང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གཙོས་པའི་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་ལྷན་མཇལ་འཕྲད་གནང་རྒྱུ་མ་ཟད། ཕྱི་ཚེས་ ༡༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་ཝེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༥ འཁོར་བའི་གཞུང་འབྲེལ་མཛད་སྒོར་ལྷན་ཞུགས་ཀྱིས་གསུང་བཤད་གནང་རྒྱུ་ཡིན་པ་རེད།

ནིའུ་ཛི་ལེནྚ་དང་ཕི་ཇཱིའི་སྐུ་མགྲོན་ཁོངས་སུ་གྲོས་ཚོགས་འཐུས་མི་ཇོ་སབ་མུ་ནི་( Joseph Mooney)ལགས་དང་། གྲོས་ཚོགས་འཐུས་མི་ཨིང་གྲིཊ་ལེ་བི་(Ingrid Leavy)ལགས། གྲོས་ཚོགས་འཐུས་མི་ཧེ་ལེན་ཝ་ཧི་ཊི་(Helen White)ལགས། ཕི་ཇཱིའི་གྲོས་ཚོགས་འཐུས་མི་རི་ནེ་ཤ་ཤར་མ་( Rinesh Sharma)ལགས་ཡོད་ཅིང་། ཁོང་རྣམ་པ་ལྷན་དུ་ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེངྒེ་ལགས་དང་། རྒྱ་ནག་ལ་ཁ་གཏད་ཆེད་བཙུགས་པའི་རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པའི་(Inter-Parliamentary Alliance on China)ཁེན་བྷེ་ར་ཁུལ་གྱི་འབྲེལ་མཐུད་པ་ཀེ་བིན་མུ་ནི་(Kevin Mooney)ལགས་ལྷན་བཅར་ཞུས་ཡོད་པ་བཅས།།