༄༅། །ཕྱི་ལོ་ ༢༠༢༤ ཟླ་བ་ ༡༡ ཚེས་ ༡༢ ཉིན་ཨོསྟྲི་ཡ་རྒྱལ་ས་ཝིཡི་ནར་ཨོསྟྲི་ཡ་དང་བླངས་བོད་དོན་ཞུ་གཏུག་ལས་འགུལ་དང་། བོད་དོན་རྒྱབ་སྐྱོོར་ཚོགས་པ་ (Save Tibet Austria) གཉིས་ཟུང་སྦྲེལ་གྱིས་གོ་སྒྲིག་འོག་བདེ་སྐྱིད་ཀྱི་ཤེས་རབ་ཞེས་པའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དངོས་བྱུང་གློག་བརྙན་གཟིགས་འབུལ་ཞུས་ཏེ་གློག་བརྙན་དེ་དང་འབྲེལ་བའི་བགྲོ་གླེང་ཞིག་གོ་སྒྲིག་ཞུས་ཡོད།

བགྲོ་གླེང་དེའི་ཐོག་གློག་བརྙན་འཁྲབ་ཁྲིད་པ་ཕི་ལིཔ་ཌེ་ལ་ཁིས་ལགས་དང་། ཨོསྟྲི་ཡ་ནང་པའི་མཐུན་ཚོགས་ཀྱི་ཚོགས་གཙོ་གྷེར་ཧར་ཝི་སི་གྲེབ་ལགས། བོད་དོན་རྒྱབ་སྐྱོོར་ཚོགས་པའི་ (Save Tibet Austria) འགན་འཛིན་དང་ཆབ་སྲིད་པ་ལྕམ་མེ་ཌེ་ལིན་པེ་ཏྲོ་ཝིག་ལགས་བཅས་ལྷན་ཞུགས་གནང་ཡོད། སྐབས་དེར་མང་ཚོགས་ནས་མཉམ་ཞུགས་ཧ་ཅང་ཡག་པོ་གནང་ཡོད་པ་མ་ཟད། མང་ཚོགས་ལ་ཨོསྟྲི་ཡའི་དང་བླངས་བོད་དོན་ཞུ་གཏུག་ལས་འགུལ་བའི་ངོ་སྤྲོད་ཐོག་མ་དེ་ཆགས་ཀྱི་ཡོད།དེ་ཡང་མཛད་སྒོ་དེ་བཞིན་ཕྱི་དྲོ་ཆུ་ཚོད་ ༧།༣༠ ཙམ་ནས་དབུ་འཛུགས་གནང་ཞིང་། ཐོག་མར་ཨོསྟྲི་ཡ་དང་བླངས་བོད་དོན་ཞུ་གཏུག་གི་ཚོགས་མི་མེ་རི་ཡན་ཚེ་བརྟན་སྒྲོལ་མ་ལགས་ཀྱི་ཕེབས་བསུའི་གསུང་བཤད་དང་། གློག་བརྙན་འཁྲབ་ཁྲིད་པ་ཕི་ལིཔ་ཌེ་ལ་ཁིས་ལགས་ཀྱི་ངོ་སྤྲོད་གནང་རྗེས་ཕི་ལིཔ་ལགས་ཀྱི་གློག་བརྙན་དེ་བཟོས་པའི་བརྒྱུད་རིམ་དང་། སེམས་འགུལ་གང་འདྲ་ཐེབས་སྐོར་འགྲེལ་བརྗོད་གནང་སྟེ་གློག་བརྙན་གཟིགས་འབུལ་ཞུས་ཡོད།

དེ་རྗེས་མེ་རི་ཡན་ཚེ་བརྟན་སྒྲོལ་མ་ལགས་ཀྱི་གཙོ་སྐྱོང་འོག་འཚེ་བ་དང་དམག་འཁྲུག་ཀྱི་དུས་ཚོད་འདིར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ཀྱི་འབྲེལ་བ་ཇི་ལྟར་ཡོད་མེད་སྐོར་གྲོས་བསྡུར་གནང་སྐབས་བགྲོ་གླེང་བ་ཚོས་རང་ཉིད་ཀྱི་ཆོས་ལུགས་དང་། ཆབ་སྲིད་སོགས་ཀྱི་ལངས་ཕྱོགས་མི་འདྲ་བའི་སྒོ་ནས་དགོངས་ཚུལ་བསྟན་པ་མ་ཟད། ༸ཁོང་གི་བཀའ་སློབ་བརྒྱུད་ད་ལྟ་དང་འབྱུང་འགྱུར་འཛམ་གླིང་ཐོག་ཕན་ཐོགས་ཚུལ་སྐོར་གསུངས་ཡོད།

མཐར་ཨོསྟྲི་ཡ་དང་བླངས་བོད་དོན་ཞུ་གཏུག་གི་འབྲེལ་མཐུད་པ་དང་། ཨོསྟྲི་ཡ་བོད་རིགས་མཐུན་ཚོགས་ཀྱི་ཚོགས་གཙོ་གཉིས་ནས་སྐུ་མགྲོན་རྣམས་ལ་ཐུགས་རྗེ་ལེགས་འབུལ་མཚོན་ཆེད་ཁ་ཏག་ཕུལ་ཏེ་མཛད་སྒོ་མཇུག་སྒྲིལ་བ་བཅས།།