༄༅། །ཕྱི་ལོ་ ༢༠༢༤ ཟླ་བ་ ༡༡ པའི་ཚེས་ ༢༦ ཉིན་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྣེ་ཁྲིད་འོག སྤྱི་འཐུས་ཟླ་བ་ཚེ་རིང་ལགས་དང་། སྤྱི་འཐུས་དབྲ་རྩ་བསོད་ནམས་ནོར་བུ་ལགས་བཅས་ལས་གྲུབ་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་སི་ཀོ་ཊ་ལན་ཌི་ (Scotland) ནང་མུ་མཐུད་གཞུང་འབྲེལ་ལས་རིམ་བསྐྱངས་ཡོད།
སི་ཀོ་ཊ་ལན་ཌི་ཤེས་ཡོན་ལས་འཆར་དང་འབྲེལ་བའི་ཉིན་གཉིས་པའི་ལས་རིམ་ཐོག དེ་གའི་སྲིད་བྱུས་ཉམས་ཞིབ་པ་སྐུ་ཞབས་ཀེ་མེ་རོན་ གྷ་རེ་ཊི་ (Cameron Garrett) ལགས་དང་། སི་ཀོ་ཊ་ལན་ཌི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་རཱོ་སི་ གྷིར་ (Ross Greer) མཆོག་རྣམ་གཉིས་ནས་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་གི་ཚོགས་མི་རྣམས་ལ་དེ་གའི་གྲོས་ཚོགས་ཀྱི་སྔོན་རྩིས་ཚོད་དཔག་དང་འཛིན་སྐྱོང་རྟོག་ཞིབ་ཚོགས་ཆུང་ (Finance and Public Administration Committe) གི་སྒྲིག་གཞི་དང་། ངོ་བོ། ལས་འགན་བཅས་ཀྱི་ཐོག་འགྲེལ་བརྗོད་དང་། ཚོགས་ཆུང་འཚོགས་སྐབས་ཟུར་ཉན་དུ་ཆེད་བཅར་ཞུས་གནང་ཡོད་འདུག
དེ་རྗེས་སི་ཀོ་ལན་ཌི་གྲོས་ཚོགས་ཀྱི་འདྲ་མཉམ་དང་། འགྲོ་བ་མིའི་ཐོབ་ཐང་ཚོགས་ཆུང་གི་ལས་དོན་སྐོར་ངོ་སྤྲོད་དང་། ཚོགས་ཆུང་འཚོགས་སྐབས་ཟུར་ཉན་དུ་ཕེབས་པ། དེ་བཞིན་སི་ཀོ་ཊ་ལན་ཌི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་རཱོ་སི་ གྷིར་ (Ross Greer) མཆོག་དང་། སྲིད་བྱུས་ཉམས་ཞིབ་པ་སྐུ་ཞབས་ཀེ་མེ་རོན་ གྷ་རེ་ཊི་ (Cameron Garrett) ལགས། སི་ཀོ་ཊ་ལན་ཌི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་དྲུང་ཆེ་ཨི་ལི་ནོར་ བྷེ་ཡར་ནེ་ རོ་སེན་གྷི་རེན་ (Eleanor Byrne-Rosengren) ལགས་བཅས་དང་ལྷན་མཇལ་འཕྲད་གནང་ཞིང་། དེའི་སྐབས་ཁོང་རྣམ་པས་སྤྱི་ཚོགས་འདྲ་མཉམ་དང་། འགྲོ་བ་མིའི་ཐོབ་ཐང་གོང་མཐོར་ཡོང་བར་དེ་གའི་ཚོགས་ཆུང་གི་འགན་ཁུར་ཞུ་ཕྱོགས་དང་། ཕྱོགས་ཡོངས་མཉམ་ཁྲིད་ཐུབ་ཐབས་སུ་ཚོགས་ཆུང་གི་ངོས་ནས་ལས་དོན་ཇི་སྤེལ་སྐོར་སོགས་ཀྱི་ཐོག་འགྲེལ་བརྗོད་གནང་འདུག
གཞན་ཡང་བོད་མི་མང་སྤྱི་འཐུས་སྐུ་ཚབ་ཚོགས་ཆུང་ནས་སི་ཀོ་ཊ་ལན་ཌི་གཞོན་སྐྱེས་གྲོས་ཚོགས་ཀྱི་འཛིན་སྐྱོང་འགན་འཛིན་ཇེ་མི་ ཌན་ལོབ་ (Jamie Dunlop) ལགས་དང་ལྷན་མཇལ་འཕྲད་གནང་བ་དང་། དེའི་སྐབས་གཙོ་བོ་གཞོན་སྐྱེས་གྲོས་ཚོགས་ཀྱི་ཐོག་ནས་སི་ཀོ་ཊ་ལན་ཌིའི་གཞོན་སྐྱེས་ཚོས་སོ་སོའི་ཐོབ་ཐང་ལོངས་སྤྱོད་བྱ་རྒྱུའི་ནུས་སྟོབས་གོང་སྤེལ་དང་། ཁོང་ཚོའི་བསམ་ཚུལ་རྣམས་ཐག་གཅོད་བྱེད་མཁན་ཚོའི་མདུན་དུ་སླེབས་ཐབས་བྱ་རྒྱུ་སོགས་ཚོགས་པའི་ལས་དོན་སྐོར་ངོ་སྤྲོད་དང་། འཛིན་སྐྱོང་འགན་འཛིན་གྱིས་ཚོགས་པའི་ཉིན་རེའི་ལས་དོན་ལྟ་རྟོག་དང་། གཞོན་སྐྱེས་གྲོས་ཚོགས་ཀྱི་འགན་འཛིན་ལྷན་ཚོགས་དང་། ལས་བྱེད་རྣམ་པའི་དབར་འབྲེལ་མཐུད་གནང་རྒྱུ། འཛིན་སྐྱོང་ཚགས་ཚུད་ཡོང་ཐབས། མང་གཙོའི་ལས་རིམ་ཐོག་གཞོན་སྐྱེས་ཚོས་ཆ་ཤས་གང་མང་ལེན་རྒྱུའི་ཐབས་བྱུས་ལག་བསྟར་བྱ་རྒྱུ་སོགས་ཁོང་ཉིད་ཀྱི་ལས་དོན་སྐོར་ངོ་སྤྲོད་གནང་འདུག
དེ་རྗེས་སི་ཀོ་ཊ་ལན་ཌི་ལྗང་ཁུ་སྲིད་དོན་ཚོགས་པའི་དབུ་ཁྲིད་པེ་ཊྲིག་ ཧར་ཝི་ (Patrick Harvie) མཆོག་དང་། ལོར་ནཱ་ སི་ལེ་ཊར་ (Lorna Slater) མཆོག མེ་གྷི་ ཆེབ་མན་ (Maggie Chapman) མཆོག ཨ་རཡེ་ནེ་ བུར་གྷེས་ (Ariane Burgess) མཆོག གྷི་ལི་ཨན་ མེག་ཀཡེ་ (Gillian Mackay) མཆོག མར་ཀི་ རཱ་སཱ་ཀེལ་ (Mark Ruskell) མཆོག་བཅས་དང་ལྷན་མཇལ་འཕྲད་ཀྱིས། ལྗང་ཁུ་སྲིད་དོན་ཚོགས་པའི་ངོས་ནས་གོ་ལའི་གནམ་གཤིས་འགྱུར་ལྡོག་དང་འབྲེལ་བའི་ལས་འགུལ་དང་། བསྐྱར་སྤྱོད་རུང་བའི་ནུས་ཤུགས་བེད་སྤྱོད། སྤྱི་ཚོགས་འདྲ་མཉམ་ཡོང་ཐབས་བཅས་ཀྱི་ཐོག་འབད་བརྩོན་གནང་བའི་སྐོར་དང་། དེ་བཞིན་ཁོང་རྣམ་པའི་ཐོག་ནས་གྲོས་ཚོགས་ནང་བོད་ཀྱི་གནད་དོན་གླེང་སློང་ཡོང་ཐབས་སྐོར་ལ་གསུངས་པ་དང་། དཔལ་ལྡན་ཚོགས་གཙོ་མཆོག་གིས་བོད་ནང་གི་ད་ལྟའི་ཛ་དྲག་གནས་སྟངས་དང་། བཙན་བྱོལ་བོད་མིའི་མང་གཙོའི་འཕེལ་རིམ་སྐོར་ལ་འགྲེལ་བརྗོད་གནང་འདུག
དེ་ཉིན་དགོང་དྲོ་དཔལ་ལྡན་ཚོགས་གཙོ་མཆོག་གིས་སྣེ་ཁྲིད་པའི་བོད་མི་མང་སྤྱི་འཐུས་སྐུ་ཚབ་ཚོགས་ཆུང་ནས་སི་ཀོ་ཊ་ལན་ཌིའི་གྲོས་ཚོགས་ནང་བཙོན་བཀྲོལ་གཏོང་ཕྱོགས་དང་འབྲེལ་བའི་ཁྲིམས་འཆར་ (The Prisoners (Early Release) (Scotland Bill) ཞེས་པའི་བརྗོད་པ་གཉིས་པའི་ལས་རིམ་འགྲོ་བཞིན་པའི་ཐོག་གཟིགས་ཞིབ་དང་། ཛ་དྲག་ལ་ངོས་འཛིན་གནང་བའི་ཁྲིམས་བཟོའི་ལས་རིམ་འདི་ལྟ་བུས་གྲོས་ཚོགས་ཀྱི་ཐོག་ནས་ཛ་དྲག་གི་དཀའ་ངལ་ཁག་ལ་ཚད་དང་ལྡན་པའི་ངང་དུས་ཐོག་སེལ་ཐུབ་རྒྱུའི་ནུས་པ་བསྟན་གྱི་ཡོད་པ་དང་། དེ་གའི་གྲོས་ཚོགས་འཐུས་མི་རྣམ་པས་ཁྲིམས་འཆར་ཐོག་བགྲོ་གླེང་དང་། བསྐྱར་བཅོས། གཏན་འབེབས་བཅས་ཀྱི་བརྒྱུད་རིམ་ཁག་ལ་གཟིགས་ཞིབ་དང་རྒྱུས་ལོན་གནང་རྒྱུ་བྱུང་ཡོད་འདུག
མདོར་ན་དེ་ཉིན་སི་ཀོ་ཊ་ལན་ཌི་གཞུང་གི་སྒྲོམ་གཞི་དང་། ཁྲིམས་བཟོའི་ལས་དོན། གལ་ཆེའི་ཐག་གཅོད་ཁག་གི་ཐོག་ལ་གྲོས་ཚོགས་ཀྱི་ཚོགས་ཆུང་ཁག་གི་ལས་འགན་ཞུ་ཕྱོགས་སོགས་ཀྱི་ཐོག་ལ་རྒྱུས་ལོན་གཏིང་ཟབ་གནང་འདུག་པ་བཅས། །
