༄༅། །ཕྱི་ལོ་ ༢༠༢༤ ཟླ་བ་ ༡༡ ཚེས་ ༢ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡེ་ཤེས་དབྱིངས་དཔྱད་ཀྱི་གཟིགས་པ་ཆེན་པོས་སྐྱབས་རྗེ་ཤར་པ་ཆོས་རྗེ་རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༥ མཛད་འགན་ཕྱག་རྟགས་སྩལ་ཡོད་པ་ལྟར། ཕྱི་ལོ་ ༢༠༢༤ ཟླ་བ་ ༡༡ ཚེས་ ༢༦ ཉིན་འཇམ་མགོན་༸རྒྱལ་བའི་རྒྱལ་ཚབ་དགའ་ལྡན་ཁྲི་ཆེན་རྡོ་རྗེ་འཆང་ཆེན་པོ་རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་གི་ཁྲི་འདོན་མཛད་སྒོར་དཔལ་ལྡན་སྲིད་སྐྱོང་དང་ཆོས་རིག་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་ངོ་བཅར་ཞུས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོར་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་དུ་རྟེན་གཞི་བྱས་པའི་གདན་ས་ཆེན་པོ་དགའ་ལྡན་ཚོགས་ཆེན་དུ་དགའ་ལྡན་རྣམ་པར་གླིང་གི་ཤར་བྱང་གྲྭ་ཚང་གཉིས་ཀྱི་མཁན་བླ་འདུས་མང་གི་དབུས་པའི་སྐུ་མགྲོན་རྣམ་པ་དང་། དད་ལྡན་ཡོངས་ནས་དུང་རྒྱ་སྤོས་སྣེའི་སེར་སྦྲེངས་གཟབ་རྒྱས་དང་བཅས་དགའ་ལྡན་ཁྲི་ཆེན་རྡོ་རྗེ་འཆང་ཆེན་པོ་མཆོག་དགའ་ལྡན་ཚོགས་ཆེན་དུ་གདན་ཞུས་ཀྱིས་ཁྲི་སྟོན་མཛད་སྒོ་ཚོགས་གནང་བ་དང་འབྲེལ། དགའ་ལྡན་ཁྲི་ཆེན་རྡོ་རྗེ་འཆང་ཆེན་པོ་ཁྲི་ཐོག་ ༡༠༥ མཆོག་གིས་ལམ་རིམ་གྱི་གསུང་ཆོས་སྩལ་གནང་ཡོད།
ཕྱི་ཚེས་ ༢༧ ཉིན་དགའ་ལྡན་ཁྲི་ཐོག་ཁང་དུ་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཆེན་རྡོ་རྗེ་འཆང་ཆེན་པོ་རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་ལ་རི་བོ་དགེ་ལྡན་པ་སྤྱི་ནས་བརྟན་བཞུགས་བསྟར་འབུལ་གནང་རྒྱུ་རེད་འདུག་པ་བཅས།།
