༄༅། །ཕྱི་ལོ་ ༢༠༢༤ ཟླ་བ་ ༡༡ ཚེས་ ༢༧ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཀྱི་གཞིས་གྲོང་ཁག་དང་། ཚོགས་སྡེ་ཁག་གི་ལས་ཁུངས་སུ་གཟིགས་སྐོར་དུ་ཕེབས་ཡོད།
དེ་ཡང་ཐོག་མར་དཔལ་ལྡན་སྲིད་སྐྱོང་མཆོག་མོན་གྷོ་སཾ་བྷོ་ཊ་གཏན་སློབ་ཏུ་ཆེད་ཕེབས་ཀྱིས་སློབ་གྲྭའི་དགེ་ལས་སློབ་ཕྲུག་རྣམས་ལ་བོད་མཐོ་སྒང་གི་གལ་གནད་སྤྱི་དང་། ལྷག་པར་བོད་ཀྱི་རང་བྱུང་ཁོར་ཡུག་དང་ས་ཁམས་ཆབ་སྲིད་ཀྱི་གལ་གནད་སྐོར་གསུང་སྐབས་བོད་དེ་འཛམ་གླིང་མཐོ་སྒང་དང་ཨེ་ཤི་ཡའི་ཆུ་མཛོད་དུ་ངོས་འཛིན་བྱེད་ཡོད་པས། བོད་ཀྱི་ཁོར་ཡུག་དེ་ཨེ་ཤི་ཡའི་མི་མང་འབུམ་ཕྲག་མང་པོའི་འཚོ་རྟེན་དང་འབྲེལ་བ་ཆགས་ཀྱི་ཡོད་སྐོར་འགྲེལ་བརྗོད་དང་། དམིགས་བསལ་བོད་ཕྲུག་རྣམས་ནས་བོད་ཀྱི་རིན་ཐང་བྲལ་བའི་ཆོས་དང་རིག་གཞུང་། སྐད་ཡིག་མི་ཉམས་རྒྱུན་འཛིན་བྱས་ཏེ་འཛམ་གླིང་ལ་ཞབས་འདེགས་སྒྲུབ་ཐབས་སུ་འབད་དགོས་པའི་ལམ་སྟོན་གནང་ཡོད་པ་རེད།
གཞན་ཡང་དཔལ་ལྡན་སྲིད་སྐྱོང་མཆོག་ནས་སློབ་གཉེར་བ་ཚོས་འཛིན་གྲྭའི་སློབ་ཚན་ཙམ་མ་ཡིན་པར་མ་འོངས་པའི་མི་རབས་ཚོའི་ཆེད་བོད་ཀྱི་ཆོས་དང་རིག་གཞུང་། རང་བྱུང་ཁོར་ཡུག་ལ་བདག་གཅེས་རྒྱུན་འཛིན་བྱ་དགོས་པའི་ལམ་སྟོན་གནང་རྗེས་དཔལ་ལྡན་སྲིད་སྐྱོང་མཆོག་གཞིས་གྲོང་གསུམ་པ་དང་། རང་བཙན་ཚོགས་ཁང་དུ་ཕེབས་ཏེ་གཞིས་གྲོང་མི་མང་ལ་གསུང་བཤད་གནང་ཞིང་། དེ་ནས་དང་ཞབས་ཚོགས་པའི་ལས་ཁུངས་སུ་ཆེད་ཕེབས་ཀྱིས་དང་ཞབས་འདས་གསོན་རྣམས་ཀྱི་ཞབས་ཞུ་ལ་ཡི་རང་བསྔགས་བརྗོད་དང་། འདས་པོ་དམ་པ་རྣམས་ལ་རྗེས་དྲན་ཞུས་ཡོད་པ་རེད།
དེ་བཞིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ནས་ཡན་ལག་སྨན་རྩིས་ཁང་དུ་ཕེབས་ཏེ་དེར་ཡོད་སྨན་པ་དང་ལས་བྱེད་ལྷན་དུ་འགྲོ་ཕན་བོད་ཀྱི་སྨན་རྩིས་ཁང་གིས་བོད་ཀྱི་གསོ་བ་རིག་པའི་སྲོལ་རྒྱུན་མི་ཉམས་རྒྱུན་འཛིན་ཆེད་ཞབས་འདེགས་རླབས་ཆེན་ཞུས་པར་ངོས་འཛིན་ཆེ་བསྟོད་གནང་རྗེས་གཞིས་གྲོང་དང་པོའི་སཾ་བྷོ་ཊ་ཉིན་སློབ་དང་། ས་སྐྱ་དགོན། རྙིང་མ་དགོན་བཅས་སུ་འཚམས་གཟིགས་མཛད་ཅིང་། རྙིང་མ་དགོན་དུ་སྲིད་སྐྱོང་མཆོག་ནས་གསར་དུ་འཛུགས་སྐྲུན་བྱས་པའི་ཆུ་གསོག་མཛོད་དབུ་འབྱེད་གནང་ཡོད།
ཉིན་དེའི་མཛད་འཆར་མཐའ་མར་དཔལ་ལྡན་སྲིད་སྐྱོང་མཆོག་དགའ་ལྡན་བླ་སྤྱིར་ཕེབས་ཏེ། དགེ་འདུན་པ་རྣམས་ལ་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་གནང་རྒྱུའི་གལ་གནད་དང་། དེའི་ཆེད་དགོན་སྡེ་ཁག་ནས་དམིགས་བསལ་ཞབས་འདེགས་སྒྲུབ་ཐུབ་ཚུལ་སྐོར་གསུང་བཤད་གནང་ཡོད་པ་བཅས།། 
