༄༅། །འདི་གར་ཆེས་མཐོའི་ཁྲིམས་ཞིབ་ཁང་ནས་བཏང་གནས་ནང་འཁོད་དོན། བལ་ཡུལ་ཀཐ་མན་གྲུ་ས་གནས་འོས་བསྡུ་འགན་འཛིན་གྱིས་ཐུགས་འཁུར་འོག་བལ་ཡུལ་འཇོ་ཁེལ་གྱི་ས་གནས་འཐུས་ཚོགས་ཀྱི་ཚབ་གསར་ཚོགས་གཙོ་དང་། ཚོགས་གཞོན་གཙོས་པའི་ས་འཐུས་རྣམ་པ་དང་། ཀཐ་མན་གྲུ་ས་གནས་འོས་བསྡུ་འགན་འཛིན་ལས་རོགས་འཇོ་ཁེལ་བཟོ་གཞིས་ལས་ཁུངས་ཀྱི་ས་གནས་འགོ་འཛིན། འཇོ་ཁེལ་བཟོ་གྲྭའི་འགན་ལྷན་ཚོགས་གཙོ་དང་ཚོགས་མི་རྣམ་པ། བཟོ་གྲྭའི་ལས་བྱེད་བཅས་མི་གྲངས་ ༡༣ འཇོ་ཁེལ་བཟོ་གཞིས་ཚོགས་ཁང་དུ་འདུ་འཛོམས་ཀྱིས། བྱང་ཕྱོགས་བོད་མིའི་ས་གནས་ཁྲིམས་ཞིབ་པ་ཆོས་སྐྱིད་མཆོག་ནས་དྲྭ་སྣང་ (virtual) བརྒྱུད་ཕྱི་ལོ་ ༢༠༢༤ ཟླ་ ༡༡ ཚེས་ ༡༥ རེས་གཟའ་པ་སངས་སྔ་དྲོའི་ཚོུད་ ༡༠ ཐོག་བལ་ཡུལ་འཇོ་ཁེལ་བསམ་གྲུབ་གླིང་གི་ས་གནས་འཐུས་ཚོགས་སྐབས་ ༡༠ པའི་ཚབ་གསར་ཚོགས་གཙོ་དང་ཚོགས་གཞོན་གཉིས་ཀྱི་དམ་འབུལ་མཛད་སྒོ་ཚོགས་འདུག་པ་དང་།
ཚབ་གསར་ཚོགས་གཙོ་རྟ་མགྲིན་ཚེ་རིང་ལགས་དང་། ཚོགས་གཞོན་དོན་གྲུབ་ཚེ་རིང་ལགས་རྣམ་གཉིས་ནས་སྒྲིག་དོན་ལྟར་ས་གནས་ཁྲིམས་ཞིབ་པའི་མདུན་དུ་ས་འཐུས་ཚོགས་གཙོ་དང་ཚོགས་གཞོན་གྱི་ལས་འཁུར་དམ་བཅའ་འབུལ་བཞེས་ལེགས་གྲུབ་བྱུང་འདུག
དམ་འབུལ་གྱི་མཛད་སྒོ་འགོ་འཛུགས་མ་ཞུས་གོང་། ས་གནས་ཁྲིམས་ཞིབ་པ་ཆོས་སྐྱིད་ལགས་ནས་རང་ཉིད་ཀྱི་ངོ་སྤྲོད་མདོར་བསྡུས་ཞུས་རྗེས། ཚོགས་བཅར་བ་རྣམས་ལ་ས་འཐུས་དམ་འབུལ་དང་འབྲེལ་བའི་བཅའ་ཁྲིམས་དང་། འོས་བསྡུ་སྒྲིག་གཞིའི་དོན་ཚན་ཁག་ཅིག་ངོ་སྤྲོད་བྱས་འདུག་པ་བཅས།། 
