༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༡༡ ཚེས་ ༢༦ ཉིན་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་ནང་རྟེན་གཞི་བྱས་པའི་གདན་ས་ཆེན་པོ་དགའ་ལྡན་ཚོགས་ཆེན་དུ་འཇམ་མགོན་༸རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༥ རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་གི་ཁྲི་འདོན་མཛད་སྒོ་དང་། ཕྱི་ཚེས་ ༢༧ ཉིན་དགའ་ལྡན་ཁྲི་རིན་པོ་ཆེ་མཆོག་དང་། དགའ་ལྡན་ཁྲི་ཟུར་རིན་པོ་ཆེ་མཆོག་རྣམ་གཉིས་ལ་དགའ་ལྡན་ཁྲི་ཐོག་ཁང་དང་། བོད་མིའི་སྒྲིག་འཛུགས། ཨ་རིའི་དགེ་ལུགས་སྨོན་ལམ་ཚོགས་ཆུང་བཅས་གསུམ་གྱི་ཐོག་ནས་བརྟན་བཞུགས་བསྟར་འབུལ།
དེ་རིང་ཕྱི་ཚེས་ ༢༨ ཉིན་དཔལ་ལྡན་འབྲས་སྤུངས་མཁས་མང་བློ་གསལ་གླིང་དུ་དགའ་ལྡན་ཁྲི་ཐོག་ ༡༠༥ པའི་ཁྲི་འདོན་མཛད་སྒོ་ཞིག་ཚོགས་པ་བཅས་ཀྱི་ཐོག་བོད་མི་མང་སྤྱི་འཐུས་དགེ་བཤེས་ལྷ་རམས་པ་གོ་བོ་བློ་བཟང་ཕན་བདེ་ལགས་དང་། སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས། སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་ལགས། སྤྱི་འཐུས་མཁན་པོ་ཀཿབྲག་དངོས་གྲུབ་བསོད་ནམས་ལགས། སྤྱི་འཐུས་དཀོན་མཆོག་ཡང་འཕེལ་ལགས། སྤྱི་འཐུས་ཆོས་འཕེལ་ཐུབ་བསྟན་ལགས་བཅས་མཉམ་ཞུགས་གནང་ཡོད།
གཞན་ཡང་མཛད་སྒོ་ཁག་གི་ཐོག་གདན་ས་གྲྭ་ཚང་ཁག་གི་མཁན་ལས་ཟུར་རྣམ་པ་དང་། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་དང་ཆོས་རིག་བཀའ་བློན་གཅིག་ལྕོགས་སྤེན་པ་ཚེ་རིང་མཆོག དཔལ་ལྡན་དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་མཆོག་སོགས་ཕེབས་འདུག
དེ་ཉིན་ཁྲི་འདོན་མཛད་སྒོ་གྲུབ་མཚམས། བོད་མི་མང་སྤྱི་འཐུས་དགེ་བཤེས་ལྷ་རམས་པ་གོ་བོ་བློ་བཟང་ཕན་བདེ་ལགས་དང་། སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་རྣམ་གཉིས་ནས་དགའ་ལྡན་ཁྲི་ཐོག་ ༡༠༤ རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་ལ་མཇལ་ཁ་ཞུས་པ་དང་། དེའི་སྐབས་སྤྱི་འཐུས་རྣམ་པ་གཉིས་ནས་རི་བོ་དགེ་ལུགས་པ་ཡོངས་ཀྱི་ཚབ་ཞུས་ཏེ། དགའ་ལྡན་ཁྲི་ཟུར་རིན་པོ་ཆེ་མཆོག་གིས་རྗེ་རིན་པོ་ཆེའི་བསྟན་པ་འཛིན་སྐྱོང་སྤེལ་གསུམ་གྱི་ཐོག་མཛད་རྗེས་རླབས་པོ་ཆེ་བཞག་གནང་བར་ཐུགས་རྗེ་ཆེ་ཞུས་པ་དང་། མ་འོངས་པར་ཡང་བསྟན་འགྲོའི་དོན་དུ་སྐུ་ཚེ་ཡུན་རིང་བཞུགས་རྒྱུའི་གསོལ་འདེབས་ཞུས་པར། རིན་པོ་ཆེ་མཆོག་གིས་ཐུགས་མཉེས་ཆེན་པོས་སྐུ་གཟུགས་གནང་སྟངས་མེད་པའི་སྐོར་དང་། མུ་མཐུད་ཕྱག་ལས་ཧུར་ཐག་གནང་དགོས་པའི་བཀའ་སློབ་ཕེབས་པ། དེ་ནས་དགའ་ལྡན་ཁྲི་ཟུར་རིན་པོ་ཆེ་མཆོག་སེ་ར་དགོན་པར་ཆིབས་ཐོན་མཛད་སྐབས། སྤྱི་འཐུས་རྣམ་པ་གཉིས་ནས་ཕེབས་སྐྱེལ་ཞུས་གནང་འདུག
དེ་རྗེས་བོད་མི་མང་སྤྱི་འཐུས་རྣམ་པ་གཉིས་ནས་སེར་སྨད་མཁན་པོ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ལ་གསར་མཇལ་དང་བཀའ་སློབ་ལམ་སྟོན་ཞུས་པར། རིན་པོ་ཆེ་མཆོག་གིས་གཙོ་བོ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བཀའ་གསུང་ཅི་སྒྲུབ་གནང་དགོས་རྒྱུ་གལ་ཆེ་ཤོས་ཡིན་པ་དང་། སྟོན་པ་ཞལ་བྱོན་པའི་སྐབས་སུའང་ཚང་མའི་འདོད་པ་བསྐོང་ཐུབ་མེད་པ་ལྟར། ཚང་མའི་ཐུགས་ལ་བབ་པ་ཞིག་ཡོང་རེ་མེད་ཀྱང་ལས་དོན་གང་བྱེད་ནའང་ལྷག་བསམ་རྣམ་དག་དང་། དྲང་པོ་དྲང་གཞག་བྱེད་དགོས་པའི་ལམ་སྟོན་གནང་འདུག་པ་བཅས། །
