༄༅། །ཕྱི་ལོ་ ༢༠༢༥ ཟླ་ ༧ པ་ནས་རྒྱལ་སྤྱིའི་ཁྱོན་ལ་ལོ་འཁོར་ཧྲིལ་པོར་བྱམས་བརྩེའི་ལོ་ཞེས་གཞུང་འབྲེལ་གོ་སྟོན་གོ་སྒྲིག་ཞུ་གཏན་འཁེལ་བའི་སྐོར་འདི་ལོའི་༸སྐུའི་འཁྲུངས་སྐར་གྱི་གཞུང་འབྲེལ་མཛད་སྒོའི་ཐོག་བཀའ་ཤག་གི་གསུང་བཤད་ནང་ཡོངས་ཁྱབ་སྤེལ་གསལ་ལྟར། བོད་རྒྱལ་ལོ་ ༢༡༥༢ བོད་ཟླ་ ༥ ཚེས་ ༡༠ ཕྱི་ལོ་ ༢༠༢༥ ཟླ་ ༧ ཚེས་ ༥ གཟའ་ཚེས་དགེ་བའི་ཉིན་འཕགས་ཡུལ་དྷ་རམ་ས་ལ་ཐེག་ཆེན་ཆོས་གླིང་གཙུག་ལག་ཁང་དུ་བོད་མིའི་སྒྲིག་འཛུགས་ཀྱི་ངོས་ནས་བོད་གཞིས་བྱེས་ལྷ་མི་ཡོངས་ཀྱི་ཚབ་ཞུས་ཏེ། ལྷར་བཅས་སྲིད་ཞིའི་གཙུག་རྒྱན། ཁམས་གསུམ་ཆོས་ཀྱི་རྒྱལ་པོ། འདི་ཕྱི་གཉིས་ཀྱི་སྐྱབས་གནས། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ ༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ལ་སྐུ་གེགས་ཀྱི་མཚན་མ་ཅི་མཆིས་རྨེག་མེད་དུ་ཞི་ནས་སྐུ་ཚེ་ཡུན་དུ་བརྟན་པ་དང་། ཐུགས་ཀྱི་བཞེད་དགོངས་མཐའ་དག་གེགས་མེད་ལྷུན་གྱིས་འགྲུབ་པའི་ཆེད་དུ། ཚེ་དཔག་མེད་དྭངས་མ་བཅུད་འདྲེན་གྱི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུ་གཏན་ཁེལ་ཡོད་པ་དང་། ཕྱི་ལོ་ ༢༠༢༥ ཟླ་ ༧ ཚེས་ ༦ ཉིན་ཕྱི་ལུགས་ལྟར་མགོན་པོ་གང་ཉིད་དགུང་གྲངས་ ༩༠ བཞེས་པའི་༸སྐུའི་འཁྲུངས་ལྷ་དབྱར་གསོལ་གྱི་གཞུང་འབྲེལ་མཛད་སྒོས་སྔུན་བསུས་ཏེ། ལོ་འཁོར་མོར་བཞུགས་སྒར་གཙོས་རྒྱལ་སྤྱིའི་ཁྱོན་ལ་གོ་སྟོན་དང་འབྲེལ་བའི་མཛད་རིམ་རྣམ་མང་གོ་སྒྲིག་ཞུ་འཆར་ཡོད་པས། བླ་སློབ་དད་དམ་དང་སྤྱི་མཐུན་དགེ་ཚོགས་རྟེན་ འབྲེལ་མཚོན་ཕྱིར་བློས་བཅད་ཞལ་འདེབས་འབུལ་བློ་ཡོད་རིགས་ནས་རང་ཉིད་གནས་ཡུལ་ས་གནས་འགོ་འཛིན་ལས་ཁུངས་དང༌། སྐུ་ཚབ་དོན་གཅོད་ལས་ཁུངས་བརྒྱུད་འབུལ་གནང་ཡོང་བའི་གསལ་བསྒྲགས་སུ། དབུས་གོ་སྟོན་གོ་སྒྲིག་ཚོགས་ཆུང་ནས་ཕྱི་ལོ་ ༢༠༢༤ ཟླ་ ༡༢ ཚེས་ ༢ ལ་ཕུལ།།
