༢༠༡༢ ཟླ་ ༣ ཚེས་ ༩ རེས་གཟའ་པ་སངས།
༄༅། །འདི་གར་ཇོ་ནང་འགྲོ་ཕན་ལྷན་ཚོགས་ཀྱི་ཚོགས་གཙོ་ཚངས་དབྱངས་རྒྱ་མཚོ་ལགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༣ ཚེས་ ༦ ཉིན་མགོ་ལོག་པདྨ་མ་རྫོང་གྱི་མཁར་ཡུལ་ཚོར་བོད་མི་ཞིག་རྒྱ་དམག་གིས་དམར་གསོད་བཏང་འདུག
དེ་ཡང་གནས་ཚུལ་ཡོངས་ཁུངས་ནས་རྗོད་པ་ལྟར་ན། ཕྱི་ཟླ་ ༡ ཚེས་ ༢༥ ཉིན་མགོ་ལོག་པདྨ་རྫོང་སྟག་མཁར་ཡུལ་ཚོའི་མཁར་ནང་ཚོ་བ་དང་། རྟོག་རྟོག་ཚོ་བ། གྱི་མཁར་ཡུལ་ཚོའི་གྱི་ལུང་ཚོ་བ་བཅས་ཀྱིས་སྟར་མཁར་ཡུལ་ཚོའི་སྟེང་དུ་རྒྱ་གཞུང་ལ་ཞི་རྒོལ་བྱས་ཏེ་རྒྱ་གཞུང་གི་རྒྱལ་དར་མར་ཕབ་པ་སོགས་བྱས་པར་བརྟེན་མི་མང་པོ་ཞིག་རིའི་སྒང་ལ་བྲོས་བྱོལ་དུ་འགྲོ་དགོས་ཐུག་ཡོད་པ་མ་ཟད། ཉིན་དེ་ནས་བཟུང་ས་གནས་ཡོངས་ལ་དམག་མི་ཕོན་ཆེན་འགྲེམས་འཇོག་བྱས་ཡོད་འདུག
ཕྱི་ཟླ་ ༣ ཚེས་ ༦ ཉིན་གྱི་མཁར་ཡུལ་ཚོའི་ཐོག་ཏུ་གོང་ཚེས་ཉིན་ཞི་རྒོལ་ནང་མཉམ་ཞུགས་བྱེད་མཁན་གྱི་ མཁར་ཡུལ་ཚོའི་ཕ་སྟོབས་རྒྱས་དང་། མ་སྦེ་ལོ་གཉིས་ཀྱི་བུ། སྟོབས་དབང་འཛིན་བཟུང་བྱེད་སྐབས། ཆོས་རིས་དང་། འཇམ་དཔལ་བློ་གྲོས། དཀར་ཁོ་སོགས་ཀྱིས་བར་འདུམ་བྱས་པར་ཉེན་རྟོག་པ་དང་དམག་མིས་གང་བྱུང་མེ་མདའ་བརྒྱབ་པར་བརྟེན། ཆོས་རིས་ཀྱི་གདོང་མདོར་མེ་མདའ་ཕོག་སྟེ་ས་གནས་དེ་གར་འདས་གྲོངས་སུ་གྱུར་ཡོད་པ་དང་། གཞན་ཕ་ལུག་རེས་དང་། མ་སྦོ་རྡེས་གཉིས་ཀྱི་བུ་སྐར་ཁོ་དང་། འཇམ་དཔལ་བློ་གྲོས་གཉིས་ལ་རྨས་སྐྱོན་ཚབས་ཆེན་ཕོག་སྟེ་ད་སྐབས་མགོ་ལོག་ཁུལ་ཐོག་ཏུ་སྨན་བཅོས་བྱེད་བཞིན་ཡོད་འདུག
ཆོས་རིས་ནི་དར་རྒྱས་དང་། པིར་རྡོག་གཉིས་ཀྱི་བུ་ཡིན་ལ། ད་སྐབས་ཁོང་རང་ལོ་ ༢༨ ཡས་མས་ཡིན་འདུག་ ལ། ཁོང་གི་ཆུང་མའི་མིང་པུག་མོ་ཟེར་ཞིང་། ཁོང་གཉིས་ལ་ཕྲུ་གུ་གཅིག་ཡོད་འདུག ད་སྐབས་མགོ་ལོག་པདྨ་རྫོང་ནས་དམག་མི་ཕོན་ཆེན་ས་གནས་དེར་སྐྱོད་བཞིན་ཡོད་པའི་གནས་ཚུལ་འདུག་པ་བཅས།།
མགོ་ལོག་པདྨ་རྫོང་དུ་རྒྱ་གཞུང་གིས་བོད་མི་དམར་གསོད་བཏང་འདུག
གསར་གནས།
འབྲེལ་གནས།
