༄༅། །ཕྱི་ལོ་ ༢༠༢༤ ཟླ་བ་ ༡༢ ཚེས་ ༠༡ ཉིན་བོད་སྨྱུག་དཔེ་སྐྲུན་ཁང་གི་གོ་སྒྲིག་འོག་དྷ་ས་མེག་གྷན་དུ་ཡོད་པའི་བྷག་སུ་གསོལ་མགྲོན་ཁང་དུ་བོད་ཀྱི་སྒྱུ་རྩལ་བའི་དུས་སྟོན་ཐེངས་དང་པོའི་མཇུག་སྡོམ་མཛད་སྒོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཆེད་ཕེབས་ཀྱིས་གསུང་བཤད་གནང་སྐབས་བོད་མིའི་སྒྲིག་འཛུགས་ངོས་ནས་སྒྱུ་རྩལ་ལམ་ནས་བོད་དོན་དྲིལ་བསྒྲགས་བྱ་རྒྱུར་རྒྱབ་སྐྱོར་གནང་རྒྱུ་ཡིན་པ་གསུངས་ཡོད།
དེ་ཡང་གོང་ཚེས་ཉིན་གྱི་ཕྱི་དྲོ་ཆུ་ཚོད་དྲུག་ཙམ་ལ་བོད་ཀྱི་སྒྱུ་རྩལ་བའི་དུས་སྟོན་གྱི་མཇུག་སྡོམ་མཛད་སྒོ་འཚོགས་ཡོད་པ་དང་། སྐབས་དེར་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། བོད་མི་མང་སྤྱི་འཐུས་ཁག་ཅིག འཛམ་གླིང་ཕྱོགས་མཐའ་ཁག་ནས་ཕེབས་པའི་སྒྱུ་རྩལ་བ་རྣམ་པ། ཡུལ་སྐོར་བ། ས་གནས་བོད་མི་སོགས་མཉམ་ཞུགས་གནང་བའི་ཐོག བོད་ཀྱི་སྒྱུ་རྩལ་བ་ཁག་ཅིག་ནས་གླུ་གཞས་དང་། སྙན་ངག་གྱེར་འདོན་གནང་རྗེས་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་བཤད་གནང་ཡོད།
དཔལ་ལྡན་སྲིད་སྐྱོང་མཆོག་གིས། འདས་པའི་ལོ་ངོ་ ༦༥ ལྷག་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་སྤྱི་ཚོགས་ཁྱོན་ཡོངས་ནས་ཡར་རྒྱས་ཆེན་པོ་ཕྱིན་ཡོད། དེའི་ནང་ནས་རྩོམ་རིག་སྒྱུ་རྩལ་ལམ། ཡང་ན། ཟློས་གར་སྒྱུ་རྩལ་སོགས་བེད་སྤྱོད་བཏང་ནས་བོད་དོན་དྲིལ་བསྒྲགས་དང་། རྒྱབ་སྐྱོར་འཚོལ་ཐབས་ཀྱི་ལས་འགུལ་སྤེལ་མཁན་རིགས་ལ་རྟག་ཏུ་རྒྱབ་སྐྱོར་ཞུ་གི་ཡོད། ཅེས་དང་།
དེ་བཞིན་དཔལ་ལྡན་སྲིད་སྐྱོང་མཆོག་གིས་གོ་སྒྲིག་ཚོགས་ཆུང་ནས་དེ་ལྟ་བུའི་སྒྱུ་རྩལ་དུས་སྟོན་གོ་སྒྲིག་གནང་བར་ཐུགས་རྗེ་ལེགས་འབུལ་ཞུས་པ་དང་སྦྲགས། མ་འོངས་པར་དུས་བསྟུན་ཡར་རྒྱས་བཏང་སྟེ་མུ་མཐུད་གོ་སྒྲིག་གནང་ཐུབ་ན་སྒྱུ་རྩལ་ལམ་ནས་བོད་དོན་དྲིལ་བསྒྲགས་ཡོང་རྒྱུར་ཕན་ཐོགས་ཡོང་ངེས་གསུངས་ཡོད།
བོད་ཀྱི་ཐེབས་རྩའི་ཚོགས་གཙོ་སྐུ་ཞབས་བྷོབ་ཨན་ཀར་སོན་ལགས་ནས་ཀྱང་དུས་སྟོན་དང་འབྲེལ་ཏེ། བོད་ཀྱི་ཐེབས་རྩའི་ངོས་ནས་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་སླད་རྒྱབ་སྐྱོར་གནང་མུས་ལྟར། བོད་ཀྱི་སྒྱུ་རྩལ་བ་རྣམས་ལའང་དེ་མཚུངས་རྒྱབ་སྐྱོར་གནང་གི་ཡོད་པ་གསལ་བཤད་དང་འབྲེལ། འབྱུང་འགྱུར་བོད་ཀྱི་ཐེབས་རྩའི་མཐུན་འགྱུར་འོག དུས་སྟོན་ཐོག་མཉམ་ཞུགས་གནང་མཁན་སྒྱུ་རྩལ་བ་ཐུན་མོང་གི་མངོན་འདོད་ལྟར་བོད་ཀྱི་སྒྱུ་རྩལ་བའི་མཐུན་ཚོགས་ཤིག་གསར་འཛུགས་གནང་འཆར་ཡོད་པ་སོགས་འགྲེལ་བརྗོད་གནང་ཡོད།
སྤྱིར་བོད་ཀྱི་ཐེབས་རྩའི་དཔལ་འབྱོར་གྱི་མཐུན་འགྱུར་དང་བཞུགས་སྒར་དྷ་རམ་ས་ལར་རྟེན་གཞི་བྱས་པའི་བོད་སྨྱུག་དཔེ་སྐྲུན་ཁང་གིས་གོ་སྒྲིག་ཞུས་པའི་བོད་ཀྱི་དུས་སྟོན་ཐེངས་དང་པོ་ཕྱི་ལོ་ ༢༠༢༤ ཟླ་བ་ ༡༡ ཚེས་ ༢༩ ནས་ཟླ་བ་ ༡༢ ཚེས་ ༡ བར་ཉིན་གྲངས་གསུམ་རིང་བཞུགས་སྒར་དྷ་རམ་ས་ལའི་བྷག་སུ་གསོལ་མགྲོན་ཁང་གི་མདུན་ཐང་དུ་འཚོགས་ཡོད་པ་དང་། དུས་སྟོན་ཐོག་འཛམ་གླིང་ཕྱོགས་མཐའ་ཁག་ནས་བོད་ཀྱི་སྒྱུ་རྩལ་བ་གྲངས་ ༣༠ ལྷག་མཉམ་ཞུགས་ཀྱིས་སྒྱུ་རྩལ་དང་འབྲེལ་བའི་བགྲོ་གླེང་དང་། གླུ་གཞས་གཟིགས་འབུལ། སྙན་ངག་གྱེར་འདོན་སོགས་གནང་ཡོད།
དེ་ཡང་བགྲེ་གླེང་ལེ་ཚན་ནང་གཞས་ཀྱི་ནུས་པ་དང་། རྩོམ་རིག་གི་ནུས་པ། རྩོམ་ཁ་ནང་ལ་བལྟ་བ། རྩམ་དྲི་བྲོ་བའི་རྩོམ་རིག རང་མགོ་རང་ཐོན། དབྱངས་ཀྱི་འཕོ་འགྱུར། སྐད་ཡིག གཞས། མཉམ་ལས། སྤྱི་ཚོགས། ཆབ་སྲིད། སྒྱུ་རྩལ་སྐོར་བགྲོ་གླེང་གནང་ཡོད་པ་བཅས།།
