༄༅། །ཕྱི་ལོ་ ༢༠༢༤ ཟླ་བ་ ༡༡ ཚེས་ ༢༥ ཉིན་བཞུགས་སྒར་དྷ་རམ་ས་ལའི་བོད་ཀྱི་ཟློས་གར་ཚོགས་ཁང་དུ་ཨ་རིའི་རོགས་ཚོགས་ཀྱི་ལྷོ་ཨེ་ཤི་ཡའི་བཙན་བྱོལ་བོད་མི་རྣམས་ཀྱི་སྤྱི་ཚོགས་བདེ་དོན་ལ་སྨན་པའི་གཞི་རྒྱ་ཆེ་བའི་ལས་གཞི་ལྷོ་ཨེ་ཤི་ཡའི་བོད་མིའི་འདུས་སྡོད་ཀྱི་དཔལ་འབྱོར་དང་། སྤྱི་ཚོགས། རིག་གཞུང་བཅས་ཀྱི་བཟོད་ནུས་གོང་མཐོར་སྤེལ་བ་ཞེས་པ་དངོས་སུ་དབུ་འབྱེད་གནང་ཡོད།
དེ་ཡང་གོང་ཚེས་ཉིན་གྱི་ཕྱི་དྲོ་ཆུ་ཚོད་ ༠༥ ཐོག་བོད་མིའི་སྒྲིག་འཛུགས་ཀྱི་སྲིད་ཚབ་ལྕང་ར་ཐར་ལམ་སྒྲོལ་མ་མཆོག་དང་། བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག ཨ་རིའི་རོགས་ཚོགས་ཀྱི་རྒྱ་གར་དང་འབྲུག་ཡུལ་ཁུལ་གྱི་ལས་གཞིའི་ངེས་སྟོན་པ་ཨིས་ཀྲི་བིན་ཨོ་ལིབ་ (Steven Olive) ལགས་ཐེ་བའི་ཨ་རིའི་རོགས་ཚོགས་ཀྱི་སྐུ་ཚབ་ཚོགས་ཆུང་། བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས། དཔལ་འབྱོར་དྲུང་ཆེ་ཚེ་རིང་དོན་གྲུབ་ལགས། ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས། འཕྲོད་བསྟེན་དྲུང་ཆེ་བྱམས་པ་ཕུན་ཚོགས་ལགས། བོད་ཀྱི་ཐེབས་རྩའི་ཚོགས་གཙོ་བྷོབ་ཨན་ཀར་སོན་ལགས། དེ་བཞིན་ལས་གཞི་དེ་དང་འབྲེལ་ཡོད་ཚོགས་སྡེ་ཁག་གི་འགན་འཛིན་དང་སྐུ་ཚབ་སོགས་ཕེབས་ཞུགས་ཐོག་བོད་མིའི་སྒྲིག་འཛུགས་ཀྱི་སྤྱི་ཚོགས་བདེ་དོན་དང་འབྲེལ་བའི་ནང་སྲིད་ལས་ཁུངས་དང་།དཔལ་འབྱོར་ལས་ཁུངས། ཤེས་རིག་ལས་ཁུངས། འཕྲོད་བསྟེན་ལས་ཁུངས་བཅས་ཀྱི་དྲུང་ཆེ་དྲུང་ཚབ་རྣམས་ནས་ལས་ཁུངས་སོ་སོའི་སྤྱི་ཚོགས་བདེ་དོན་གྱི་ལས་གཞི་ཁག་ངོ་སྤྲོད་དང་། ཨ་རིའི་རོགས་ཚོགས་ནས་དེ་དོན་མཐུན་འགྱུར་གནང་མུས་ལ་ཐུགས་རྗེ་ཆེ་ཞུས་རྗེས་བོད་མིའི་སྒྲིག་འཛུགས་ཀྱི་སྲིད་ཚབ་ལྕང་ར་ཐར་ལམ་སྒྲོལ་མ་མཆོག་གིས་ལས་གཞི་དབུ་འབྱེད་དང་འབྲེལ་བའི་གསུང་བཤད་གནང་ཡོད།
སྲིད་ཚབ་ལྕང་ར་ཐར་ལམ་སྒྲོལ་མ་མཆོག་གིས་བོད་ས་ཤོར་རྗེས་ལོ་ངོ་ ༦༥ ལྷག་འགྲོ་བཞིན་ཡོད་པ་དང་། དུས་ཡུན་དེ་དག་ནང་རྒྱ་ནག་གཞུང་ནས་བོད་ཀྱི་ཆོས་དང་རིག་གཞུང་ངོ་བོ་བཅས་པ་ཤུལ་མེད་ནག་བསུབ་གཏང་རྒྱུར་ཐབས་བརྒྱ་བྱུས་སྟོང་བསྟེན་ཡོད་ནའང་། བཙན་བྱོལ་ནང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དཀྱེལ་ཆེའི་དགོངས་གཞི་དང་རླབས་ཆེན་དབུ་ཁྲིད་ལམ་སྟོན་འོག་བོད་མི་ཚོས་དཀའ་སྤྱད་འབད་འབུངས་ཀྱིས་བོད་མིའི་འཐབ་རྩོད་རྒྱུན་འཛིན་དང་། ལྷག་པར་བོད་ཀྱི་ཆོས་དང་རིག་གཞུང་གསོན་གནས་གཞི་རྟེན་བརྟན་པོ་བཙུགས་གནང་ཡོད་པ་གསལ་སྟོན་གནང་ཡོད། ཁྱད་པར་དུ་བོད་རིགས་གཞོན་སྐྱེས་རྣམས་ལ་གནའ་དེང་ཤེས་ཡོན་གྱི་གོ་སྐབས་སྐྲུན་སླད་རྒྱ་གར་ནང་བོད་ཕྲུག་རྣམས་ལ་དམིགས་པའི་སློབ་གྲྭ་ཟུར་འཛུགས་གནང་ཡོད་པ་དང་། ཤེས་ཡོན་གྱི་བསྟི་གནས་དེ་དག་ནས་སློབ་མཐར་སོན་པའི་སློབ་ཕྲུག་རྣམས་ཀྱིས་རྒྱལ་སྤྱིའི་སྤྱི་ཚོགས་དང་། ཡང་སྒོས་བོད་མིའི་སྤྱི་ཚོགས་ནང་འགོ་ཁྲིད་མཚོན་པའི་ཆེད་ལས་འདྲ་མིན་ཐོག་ཞབས་འདེགས་ཞུས་ཏེ་བོད་མིའི་རང་དབང་འཐབ་རྩོད་དང་། སྤྱི་ཚོགས་བདེ་དོན་གྱི་ལས་ཁུར་སྣེ་ཁྲིད་བཞིན་ཡོད་པ་འགྲེལ་བརྗོད་གནང་ཡོད།
དེ་བཞིན་ཁོང་མོས་རྒྱ་ནག་གཞུང་གིས་འདས་པའི་ལོ་ངོ་ ༦༥ ལྷག་རིང་བོད་མིའི་བསམ་བློ་བཙན་སྒྱུར་གཏང་རྒྱུའི་འབད་རྩོལ་སྣ་ཚོགས་བྱས་ཀྱང་ལམ་ལྷོངས་བྱུང་མེད་པས། བར་ལམ་ནས་རྒྱ་ནག་གཞུང་གིས་བོད་མི་རིགས་ཤུལ་མེད་བཟོ་རྒྱུའི་སྲིད་བྱུས་དྲག་གནོན་ཆེ་རུ་བཏང་སྟེ། བོད་ནང་གི་བོད་ཕྲུག་རྣམས་མི་སེར་སྤེལ་ཡུལ་གཏན་འཇགས་སློབ་གྲྭ་ཁག་ཏུ་བཙན་འཇུག་གིས་བོད་ཀྱི་ཆོས་དང་རིག་གཞུང་ལས་ཁ་ཕྲལ་ཏེ། རྒྱ་སྐད་གཙོ་བོར་གྱུར་བའི་ཆབ་སྲིད་ཀྱི་སློབ་གསོ་སྤྲད་ནས་བྱིས་པའི་རྒྱུད་ལ་བོད་མིའི་ངོ་བོ་མེད་པ་བཟོ་ཐབས་རྩོམ་གྱི་ཡོད་པ་ནི་བློ་འཚབ་སྐྱེ་གཞི་ཞིག་ཏུ་གྱུར་ཡོད་པ་གསུངས།
དེ་ལས་འཕྲོས་ཏེ་སྲིད་ཚབ་མཆོག་ནས་བཙན་བྱོལ་ནང་གི་བོད་མིའི་སློབ་གྲྭ་ཁག་ཏུ་བོད་ཀྱི་ཐུན་མོང་མ་ཡིན་པའི་ཆོས་དང་། རིག་གཞུང་། སྐད་ཡིག་སློབ་ཁྲིད་བྱེད་ཀྱི་ཡོད་པ་མ་ཟད། བོད་ཕྲུག་རྣམས་མི་བཟང་པོ་ཞིག་ཏུ་གྱུར་ཐབས་སུ་ཤེས་ཡོན་དང་བཟང་སྤྱོད་ཟུང་དུ་སྦྲེལ་ནས་སློབ་ཁྲིད་གནང་གི་ཡོད་ཅིང་། དེ་དོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་སྐྱེད་ལས་འཁྲུངས་པའི་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་བསླབ་གཞི་སློབ་གྲྭ་ཡོངས་སུ་སློབ་སྟོན་ལག་བསྟར་གནང་གི་ཡོད་སྐོར་འགྲེལ་བརྗོད་གནང་ཡོད་པ་རེད།
ཨ་རིའི་རོགས་ཚོགས་ཀྱི་རྒྱ་གར་དང་འབྲུག་ཡུལ་ཁུལ་གྱི་ལས་གཞིའི་ངེས་སྟོན་པ་ཨིས་ཀྲི་བིན་ཨོ་ལིབ་ལགས་ཀྱིས་ལས་གཞི་དབུ་འབྱེད་ཐོག་ཨ་རི་གཞུང་ནས་ལྷོ་ཨེ་ཤི་ཡ་ཁུལ་གྱི་བོད་མི་རྣམས་ཀྱི་སྤྱི་ཚོགས་བདེ་དོན་ལ་སྨན་པའི་ལས་གཞི་འདི་ལྟ་བུ་བརྒྱུད་ནས་བོད་མིའི་ཆོས་དང་རིག་གཞུང་མི་ཉམས་རྒྱུན་འཛིན་སླད་རྒྱབ་སྐྱོར་སྔར་ལྷག་གནང་གི་ཡོད་པ་དང་། ཨ་རི་གཞུང་དང་མི་མང་གཉིས་ནས་བོད་མི་རྣམས་ལ་ཤ་ཚ་རྒྱབ་སྐྱོར་ཚད་མཐོ་པོ་གནང་གི་ཡོད་སྐོར་གསལ་བཤད་གནང་ཡོད། དེ་མཚུངས་ཁོང་གིས་དེ་སྔོན་ལྷོ་ཤར་ཨེ་ཤི་ཡའི་ཁུལ་དུ་ཕྱག་ལས་གནང་སྐབས་རྒྱ་ནག་གཞུང་གི་དམ་བསྒྲགས་ཇི་ཡོད་ལ་གདོང་ལེན་གྱིས་བོད་ནང་གི་བོད་མིའི་སྤྱི་ཚོགས་བདེ་དོན་ལ་སྨན་པའི་ལས་གཞི་སྣ་མང་སྤེལ་ཡོད་པ་རྣམས་དྲན་གསོ་དང་། སླད་མར་བཙན་བྱོལ་བོད་མིའི་བདེ་དོན་ལ་སྨན་པའི་ལས་དོན་ཐོག་ཐུགས་ཁུར་ཆེ་བཞེས་གནང་རྒྱུའི་ཞལ་བཞེས་གནང་ཡོད་པ་རེད།
གསུང་བཤད་ལས་རིམ་གྲུབ་མཚམས་བོད་ཀྱི་ཟློས་གར་ཚོགས་པའི་སྒྱུ་རྩལ་བ་རྣམས་ནས་ལས་གཞི་དབུ་འབྱེད་རྟེན་འབྲེལ་མཚོན་ཆེད་བཀྲ་ཤིས་བྲོ་གར་གཟིགས་འབུལ་དང་། མཐར་ཨ་རིའི་རོགས་ཚོགས་ཀྱི་ཤེས་རབ་འོད་ཟེར་ལགས་ནས་ཐུགས་རྗེ་ཆེ་ཞུའི་གསུང་བཤད་གནང་ནས་མཛད་སྒོ་ལེགས་པར་གྲུབ་ཡོད།
སྤྱིར་ལོ་ལྔའི་རིང་གི་ལྷོ་ཨེ་ཤི་ཡའི་བོད་མིའི་འདུས་སྡོད་ཀྱི་དཔལ་འབྱོར་དང་། སྤྱི་ཚོགས། རིག་གཞུང་བཅས་ཀྱི་བཟོད་ནུས་གོང་མཐོར་སྤེལ་བའི་ལས་གཞི་དེ་ནི་ཨ་རིའི་རོགས་ཚོགས་ཀྱི་བོད་མིའི་སྤྱི་ཚོགས་ལ་ཕན་པའི་ལས་གཞི་ཆེ་ཤོས་ཤིག་ཡིན་པ་དང་། ལས་གཞི་དེ་བརྒྱུད་བོད་མི་རྣམས་ལ་རྒྱུན་གནས་ཐུབ་པའི་འཚོ་བ་སྐྱེལ་རྒྱུ་དང༌། སྤྱི་ཚོགས་ཀྱི་འཚོ་བ་བརྟན་པོ་བཟོ་རྒྱུ། བོད་མིའི་རིག་གཞུང་རྒྱུན་འཛིན་བྱ་རྒྱུའི་དམིགས་ཚད་བཟུང་གི་ཡོད་ལ། དེའི་ཆེད་དུ་བོད་མིའི་སྒྲིག་འཛུགས་དང་མཉམ་ལས་ཐོག་ལས་རིགས་སྦྱོང་བརྡར་དང་། ཚོང་འཛུགས་རམ་འདེགས། རིག་རྩལ་གོང་འཕེལ་བཏང་སྟེ། བོད་མི་རྣམས་དཔལ་འབྱོར་ཐོག་རང་ཁ་རང་གསོ་བཟོ་རྒྱུ་དང་། བོད་ཀྱི་སྐད་ཡིག རིག་གཞུང་། སྲོལ་རྒྱུན་མི་ཉམས་རྒྱུན་འཛིན་བྱ་རྒྱུ་ཡིན་པ་རེད།
ལས་གཞི་དེ་དང་འབྲེལ་ཏེ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས། ཨ་རིའི་རོགས་ཚོགས་ནི་བོད་མིའི་སྒྲིག་འཛུགས་ཀྱི་ལོ་མང་རིང་གི་ལོ་རྒྱུས་ལྡན་པའི་གྲོགས་པོ་བརྟན་པོ་ཞིག་ཡིན་ཞིང༌། ང་ཚོའི་ཡར་རྒྱས་ལས་གཞི་མང་པོའི་ནང་ཕན་གྲོགས་ཧ་ཅང་ཆེན་པོ་གནང་ཡོད། ང་ཚོ་ལྷན་དུ་མུ་མཐུད་མཉམ་ལས་གནང་བར་ཐུགས་རྗེ་ཆེ་ཞུ་རྒྱུ་མ་ཟད། བོད་མིའི་སྤྱི་ཚོགས་ནང་དོན་སྙིང་ལྡན་ཞིང་རྒྱུན་གནས་ཐུབ་པའི་འགྱུར་བ་གཏོང་ཆེད་མཉམ་ལས་འདི་གོང་མཐོར་གཏང་རྒྱུའི་ཆོད་སེམས་བརྟན་པོ་ཡོད། འདི་ལྟ་བུའི་ལས་གཞི་གསར་པ་འདི་ནི་ལྷོ་ཨེ་ཤི་ཡའི་བོད་མིའི་འདུས་སྡོད་ཀྱི་དཔལ་འབྱོར་དང་། སྤྱི་ཚོགས། རིག་གཞུང་བཅས་ཀྱི་བཟོད་ནུས་གོང་མཐོར་གཏོང་བར་མདུན་སྐྱོད་ཀྱི་གོམ་སྟབས་ཆེན་པོ་ཞིག་ཡིན་ལ། འདི་ནི་ང་ཚོའི་རིག་གཞུང་རྒྱུན་འཛིན་དང་སྲོལ་རྒྱུན་སྲུང་སྐྱོབ་བྱ་རྒྱུའི་འབད་རྩོལ་ཙམ་མ་ཡིན་པར། མ་འོངས་པའི་བུ་རབས་ཚ་རྒྱུད་རྣམས་ལ་རྒྱུན་གནས་ཐུབ་པའི་མདུན་ལམ་བཟང་པོ་ཞིག་བསྐྲུན་རྒྱུའི་ལས་དོན་ཞིག་ཀྱང་ཡིན་པ་རེད། ཅེས་གསུངས་ཡོད།
ལྷོ་ཨེ་ཤི་ཡའི་བོད་མིའི་འདུས་སྡོད་ཀྱི་དཔལ་འབྱོར་དང་། སྤྱི་ཚོགས། རིག་གཞུང་བཅས་ཀྱི་བཟོད་ནུས་གོང་མཐོར་སྤེལ་བའི་ལས་གཞི་འདི་ཉིད་ཨ་རིའི་རོགས་ཚོགས་ཀྱི་དཔལ་འབྱོར་མཐུན་འགྱུར་འོག བོད་མིའི་སྒྲིག་འཛུགས་དང་བོད་ཀྱི་ཐེབས་རྩ་ཟུང་སྦྲེལ་གྱིས་ལག་བསྟར་གནང་སྟེ། རྒྱ་གར་དང་། བལ་ཡུལ། འབྲུག་གསུམ་ནང་གནས་སྡོད་བོད་མིའི་སྤྱི་ཚོགས་ཀྱི་བདེ་དོན་ལ་ལྟ་སྐྱོང་དང་། བོད་ཀྱི་ཆོས་དང་། རིག་གཞུང་། གོམས་སྲོལ་རྣམས་མི་ཉམས་རྒྱུན་འཛིན་སླད་ལས་དོན་བརྩམ་རྒྱུ་ཡིན་པ་རེད།། 
