༄༅། །ཨེ་ཤེ་ཡ་རང་དབང་རླུང་འཕྲིན་ཁང་ནས་གནས་ཚུལ་སྤེལ་བར་གཞིགས་ན། རྒྱ་ནག་གཞུང་གིས་ཕྱི་ཟླ་ ༡༠ ཚེས་ ༢༧ ཉིན་བོད་ནང་གི་ཁྱུང་མཆུ་རྫོང་ཚ་རུ་མ་ཡུལ་ཚོའི་རྡང་ཆུ་གཙང་པོའི་ཁོར་ཡུག་གཏོར་སྐྱོན་ཐད་སེམས་ཚབས་ཆེན་པོས་ཞུ་སྐུལ་བྱེད་མཁན་མཚོ་སྔོན་ཚེ་རིང་ལགས་སུ། སྤྱི་ཚོགས་ཟིང་སློང་དང་རྒྱལ་ཁབ་ལ་ངོ་ལོག་བྱས་པའི་ཉེས་འཛུགས་འོག དུས་ཡུན་ཟླ་བ་ ༨ རིང་གི་བཙོན་འཇུག་ཁྲིམས་ཐག་བཅད་ཡོད་པ་དང་། ནང་མི་དང་ས་གནས་ཡུལ་མི་ཚོར་གནད་དོན་དེ་དང་འབྲེལ་བའི་གནས་ཚུལ་བརྒྱུད་སྐུར་སོགས་ལ་དམ་དྲག་ཤུགས་ཆེར་བྱེད་བཞིན་ཡོད་པ། བོད་ནང་གི་འབྲེལ་ཡོད་བོད་མི་གཉིས་ནས་འདི་ག་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་།
གོང་ཞུས་འབྲེལ་ཡོད་ཅིག་ནས་མུ་མཐུད་བརྗོད་དོན་ལ། མཚོ་སྔོན་ཚེ་རིང་ལགས་ད་ལྟའི་ཆར་ཁྱུང་ཆུ་རྫོང་བཙོན་ཁང་དུ་འཇུག་ཡོད་པ་དང་། ཁོང་གི་ནང་མི་དང་འབྲེལ་ཡོད་ཚོར་རྒྱ་ནག་གཞུང་གིས་དམ་དྲག་ཤུགས་ཆེར་བྱེད་བཞིན་པ་མ་ཟད། ད་ལྟའི་ཟླ་བརྒྱད་རིང་གི་བཙོན་མཇུག་དུས་ཡུན་ཐག་གཅོད་ལས་མུ་མཐུད་ཁོང་གི་ནག་ཉེས་སྐོར་ལ་རྩད་ཞིབ་དང་། བཙོན་འཇུག་དུས་ཡུན་རིང་དུ་གཏོང་རྒྱུའི་འཇིགས་སྐུལ་སོགས་བྱེད་བཞིན་པ་དང་། དེ་སྔ་ཁོང་གིས་རྡང་ཆུ་གཙང་པོའི་སྐོར་ནས་ཞུ་སྐུལ་བྱས་པ་དེ་ནག་ཉེས་རང་གི་ངོ་བོར་ངོས་འཛིན་གྱིས་ཐག་གཅོད་བྱེད་བཞིན་ཡོད་པ་དང་། ཁོང་གིས་ཡུལ་དེའི་ཁོར་ཡུག་སྐོར་ལ་སྐད་ཆ་བཤད་པ་ཚང་མ་སྤྱི་ཚོགས་ཟིང་སློང་ཐབས་དང་། མི་སྒེར་གྱི་འཁོན་འཛིན་ཆེད་ཡིན་པ་སོགས་ཀྱི་ཉེས་འཛུགས་བྱས་ཡོད་པ་འགྲེལ་བརྗོད་གནང་བྱུང་།
བོད་རིགས་ན་གཞོན་མཚོ་སྔོན་ཚེ་རིང་ལགས་ནས། ཉེ་སྔོན་ཟླ་ ༡༠ ཚེས་ ༡༥ ཉིན། རྒྱ་ནག་གི་སྐད་འཕྲིན་སྤྱི་ཚོགས་དྲ་ལམ་བརྒྱུད། རྒྱ་ནག་གི་ (Anhui Xianhe) བཟོ་ལས་ཚོང་གཉེར་ཁང་གིས་ཡུལ་དེའི་རྡང་ཆུ་གཙང་པོའི་བཞུར་རྒྱུན་དུ་བྱེ་ཟེགས་བསྔོག་འདོན་ཤུགས་ཆེར་བྱས་ཏེ། ས་གནས་ཀྱི་ཁོར་ཡུག་ལ་གཏོར་སྐྱོན་དང་། སྐྱེ་ཁམས་ཁོར་ཡུག་ལ་གཏོར་སྐྱོན་གཏོང་གི་ཡོད་པ་རྒྱབ་ལྗོངས་བརྙན་དང་བཅས་བསམ་ཚུལ་སྤེལ་རྐྱེན། ཟླ་ ༡༠ ཚེས་ ༡༨ ཉིན་རྒྱ་ནག་གཞུང་འབྲེལ་མི་སྣས་མཚོ་སྔོན་ཚེ་རིང་གཙོས་སྡེ་བའི་ཡུལ་མི་མང་དག་ཅིག་འབོད་འགུག་གིས་འདྲི་རྩད་རྗེས་ཕྱིར་ཁྱིམ་དུ་ཀློད་ཡོད་ན་ཡང་། ཟླ་༡༠ ཚེས་ ༢༠ ཉིན་བསྐྱར་དུ་འབོད་འགུག་གིས་ཚེས་ ༢༧ ཉིན་ཁོང་ལ་ཁྲིམས་ཐག་བཅད་ཡོད་པས། འབྲེལ་ཡོད་བོད་མི་གཞན་དེས་ད་ལྟའི་ཆར་ཁོང་ལ་ཁྲིམས་བཤེར་སོགས་ག་འདྲ་བྱས་ཡོད་པའི་ཞིབ་ཕྲའི་གནས་སྟངས་གསལ་ཁ་མེད་སྐོར་བརྗོད་བྱུང་།
ཚ་རུ་མ་ཡུལ་ཚོའི་ནང་བྱེ་ཟེགས་སྔོག་འདོན་བྱེད་མཁན་གྱི་ཨན་ཧུའེ་ཤན་ཧེ་འཛུགས་སྐྲུན་ལས་གྲའི་ཚོང་གཉེར་ཁང་ཟེར་བ་དེ། ཕྱི་ལོ་ ༢༠༡༢ ཟླ་ ༦ ནང་རྒྱ་ནག་གཞུང་གི་འབྲེལ་ཡོད་ལས་ཁུངས་སུ་དེབ་སྐྱེལ་དང་སྒོ་འབྱེད་བྱས་ཡོད་པ་དང་། འཛུགས་སྐྲུན་སྣ་ཚོགས་ཀྱི་ཚོང་ལས་གཉེར་བཞིན་ཡོད་པ་དང་། མཚོ་སྔོན་ཚེ་རིང་ལགས་ནས་སྤྱི་ཚོགས་དྲ་ལམ་དུ་རྡང་ཆུ་གཙང་པོའི་ཁོར་ཡུག་གཏོར་སྐྱོན་དང་འབྲེལ་བའི་ཞུ་སྐུལ་བརྙན་ཐུང་སྤེལ་རྗེས། ལྟ་བཤེར་དང་མཆན་འབྲི་མཁན་བརྒྱ་ཕྲག་བརྒལ་བ་བྱུང་ཡོད་སྟབས། རྒྱ་ནག་གཞུང་གིས་སྤྱི་ཚོགས་དྲ་ལམ་དུ་ཁོང་གི་བརྙན་ནག་བསུབ་དང་། མཚོ་སྔོན་ཚེ་རིང་ལགས་ཀྱི་མིང་ཐོག་ཏུ་ཐོ་འགོད་བྱས་པའི་དྲ་ཁུངས་མེད་པ་བཟོས་ཡོད་ཅིང་། སྤྱིར་མཚོ་སྔོན་ཚེ་རིང་གཙོས་ཡུལ་མི་མང་པོས་དེ་སྔ་ནས་བཟོ་ལས་ཁང་དེས་ཡུལ་དེའི་ཁོག་ཡུག་གཏོར་སྐྱོན་ལ་ཞུལ་སྐུལ་དང་ངོ་རྒོལ་རིམ་པར་བྱས་ཡོད་ན་ཡང་། ཕན་ཐོགས་མ་བྱུང་སྟབས་མཚོ་སྔོན་ཚེ་རིང་ལགས་ནས་དྲ་ལམ་དུ་ཡོངས་ཁྱབ་ངང་ཞུ་སྐུལ་བྱས་པ་ཞིག་ཆགས་ཡོད་པ་རེད།།
